جنیوا: بلوچ نیشنل موومنٹ (بی این ایم) نا چیئرمین ڈاکٹر نسیم بلوچ جنیوا پریس کلب ئٹی پشتون تحفظ موومنٹ (پی ٹی ایم) نا اسہ مچی ئسیٹی تران کریسہ مظلوم آ قوم آتا اسٹ مننگ آ زور شاغا۔ پشتون سربر آتے فیصلہ کروک گام ہرفنگ نا پنت تریسہ پارے کہ انتظار نا وخت ایسر مسونے۔ داسہ آجوئی نا وخت ءِ۔ پشتون ایلم آک داسہ پین انتظار کپبو ۔ تینا آجوئی نا جنز ئنا پڑو ئے کبو ۔ بلوچ و سندھی ایلم تیتو دو پہ دو مبو انتئے کہ نن جتا جتا نہ بلکہ اسہ ظالم ئسے نا برخلاف جنگ کننگون۔
او سندھی و پشتون آتے آ مروک سوگو انگا بیدادی ئے مونا ہتِسہ پارے کہ نن اراتم اسکان دا ریاست آن تینا حق آتے پنڈِسا کرون ہرا ننے تینا دشمن تکّکِ ؟ نن اراتم اسکان دا وڑو نظام ئسینا بشخ مرون ہرا ننے شیڑتلیفنگ کن جوڑ کننگانے۔
او پاکستان نا مظلوم قوم آتا اسٹ انگا طاقت آن خُلینگ نا نشاندہی ئے کریسہ پارے کہ او خواہرہ کہ نن ونڈ مرین انتئے کہ اگہ نن اسٹ مسون تو اونا ظلم ئنا نظام تار تار مرو ۔ او ہمو دے آن خلیرہ ہراتم بلوچ و پشتون ہم گام مریسہ مُستی ہنور ۔ او ہمو دے آن خلیرہ ہراتم سندھی و ہزارہ ننتون اوار مریسہ انصاف نا خواست ئے کرور۔ او ہمو دے آن خُلیرہ ہراتم نن تینا حق آتے خواہسہ آجوئی نا ہیت ئے کریسہ تینا آجوئی ئے دوارہ دوئی کننگ نا ہیت ئے کرون۔ اگہ نن ونڈ مسون تو غلام مرون و اگہ نن اوار مسون تو دنیا نا ہچو طاقت ئس ننے توننگ کروف۔
پاکستان نا تاریخی آ چم بازی تے آ ہیت کریسہ پارے کہ پاکستان ہچ وختس ہم بلوچ، پشتون و سندھی تے آ بھروسہ کتنے و نئے کہ کرو۔ نن کھل کسر آتے ہُرانون انتخاب ، اسمبلی، عدالت ولہ ہر وار ننے دھوکہ سُم و دتر شولنگ آن سوا ہچ دو بتنے۔
چیئرمین بی این ایم پاکستان نا ریاست ئے مظلوم آ قوم آتا برخلاف نسل کشی نا پالیسی ئے کارمرز کننگ نا ذمہ وار پاریسہ پارے کہ پاکستان ننا کھل ئنا برخلاف اسہ طریقہ ئس کارمرز کرینے ۔ بیگوائی ، کوش، بے توار کننگ، ونڈ کننگ ولہ اینو جنیوا ٹی اوار مریسہ دا کلہو ئے ایتنہ کہ اونا منصوبہ بے سُہب مسونے۔
ریاست نا جبر آن زیمی مروک آتیتو اواری نا درشانی ئے کریسہ او پارے کہ اینو ای بیرہ اسہ بندغ ئسینا حیثیئت ئٹ نہ بلکہ ہر ہمو بلوچ لمہ نا دروشم ئٹ ہیت کننگوٹ ہرا تینا بیگواہ آ مار ئے پٹنگ ئٹی ءِ ۔ ہر ہمو پشتون باوہ نا توار نا دروشم ئٹ ہرا تینا کھسفنگوک آ مار ئکن ماتم تورینے و ہر ہمو سندھی خاہوت نا توار نا دروشم ئٹ ہرا تینا دوستخواہ تا بننگ کن خن کسر آٹے ۔ ای مزاحمت نا کوک و توار اُٹ۔
او بلوچستان نا مڈی تا لٹ ءُ پُل آ ہیت کریسہ پارے کہ بلوچستان بیرہ فوجی قوضہ نا گواچی اف معاشی استحصال نا ہم گواچی ارے۔ ننا خیسون، آہن، گیس و ایلو مڈیک لُٹنگ مننگ ئٹی ءُ۔ ننا قوم ئے غریبی بین و بیماری تا گواچی کننگانے۔ بلوچستان ئے اسہ نوآبادیاتی جائیداد ئسینا وڑ ئٹ ہُنِنگِک۔ اسہ ہندنو زمین ئسے ہرادے لُٹِنگِہ ولہ او جاگہ نا تولوک آتے ہچ وختس ہم شرف تننگ مف۔
او جہانی ایلمکو تا کڑدار آ تنقید کریسہ پارے کہ جہانی ایلمکو بندغی حق آتا ہیت ئے کیک ولہ پاکستان کن ارب آ ڈالر آتا کچ کمک راہی کیک۔ اسہ ہندنو فوج ئسے کن ہرا دا کمک آتے بلوچ و پشتون چُنا تے کھسفنگ کن کاریم ئٹی ہتیک۔ کس ئس پاکستان ئے 1971 نا زوراکی تے آ جوابدہ کتو و اینو او بلوچستان، خیبر پختونخواہ و سندھ ئٹی مروک نسل کشی ئے نظر انداز کننگو۔ ننے ہچو رعایت ئس بکار اف ننے برابری بکار ءِ ۔ ننے ہچو احسان ئس بکار اف ننے تینا حق آک بکار ءُ ننے کسے آ حکمرانی کروئی اف۔ ننے تینا زی آ حکمرانی کروئی ءِ۔
