بلوچ ڈیہہ ئنا مار و مسڑک!
پاکستانی قوضہ گیر ریاست اسہ وار پدا جہان نا خن تیٹی مش شاغنگ کن پن ئنا گچینکاری نا ڈرامہ کننگءِ۔ نُما علم ئٹی مرو او تنیا بلوچ گلزمین آ ناجائز قوضہ ئے بھلُن کننگ کن دا بیہودہ سرکرس نا بنائے کننگءِ، دہشت گرد ریاست نا دا خراب انگا ڈرامہ و بیہودگی نا انتہائے سر مروکا سرکس نا منہ مسخت پاشءُ ہرافتیٹی دافک تُدءُ۔
1:جہان ئے دا باور کریفنگ کہ بلوچستان قوضہ مروکو ہند ئس اف۔
2: بلوچستان پاکستان سامراج نا کالونی ئس اف بلکہ دا اونا قانونی صوبہ ئسے۔
3:بلوچ آک پاکستان آن مطمئن و خوشءُ۔
4:کٹھ پتلی بلوچستان اسمبلی قانونی و اخلاقی حیثیت ئس تخک۔
ہر باشعور انگا بلوچ چائک کہ پاکستانی گچینکاری و اونا جمہوریت ہرادے عجیب و غریب ءُ اصطلاح نا ذریعہ ئٹ” لنگ و مُنڈ انگا جمہوریت” نا گمراہ کروکو پن ئس تننگانے، راستی ئٹ دا اسہ بھلو فراڈ و دروغ ئسے، پاکستان ہنوکا 70 سال آن بلوچ راج اتون دا فراڈئے کرسا بننگءِ۔ ہندا فراڈ نا سوب آن بلوچ راجی مفادات آتے بے کچ نسخان تے مون تروئی تمانے۔
بلوچ آک!
پاکستان نا فراڈ گچینکاری تیٹی بشخ ہرفنگ آ نہ تنیا بلوچ نا جہانی سطح ئٹ سیاسی اخلاقی و قانونی کیس نزور مریک بلکہ داڑان پاکستانی قید ئٹی بند ایلو راج آتے غلطءُ پیغام ئس ہنو، فراڈ گچینکاری تیٹی بشخ ہلنگ نا نسخان آک داڑسکان افس دانا خراب اِنگا اثرات آتا دائرہ سخت بھلُنءِ۔
1- نُمے منہ بہا مروکو بے ضمیر انگا بندغ آتیان اسٹ گچین کروئیءِ و ایہُن” دا گچینکاری ئے ووٹ تننگ آن مُست قوضہ گیر لشکر کیک۔قوضہ گیر ریاست نا دا گچین کروکا بندغ نُما جاگہ قوضہ گیر نا نمک خواری کرسا نُما بُنیات آتے نزور کیک۔
2- نُما ووٹ ئے بلوچ تحریک،قربانی و بھلا جدوجہد نا برخلاف کارمرز کرسا قوضہ گیر بلوچ راج ئنا زی آ قوضہ ئے گیش بھلُن کرو۔
3- ووٹ و نوٹ ئنا سیاست آن بلوچ راجی شعورئے مفلوج کننگ نا کوشست کننگ مرو تاکہ بلوچ آتے جوان انگا سیاسی و چاگڑدی کاریم تیان مُر کرسا اودے کرپیشن،جرم، دھوکہ تننگ و منافقت نا نیمہ آ دیک۔
4- پاکستانی ریاست اخلاقی لحاظ ئٹ اسہ کنگال ءُ ریاست ئسے ہراڑے ہر گڑا تنیا مالی مفاد ءِ و دا مجرمانہ روشت ئے نن پاکستانی قید خانہ ٹی ہر جاگہ خننگ اُن،جہانی دہشتگردی نا نرسری پاکستان خوائک کہ دا بدبو انگا سیاسی کلچرئے تینا پارلیمانی غنڈہ تہ ذریعہ ئٹ بلوچستان آ مسلط کے۔ گچینکاری نا ڈرامہ ٹی نُما اواری دانا ناپاک اِنگا منصوبہ آتے پورو کننگ آ مدد کرو۔
غیرت مندہ بلوچ آک!
نُما راہا منہ بندغ آک خوش ءُ وعدہ تہ ٹھوکری تے ہتور اوفتا داغدار انگا ہنوکا وخت و شرمناک آ داسا نا زی آ غور کبو، خوش ءُ وعدہ آتا خیرہ ڈکھکوک خباثت ئے چائنگ نا کوشست کبو، دا ہمو بندغ آکءُ ہرافک دستانہ بینیسہ نُما معاشی،سیاسی و جسمانی قتل عام ئٹی بشخ ہرفیر، دا پاکستانی مزور آک تہٹی سڑنگانو، دا غلیظ انگا مزور آتے نہ تنیا رد کبو بلکہ دافتا ہمو حالیت ئے کبو کہ بروکا وخت ئٹی کس دلال،بے ضمیر و مکار ئس نُما سیاسی و قومی شعورئے سودا نا گڑاس پوہ مف۔
ایڑ و ایلُمک!
قوضہ گیر و سامراجی ریاست دا مکاری و غلیظ اِنگا عمل ئے چائنگ و پوہ مننگ نا کوشست کبو و دا منصوبہ آتے بے سہُب کننگ کن بلوچ راجی تحریک آجوئی نا قوت آتے کُمک کبو، نُما اسہ ووٹ ئس دا ہزار آ بلوچ لمہ تیتون غداری مرو، ہرافک دا بالم و جابر ریاست نا دو آن تینا ورنا اِنگا چُناتے گوہار، ہمو زالبول آتے اُست ہُسونی مرو ہرافک اذیت ناک آ عمل گدرینگار، ہمو چُناتیتون بے رحمی مرو ہرافک تینا باوہ آتا پٹنگ ئٹی در پہ درءُ و ہمو شہید آتا دتر تہ بے آبروئی مرو ہرافک نُما جوان اِنگا پگ ئکن قربان مسُر۔
بلوچ نیشنل موومنٹ عوام نا پارٹیءِ ہراعوام کن انقلابی جنگ کننگءِ۔ دا جنگ بلوچ راج ئنا کُمک آن بناء مسس و بلوچ راج ئنا کُمک تون اسہ آبرومندانہ ایسر ئسیا سر مرو،دا جنگ ئٹی نن تینا بھاز گڑا گوہان اُن و پین گوہیفنگ ہم صلاحیت تخنہ ولے نن بلوچ راج ئنا بے کچ مُختفی و دا جنگ ئٹی اواری ئے گوہیفنگ نا متحمل افن، دا تنیا اسہ پارٹی سینہ جنگ اف ،دا قومی جنگ ئسے ،دا نُما جنگءِ و نُما بروکا نسل آتا خوشحالی نا جنگءِ،دا جنگ ئے ایسری سُہبمندی اسکان توننگ کن الیپبو۔
قوضہ گیر ریاست نا دا فراڈ انگا گچینکاری ئے تیوعہ بے سہُب کبو، اونا ناپاک ارادہ آتے سیاسی و قومی شعور نا بناء آ بے سُہب کیر، الیکشن نا تیوعہ بائیکاٹ کرسا جہان ئے پیغام تیر کہ بلوچ غلامی نہ آجوئی خوائک، محکومی و ذلت نا زندئے نہ بلکہ عزت و پُر وقار قوم ئسینا حیثیت آن جہانی مخلوق ئٹی تینا مقام ئس کھٹنگ نا خواہشمندءُ۔
بلوچ نیشنل موومنٹ زند ئنا کُل بشخ آتیان سیالی تخوکا بلوچ گلہ بان،ماہی گیر، بزغر،ساربان،خوانندہ آک،وکیل،ڈاکٹر،صحافی،مزور ،دکاندار تیتون اوار راج ئنا مسڑ، مار تیتون ہم خواست کینہ کہ اوفک قوضہ گیر نا الیکشن تہ مکمکل بائیکاٹ کرسا بلوچ راجی آجوئی نا حق ئٹی فیصلہ تیر۔
شعبہ نشر و اشاعت: بلوچ نیشنل موومنٹ۔
