ڈاکٹر نسیم بلوچ پارے کہ سندھی قوم نا مسلئہ ہم بلوچ تا وڑئٹ انسانی حقوق اَف بلکِن قومی آجوہیءِ ۔ گلام اِنگا قوم آتِیکن انسانی حقوق نا ہچُو اِیت ئس مننگ کپ پک انتیکہ گلامی نا حالتءِ حقوق نا خواست کننگ اَسے دھوکہ ئسءِ ۔
دا اِیت آتے بلوچ نیشنل موومنٹ ( بی این ایم ) نا چیئرمین ورلڈ سندھی کانگریس نا اڈ تروکا سندھ نا 36 می انٹرنیشنل کانفرنس اَن خطاب کریسہ پارے ۔
ھو پارے سندھی و بلوچ خطہ اینو درد و تکلیف اَن گدرینگ اِنگ ئٹیءُ ، ولے نن نا امیت اف ہون۔ ننا قومی جُہد راستءِ ، و اینو دنیا نا مونءِ ننا قومی توار پاکستان نا جبرءِ پُورا پاش کرینءِ۔ اگہ ریاست تشدد نا کُنڈءِ کائیک تو ھو دا اِیت اَسے ثبوت ئس مریک کہ محکوم انگا قوم ایہون تو زیر دست خننگیرا ولے حقیقت ئٹ ریاست نا پوجءِ و تینا خولیسءِ شکست تسہونءُ۔ اینو بندغ آک پیشن مننگ ئٹیءُ ، تینا توارءِ چِست کننگ ئٹیءُ ، و مزاحمت اینو مخلوک نا نفسیات نا بشخ ئس جوڑ مسہونءِ ، اننا ننا سرسوبی نا نشانیءِ۔
چیئرمین بی این ایم یکجاہی و اتحاد کِن اِیت آتن بیدس راست انگا کَسر نا کُنڈا عملی جُہد کننگ کِن زور تریسہ پارے نن اتحاد نا فائدغاتءِ جوانی ئٹ سرپند مرینءَ ، ولے ننا اتحاد نا روتغ آک عمل کننگ تون تفوکءُ ، اراتم ننا عمل و ننا مزِل اَسے کسر سیہا مَس سُر تو عمل نا میدان آ یکوئی ئٹ تینا درد و تکلیف آتے اَسِٹ ایلو تُون پاننگ کینا۔
ھو پارے پاکستان تون پین پُوسکنءُ عمرانی معاہدغاتءِ نن رد کینا گیڑاس سینئرءُ سیاستدان ننے عمرانی معاہدغاتءَ بارسَٹ بچائفِنگ نا کوشست کننگ ئٹیءُ ، مننگ کیک دا وڑ سندھ ئٹ زیات مروے۔ دا استحصالی انگا نظامءِ مضبوط تخنگ نا اَسے پوُسکنو طریقہ ئسےءِ ولے ننے ثابت قدم مرویءِ و تینا قومءِ سمجھائفویءِ کہ ھو دا دھوکہ تیٹی بَفس ، انتیکہ گلامی نا ہر وڑ ئنا نظام آتیٹی راستی اَف امو وخت اِسکان آجوہی و وت واجہی نا دُوٹی مَف۔
ڈاکٹر نسیم پارے قوضہ گیر آجوہی خواہوک آتے ترقی نا دشمن سمجھیک ولے حقیقت دادے کہ قوضہ گیر ہچُو وخت ئس محکوم انگا قوم آتے ترقی تیتَنءِ اگہ قوضہ گیر ترقی ایتوس تو برطانیہ ، سائنس و جدیدیت نا میدانءِ کُل دنیا اَن مون ئٹی ئس ، ہندوستانءِ ترقی انتءِ تننگ کتہؤ۔
ھو پارے آجوہی و ترقیءِ یورپ ہم مفت ئٹی التنءِ ھو ہم اَسے تہار و دور سیٹی تینا دِترتے وئفیر داسہ ننے ہم اننا کسر تیٹی دِتر وئفویءِ ۔ ننے زیات توار خلویءِ ، زیات تکلیف مرویءِ ، انتیکہ ننا دشمن باز خونخوارءِ۔ ننا دشمن نا پوج اَسے مذھبی و جنونیءُ درندہ ئسےءِ ، ھو ننا نسل کُشیءِ تینا ایمانی فرض سمجھانءِ۔
ھو محکوم انگا قوم آتا سیاستدان آتے لکھاری آتے قوضہ گیر نا نفسیاتی و ثقافتی اثر اَن کَشنگ کِن زور تریسہ پارے پاکستان اَن موست سندھ و بلوچستان ئٹی ہچُو اقلیت ئس الہو ،اگہ اَسِٹ ئس بخال ئس اَس یا پین مذھب سیہن تعلق تخاکءَ تینا وطن ئٹی ایلو مخلوک تون برابر نا شاری ئس اَس۔ اینو پاکستان نا سیاست نا زبان ئٹ نن ہم ہوفتے اقلیت پانہ ولے ننے ہوفتے دُون پارُوی اَف۔
