بلوچ نیشنل مومنٹ (بی این ایم) نا مہبر ڈاکٹر دین محمد بلوچ نا زوراکی ئٹ بیگواہی ئے شانزدہ سال پورو مننگ آ بی این ایم شہید راشد ہنکین (آواران) نا نیہ مغان اسہ مُچی ئس اڈ تننگا۔ دا وخت آ بشخ ہرفوک آک تران کرِسہ پاریر کہ ریاست ہمو پختہ فکر و عمل کروک آتے ٹک کیک ہراکہ بلوچ حق حاکمیت نا خواست ئے کیرہ و کوزہ گیر نا زوراکی تا برخلاف توار ہرفِرہ۔
او مُستی پاریر کہ پاکستانی ریاست بلوچ گلزمین ئے کالونی جوڑ کننگ و اونا مڈی تا دننگ کِن ہزار آ بلوچ ورنا، ڈاکٹر، استاد، وکیل و ایلو فکر آتتون سیالی تخوک آتے زوراکی بیگواہ کرینے۔ ڈاکٹر دین محمد بلوچ ہم ہموفتان ءِ ہراکہ اسہ انسان دوست ئسے تون اوار بلوچ کِہ اسہ سوگہو ءُ توار ئس ءِ۔ ڈاکٹر دین محمد بلوچ ئے 28 جون 2009 آ اورناچ آن پاکستانی لشکر نا کارندہ غاک دزگیر کننگ آن گڈ بیگواہ کریر و داسکان شانزدہ سال پورو مننگ آن پد ہم او پاکستان نا تہار انگا قید خانہ ٹی قید ءِ۔
او پاریر کہ بی این ایم نا بنجاہی کمیٹی نا مسکوئی باسک ڈاکٹر دین محمد بلوچ و غفور بلوچ تون اوار ہزار آ بلوچ آک دشمن نا قید ئٹ سختی سگھنگ ئٹی ءُ۔ کیہی بلوچ جہدکارک شہید کننگانو ولے اوفتا نظریہ ئے بی این ایم نا باسک آک و بلوچ فرزند آک مونا دننگ ءُ۔
اوفک پاریر کہ بی این ایم اسہ لس سیاسی جماعت ئس اف بلکن سیاست نا پڑ آ بلوچستان نا آجوئی کِن کاریم ئٹی ءِ۔ بی این ایم نا سوگو کننگ ہر اسہ باسک ئنا ذمہ واری ءِ۔ ہراکہ بی این ایم ئے نزور کننگ نا کوشست ئٹی ءِ او بلوچ راج ئنا ہمدرد مننگ کپک انتئے کہ پاکستانی فوج ہندا کاریم ئے کننگ ءِ۔ ہندا سوب آن غلام محمد، لالا منیر، ڈاکٹر منان بلوچ، رسول بخش، ماسٹر علی و ایلو رہنما تے شہید کننگا و اقبال بلوچ، ڈاکٹر دین محمد بلوچ، غفور بلوچ، حاصل حسرت و رمضان بلوچ تون اوار بی این ایم نا کیہی باسک آتے بیگواہ کننگانے۔ پاکستانی فوج بی این ایم ئے ایسر کننگ نا کوشست ئٹی ءِ ولے بی این ایم اینو اسکان ہم زوراکی تون مون ترِسہ مّزل کن گام ئٹی ءِ و اسہ دے ئس الم تینا مزل آ سر مرو۔
دا مُچی نا اسٹیج سیکٹریٹری حانی بلوچ اسک۔ مُچی آن بی این ایم شہید راشد (آواران) ہنکین نا صدر مہران بلوچ، نائب صدر تلار ناز، ہنکین نا مسکوہی آرگنائزر رفیق بلوچ و ہنکین خازِن میرک بلوچ ہیت کریر۔
