بلوچ نیشنل موومنٹ (بی این ایم) نا بھلنی ٹی شہید راشد مشکے، آوارن ہنکین نا کنڈ آن اڈ ہلوک آ مچی آن تران کریسہ تران کروک آک پاریر کہ بلوچ قوم دیہاڑ نا ہر دور ئٹی جنگ ئنا حالیت ئٹی مسونے۔ مدام داڑا ہمو تاغت آک جلہو کرینو ہرافک بلوچ نا زمین ئے کوزہ کننگ خواہانو و بلوچ قوم چرجوئی ئٹ دافتا برخلاف مزاہمت کریسہ بسونے۔
مچی آن بی این ایم نا بہبود سیکریٹری اقبال بلوچ، بی این ایم مشکے آواران ہنکین نا صدر استاد مہران، و مسکوہی صدر رفیق بلوچ تران کریر، ہندن نظامت نا فرض آتے ہنکین نا نائب صدر تلار بلوچ سر تِس۔
تران کروک آک پاریر کہ بلوچ قوم گدرینگوکا 77 سال آن تینا آجوئی کن جہد کننگ ئٹی ءِ و اینو دا جہد اسہ فیصلہ کروک حد ئسے آ رسینگانے۔ آزاتی نا دا جنگ کوزہ گیر ریاست پاکستان ئے ہندا کچ اسکان کمزور کرینے کہ او بلوچ سرمچار آتا مون آ سلنگ کپک و تینے رکھنگ نا پالیسی آ عمل کننگ ئٹی ءِ۔ پاکستان نا فوج نئے کہ آزاتی ئٹ چرینگ کیک نہ کہ تینا کیمپ آتیٹی رکھوک ءِ۔
او گیشتر پارے کہ پاکستان نا فوج ئنا مات کننگ دا عمل آن فاش ءِ کہ او بے ڈوہ آ برانزی تے آ سمکاری کیک۔ نیاڑی و چنا تا برخلاف تاغت کرمرز کیک و اوفتے زندان تا گواچی کننگ مریک۔ فوج ئنا کمانڈو و ایم آئی نا کارندہ غاک لس شیاری تے آ سمکاری کیرہ۔
تران کرکوک آک پاریر کہ بی این ایم نا ذمہ دار آک بلوچ نا مسلہ ئے دنیا نا مون آ تخنگ ئٹی سرسہب مسونو۔ بی این ایم نا باسک آک جہان ئے بلوچستان ئٹی مروکا ظلم آتا بارو ئٹ سوھو کننگ ئٹی ءُ۔ و اینو جہان نا شعور تخوک آ بندغ آک بلوچستان نا حالیت آتے بلوچ قوم ئنا تناظُر ئٹی ہُننگ ئٹی ءُ۔ اوفتے سما ءِ کہ پاکستان نا فوج آک بلوچستان ئٹی بندغی حق آتے ترندی ئٹ لتاڑنگ ئٹی ءُ۔ ہرافتا سوب جہانی ادارہ آک پاکستان نا ظلم و جبر نا پالیسی تے خراب پاننگ ئٹی ءُ۔
گڈ سَر ئٹ تران کروک آک پاریر کہ ساڑی آ حالیت آتیٹی بلوچ یکجہتی کمیٹی (بی وائی سی) نا برخلاف کریک ڈاون و سیاسی باسک آتا دزگیری دنیا نا مون آ دا ہیت ئے فاش کرینے کہ پاکستان نا ریاست ڈوہ کننگ ئٹی ءِ۔ دا ریاست داسہ بیرہ سیاسی جہد آن خلیس نا گواچی اف بلکہ بلوچ نا چُنا تے ہم تینکن خطرہ سرپند مننگ ئٹی ءِ۔ اینو پاکستان نا فوج لس کھسفنگ ئٹی ءِ و دا حالیت آک دا ظاہر کننگو کہ پاکستان داسہ گیشتر تینا کوزہ ئے برجاء تخنگ کپک۔
