بلوچ نیشنل موومنٹ نا ترجمان پارے ڈاکٹر منان و سنگت آتا ہشت می برسی نا وختءِ کُل زون ، چیپٹرز و سیل سسٹم آک یات گاری ریفرنسز و پروگرام اڈ ایتِر و سوشل میڈیا ٹی دا ہیش ٹیگ #MartyrsOfMastung کارمرز کِیر تینا عظیم اِنگا لیڈر و سنگت آتے خراجءِ عقیدت پیش کِیر۔ ڈاکٹر منان بلوچ ، اشرف بلوچ ، حنیف بلوچ و ساجد بلوچءِ 30جنوری 2016 اے پاکسانی فورسز آک مستونگ ئٹی بی این ایم نا سینئر انگا سنگت اشرف بلوچ نا ہورا ٹی سوب نا گوربامءِ پترنگیرا بے پاون فائرنگ ئٹ شہید کیرا۔ ڈاکٹر منان بلوچ بی این ایم و بلوچ قومی تحریکءِ منظم کننگ کِن و ایلو تہین پہ تہینا جیڑا آتا خلاسی تیکِن مستونگ و خڑک و گور نا دورغا اَسَکاءَ۔
ترجمان پارے دا اولی وار اَف کہ بی این ایم نا اَسے اہمءُ لیڈر اَس قربانی تِسونءِ بلکِن بی این ایم نا تاریخ قربانی اَن پورءِ۔داٹی پاٹی نا بیخ تخوک سربراہ واجہ غلام محمد بلوچ اَن الیس عام انگا کارکن اِسکان تینا جان آتے ندر کریسا تاریخءِ زندہ کرینءُ۔چیئرمین غلام محمد نا شہادت اَن پد پاٹی نا بازنگا بنجاہی لیڈرآک دِتر تریسا دا جُہدءِ اینو اِسکان زندہ تخانءُ۔داڑن بیدس ڈاکٹر دین محمد بلوچ ، غفور بلوچ و رمضان بلوچ تُون ھوار بازِنگا لیڈر آک سال آتا سال پاکستانی پوج نا اندرانگا بندی جاغہ تیٹی تکلیف سگیسہءُ۔
ترجمان پارے واجہ غلام محمد نا شہادت اَن پد ریاست اننا خوشی و گلَ ئٹی اَسکا کہ چیئرمین غلام محمد اَن پد پاٹی خلاس مَس ولے ڈاکٹر منان بلوچ و سنگت آک ریاست نا جبرئنا مقابلہءِ کریسا جوانو وڑسیٹی بی این ایم اے منظم تخار۔ڈاکٹر منان بلوچ بلوچستان نا کُنڈ کُنڈءِ دورہ کرے بی این ایم نا پروگرام و بلوچ قومی تحریکءِ زندہ تخِنگ کِن نن و دے محنت کرے۔ ہونا کروکا کاریم اینو ننا مون ئٹیءُ۔
ھو پارے شہدائے مستونگ ئٹی سنگت بابو نوروز بلوچ اَسے مصنف و دانشور اَس اَسکا، ھو بی این ایم نا پلیٹ فارم تون ھوار ھوار تینا قلم ئٹی ھم بلوچ قومی مسلئہءِ مونی اَتِنگ و قومءِ آگاہی تننگ تون ھوار اَس۔کم انگا عمر ئٹی شہید مروکا ساجد بلوچ ، بی این ایم نا سینئر انگا ممبر اشرف بلوچ و حنیف بلوچ تینا سیاسی پندآتون بلوچ قومی تحریک ئٹی باز جوانو کردار اَس ادا کریر تینا دِتر نا گُڈی پِٹءِ اِسکان بلوچ قومی تحریکءِ مونی دننگ کِن قربان کریر۔ ہوفتہ قربانیک نن کِن اَسے رژناءُ کسر اَس ملار۔بلوچ آجوہی نا کَسر ئٹی قربانی تروکا سنگت آک مدم ننا ہوست آتیٹی زندہ سلور۔
