بلوچ نیشنل موومنٹ نا چیرمین ڈاکٹر نسیم بلوچ تینا اَسے بیان سیٹی پارے کہ بلوچستان ئٹی پاکستانی ریاست و ریاستی پوج ظلم ئنا آخیری حد آتَن گدرینگانءِ۔ بلوچ لَس مخلوکءِ جم ئٹ سزا تننگ کِن تینا پوجی حکمت عملی اَس شروع کرینءِ بندغاتءِ الِنگ بند کننگ ، جبرئٹ بیگواکننگ بے عدالت و قانود نا پاننگ اَن کسِفِنگ ، ایمن اِنگا مظاہرین آتے ظلم و تشدد کننگ ، زالبول آتا بے عزتی کننگ تینا ہر دے نا کاریم جوڑ کرینءِ۔ ظہیر بلوچ نا بیگواہی نا خلاف احتجاج کروکاتے فائرنگ ،لٹ بازی و آنسو گیس نا شیلنگ کننگ ریاست نا پاشءُ دہشتگردی اَسے۔
ڈاکٹر نسیم بلوچ پارے پاکستان نا دا وڑ ظلم کننگ اَن اننا وڑ لگِیک کہ بلوچ غلامءُ قوم اَسے و پاکستان اَسے غیر مہذب نوآبادیاتی طاقت سینا وڑئٹ خالی تُوفک و تینا پوج نا قوت ئٹ مظلوم آتا تحریکءِ و احتجاجءِ و ہوفتہ فریادءِ لگتمال کننگءِ یقین کیک ولے تاریخ دا حقیقتءِ وختی ہم پاش کرینءِ کہ حق و راستی ئٹ تفوکا تحریکءِ دنیا نا اَسے طاقت ئس ہم شکست تننگ کَتنءِ۔ بلوچ ہم تاریخی راستیءِ تینا قوت پائیک و مون موستی انیسہءِ بلوچ آتا داخس قربانی تننگ دئنا اَسے ثبوت ئسءِ۔
ڈاکٹر نسیم بلوچ پارے پاکستان اَسے اِیت سینا پیسلہءِ کرینءِ کہ ھو نہ تاریخءِ خوانِک و نہ کہ تاریخ اَن سبخ الِنگ نا کوشستءَ کیک ، مغربی طاقت آتا منشی و چوکیدار آتا جوڑ کروکا تینا مون دروغ ئنا دو قومی نظریہ بلوچ ، پشتون و سندھی سر زمینءِ قوضہ کننگ کِن جوڑ کننگانءِ۔ ریاستءِ خدا نا جوڑکروکا و خدا نا منشاء ئٹ مونی اِنوک پائیک ولے دا نام نہاد اسلامی قلعہ بیست و پنچ سالءِ ہم پُورا کَتو اِیرا کَپ مَس ۔ دو قومی نظریہ اموڑے دفن مَس ولے دا ریاست تاریخ اَن ہچو پنت ئس التَنءِ۔
ھو پارے شال ئٹی بلوچ احتجاج کروکاتے خاص کر زالبول آتے پاکستانی ریاست نا بے حرمتی و ظلم کننگ انسانی قدر آتے لگتمال کننگ دنیا نا مونءِ پاش مَس۔ بلوچ لمہ ، اِیڑ و بزرگ آتا زی آ پاکستان نا تشدد کننگ بلوچ قومی تاریخ ئٹی نوشتہ کننگا و قومی یاداشت آک قوم ئنا کردارءِ راستی نا کُنڈا اتیرا انادے تاریخ پارا۔ تاریخ اَن محروم آ پاکستان نہ تاریخءِ تیائیک نہ قومی یاداشتءِ۔ دنیا گواہ مرے بلوچ بلکِن تینا خونی دشمنءِ معاف کے ولے زالبول آتون ظلم کروکاتے ہچُو وخت ئس معاف کپروے، قومی غدارءِ ہچُو معافی ئس آف ہونا سزاءِ بس موتءِ۔
ڈاکٹر نسیم بلوچ پارے بلوچ زالبول بہادری و ہمت نا چیدگ ئس جوڑ مسونءُ، ننا لمہ و ایڑک اَسے درندہ سینا مونءِ جرات و بہادری نا انون مثال ئس جوڑ مسونو نہ خالی بلوچ آک ، دا خطہ بلکِن پُورا دنیا نا مہذب انگا بندغاک ہوفتہ احترامءِ کیرا۔ بلوچ زالبول آتا بے مثال انگا جُہدءِ اینو کُل دنیا عزت ئٹ ہورِنگ ئٹیءِ۔ داڑن بیدس پِنڈوخا پاکستان خالی تینا انتہا پسندی جہادی پوج و ایٹمی سلہ غاتَن دنیاءِ گیڑاس سال پین بلکِن بلیک میل کے ولے پاکستان نا انجام و تاریخی راستی دادے بلوچ قومی تحریکءِ آجوہی انو راستی ئس مسونءِ کہ دادے بدل کننگ ہچُو وخت ئس مننگ کپروے۔
