ہرا دے آن بلوچستان پیشن نا تاغت آتا دو ئنا شیف آنے ہمو دے آن بلوچ نا زندگی خوئشی تان ہورک ءِ۔ قوضہ گیر نا خڑک بلوچ نا حیثیت اسہ مال ئسے آن ہم کم ءِ انتئے کہ خواجہ ئے تینا مال ئنا زندگی ہم دوست مریک و او اودے ناجوڑی و نہار آتیان رکھِک۔ ولہ قوضہ گیر نا مسخت قوضہ مروک ڈغار آ رہینگوک آ بندغ آتے نیست و نابود کننگ ءِ۔ ہمر کہ سہدار آتے تفنگ مریک ہندا وڑ مظلوم آ راج آتے ہم پابند کننگ مریک و اوفتیان زندگی نا ہر آسراتی پھلنگ مریک۔ بلوچ ہم تینا ڈغار آ خواجہ مننگ آن محروم ءِ و قوضہ مروکا راج و قوم آتا لڑ ئٹی ساڑی ءِ۔
دہن انگا حالیت آتیٹی قوم آتیٹی ہندنو مزاحمت کروکو رہبر ودی مریرہ ہرا تینا قوم آتے ایسر مننگ آن رکھنگ کن قوضہ گیر نا مون آ سلیرہ۔ ہموفتے آن اسٹ خواجہ غلام محمد ہم اسّک۔ بلوچ ہر دور ئٹی قوضہ گیر آتا برخلاف مزاحمت کرینے ۔ و ہر دور ئنا خواست آتے ہریسہ بلوچ رہبر آک تینا کڑدار ئے ادا کرینو۔ 1974 ئٹی خواجہ غلام محمد بی ایس او نا بشخ جوڑ مسک۔ قوم پرستی و قومی سیاست ئے ہیل کرے و تینا ثابت قدمی ، سوگو انگا جہد، علم و چاننگ نا سوب 1990 ٹی تنظیم نا چیئرمین گچین کننگ مس۔ 1992 ٹی او بلوچ نیشنل موومنٹ(بی این ایم) ئٹی اوار مس۔ او وخت آ بی این ایم نا رہبر آتا موقف اس کہ او بلوچستان نا خودمختاری و حق حاکمیت کن جہد کرور انتئے کہ پاکستان اسہ ظالم و قوضہ گیر او ریاست ئسے ہرا توفک آن بیدس ہچو بولی ئس سرپند مفک ہندا سوب بی این ایم نا پالیسی تیٹی سلاہ بند جہد ہم اوار اس۔ پارٹی ڈھکوک وڑ ئٹ پاکستان نا برخلاف جنگ ئنا تیاری کننگ ئٹی اسک ولہ 1988 ٹی فدا احمد ئے شہید کننگا ہرا خواہسکہ کہ بی این ایم پارلیمانی سیاست نا بشخ مف ۔ فدا احمد نا کوش آن پد پارٹی نا مون ہڑسوک آ رہبر آک پارٹی ئے پاکستان نا پارلیمنٹ نا بشخ جوڑ کریر و مزاحمت آن مُر مسور۔
واجہ غلام محمد بلوچ دا بے توار آ مون ہڑسنگ آن نمن کرے و بی این ایم ئے اونا بنیاتی اصول آتے آ برجاء تخِسہ پارلیمانی سیاست آن تیبہ جتائی نا پڑو و آزات بلوچستان نا آزاتی نا خواست ئے کرے۔ بی این ایم بلوچستان نا ہمو اولیکو جماعت جوڑ مس ہرا پاش وڑ ئٹ آزاتی نا خواست ئے کرے و 2008 نا سیشن ئٹی پارٹی نا آئین آن ” حق خود ارادیت” ئے کشیسہ ساف لوز آتیٹی”آزاتی” نا خواست اوار کننگا۔ خواجہ غلام محمد نلوچ نا سربری ٹی بی این ایم بلوچ سرمچار آتا مُخ تفی ئے کرے و بلوچ ئے سلاہ بند جہد ئنا سبخ ئے تس، ولہ او تینٹ سلاہ بند الّو۔ دشمن چائسکہ کہ اگہ غلام محمد نا گام تے توننگ متو تو اونا سربری ٹی بلوچ آک زوت غلامی نا زمزیر آتے پرغور۔ ہندا سوب آن غلام محمد و شیر محمد ئے زوراکی ئٹ دزگیر کریسہ بیگواہ کننگا۔ آجوئی آن پد ہم او آزاتی جنز ئنا رہبر نا وڑ ئٹ مُستی ہِنِسا کرے نئے اونا خیال آک بدل مسور نہ اونا کڑدار۔
اودے شال تربت و کراچی نا عدالت آتیٹی خوار کننگا۔ 3 اپریل 2009 آ تربت ئٹی بلوچ ریپبلکن پارٹی نا نائب صدر شیر محمد بلوچ و بی این ایم نا لالا منیر بلوچ تون اوار عدالت ئٹ بسور۔ عدالت پاکستان نا فوج ئنا کنڈ آن خلوک دروغ انگا دوبہ تے وے منِیسہ او مُسٹ ئے بے ڈوہ پارے۔ ولہ پاکستان نا فوج اوفتے خواجہ کچکول ایڈوکیٹ نا دفتر آن بیگواہ کرے و مرگاپ نا ہند آ خلک۔ اوفتا لاش آک 8 اپریل آ خننگار و 9 اپریل آ اوفتے ڈغار نا باہوٹ کننگا۔
مرگاپ نا سانحہ بلوچستان ئٹی "مارو اور پھینکو” نا پالیسی نا بناء اسک ہرا اینو اسکان برجاء ءِ و اونا نشانہ بلوچ ئے دوست تخوکاک ءُ۔ غلام محمد بلوچ و اونا سنگت آتے شہید کننگا ولہ مرگاپ اینو اسکان ہم آزاتی کن ملاس ءِ و بلوچستان ئٹی آزاتی نا جنز جوش ئٹ برجاء ءِ۔
بلوچ نیشنل موومنٹ ( بی این ایم )
