بلوچ راجی زْرمبشت (بی این ایم) نا اسہ دیوان ئسے آن تران کرسہ بی این ایم نا بنجاہی مجلس نا باسک چیف اسلم پارے کہ شہید علی شیر کرد راجی جہد ئٹی تنظیم نا اہمیت ئے منّاکہ و او کوشست کرے کہ جہد ئنا ہر پِڑ آ مخلوق ئے سرپند کنّنگ مرے و تینا کنّنگہ۔
دا دیوان ئے شہید علی شیر کرد ئنا چھانڑدمیکو شہیدی نا دے ئنا رِدئٹ بی این ایم شہید راشد مشکے-آواران ہنکین نا نیمہ آن اڈ تنّنگا۔
چیف اسلم شہید علی شیر کرد ئنا زند و کڑد آ سرجمی ئٹ ہیت کرسہ پارے کہ علی شیر کرد سینزدہ جنوری 1976ء ئٹی مچ بولان ئٹی ودی مسّس، بنیاتی وڑئٹ او مچ ہائی اسکول آن خوانا و مُستی خواننگ کن ایف اے سی سائنس کالج شال ئٹی داخلہ ہلک۔ بلوچستان یونیورسٹی آن ایم اے اسلامیات کرے و لاء کالج شال آن ایل ایل بی کرے۔
"شہید علی شیر کرد خوانوکو و دلیرو آشوبی جہدکار ئس اس۔”
او پارے کہ علی شیر کرد ئنا کڑد و تعلیم نا سوَب اونا خاہوتنا ایلو بندغاک ہم بلوچ تحریک نا بشخ مسّر۔ اوفتیٹ شہید ممتاز علی کرد، شہید علی جان کرد و شہید شیر زمان کرد اونا الّہ مڷ اسّر ہرا اونا شہیدی آن پد شہید مسّر۔
"شہید علی شیر کرد خواننگ نا وخت آن بی ایس او ٹی اوار مس و سیاست نا بِنا ئے کرے۔ 1999ء ئٹی بی ایس او نا بنجاہی مجلس نا باسک رہینگا۔ ہندا وخت بلوچ راجی راہشون خیربخش مری نا ‘حق توار سرکل’ ٹی اسّکہ۔
او مُستی پارے کہ علی شیر کرد سرمچار، نوشتہ کار و وکیل ئس اس، ڈغار نا سیاست ئٹی فکری و سیاسی راہشون ئس و جنگ ئنا پِڑ آ اسہ سرمچار ئس و کماندار ئس اس۔
دیوان نا سرہال آ ہنکین نا کماش استاد مہران ہم تران کرے، او پارے کہ آجوئی نا جہد ئٹی بھاز آ بندغاک تینا ساہ ئے تسر، ہر وڑ ئنا سختی سگّار ولے ادارہ جوڑنگ ئٹی بےسوب مسّر انتئے کہ او ادارہ جوڑنگ کن کوشست کتّوس، ولے گِڑاس جہدکار ادارہ جوڑنگ خواہار، او ادارہ جوڑار و سوگو کریر۔ علی شیر کرد ہم ہمو جہدکار تیان ءِ ہرا ادارہ جوڑنگ کن کاریم کریر و ادارہ جاتی بنیات آ کاریم کننگ خواہار۔ اینو ہمو سنگتاتا کاریم و قربانی تا سوَب بلوچ جہد مُستی بنّنگ ئٹی ءِ۔
او پارے کہ پاکستان نا ایجنسی آئی ایس آئی بیست و یک ستمبر 2010ء ئٹی شہید علی شیر کرد ئنا اسہ سْیال ئسے نا اُرا آن اودے بیگواہ کرے و مُسہ دے آن پد بیست و چھار ستمبر آ اونا جون ملّا۔ او ہندا سرپند مس کہ علی شیر کرد ئے شہید کرے چھٹفے ولے نن خننہ کہ علی شیر نا فکر اینو ہم نن تون ءِ و نن مزّل نا کُنڈ آ ہِننگ ئٹی اُن۔
دیوان ئے سمبھالینگ نا زمہ واری تہ نائب صدر تلار ناز پورو کرے و بھلا مہمان چیف اسلم اس۔
