بلوچ نیشنل موومنٹ بلوچستان آ پاکستان نا قوضہ نا 77 سال پورو مننگ آ ہینور، جرمنی ٹی برانز کرے و ریلی ئس کشا۔ بی این ایم نا باسک آک بلوچستان نا حالیت آتا نظر شاغار و پلے کارڈ و نعرہ آتا ذریعت ئٹ حالیت آتے مونا ہیسُر۔ اوفک ماہ رنگ، بیبگر ، بیبو و ایلو دزگیر مروک سربر آتا دزگیری ئے شیف خلکُر و اوفتا آجوئی نا خواست ئے کریر۔
برانز کروک آتیان شرحسن، ندیم سلیم، صادق سعید اور رحمان بلوچ تران کریر۔
تران کروک آک پاریر کہ بلوچستان اسہ قوضہ مروک او ڈیھ ئسے ہراڑا پاکستان 27 مارچ 1948 آ طاقت نا زور و چم بازی ئٹ قوضہ کرے۔ ہراڑان پد بلوچ چرجوئی ئٹ بیدادی تون مون تننگ ءِ ولہ بلوچ قوم دا زور ئنا قوضہ ئے مننگ اف و تینا آجوئی کن مزاحمت کننگ ءِ۔
اوفک شال ئٹی زوت ئٹ مروک ریاست نا بیدادی، زوراکی ئٹ بیگواہی و 22 مارچ آ سریاب ئٹی زوراکی ئٹ بیگواہ مروک بندغ آتا آجوئی کن مروک دھرنا آ پاکستانی فوج ئنا سم کاری ئے بھاز شیف خلکُر۔ دا سم کاری ٹی مُسہ بندغ شہید و کیہیک ٹپی مسور۔ ہندن ریاست نا فوج ٹپی آتے ہسپتال آ دروکا تیکن ہم مشکل ودی کرے و اُلس ئنا ‘اِملاک’ آتے نسخان تِسُر۔ تران کروک آک دادے ریاست نا سخت انگا دہشتگردی نا مثیل پاریر۔
او بلوچستان نا تاریخ آ ہیت کریسہ پاریر کہ آجوئی نا جنز 1839 ئٹی برطانیہ نا جلہو و خان محراب خان نا شہادت آن بِناء مس۔ 11 اگست 1947 آ برطانیہ بلوچستان نا آجوئی نا پڑو ئے کرے ولہ پاکستان سفارتی وڑ ئٹ زور شاغنگ و چم بازی ئٹ داڑا قوضہ کننگ نا کوشست کرے ۔ دسمبر 1947 ئٹی بلوچستان نا پارلیمنٹ بھلو کچ ئسے ئٹ پاکستان تون اوار مننگ آن نمن کریسہ تینا آزات حیثیت ئے برجاء تخنگ آ زور شاغا۔ ولہ 27 مارچ 1948 آ پاکستان فوجی جلہو کریسہ بلوچستان آ قوضہ کرے۔
تران کروک آک پاریر کہ 27 مارچ ئے مون او دے ئسے نا وڑ ئٹ گدریفنہ و تینا آجوئی کن مزاحمت ئے برجاء تخانون۔ او جہانی ایلُمکو تیان خواست کریر کہ او پاکستان نا بیدادی نا بر خلاف توار ہرفِر و بلوچستان نا آجوئی نا مُخ تفی ئے کیر۔
