بلوچ نیشنل موومنٹ (بی این ایم) نا چیئرمین ڈاکٹر نسیم بلوچ اسہ اہم سفارتی و سیاسی دورہ ئسے کن برطانیہ ٹی رسینگانے۔ دا دورہ نا وخت آ او برطانیہ نا پارلیمنٹ نا جوبلی روم ئٹی برطانیہ نا قانود جوڑ کروک آتیتو ملاقات کرِسہ بلوچستان نا جیڑہ نا بارَو ئٹ ہیت و گپ کرو۔ تینا دا دورہ نا وخت آ چیئرمین بی این ایم ایلو مرکزی مہبر آتیتو اوار جتا بلوچ قوم دوست جماعت آتا مہبر ، میڈیا نا بشخ و پنی آ بلوچ سربر آتیتو ملاقات کرو۔
بی این ایم نا پیشن نا سیکٹری نا رد ئٹ، بی این ایم برطانیہ نا پارلیمنٹ نا بشخ جان میکڈونل نا کمک ئٹ برطانیہ نا قانود جوڑ کروک آتیٹی بلوچستان نا حق ئٹی رائے جوڑ کرو۔ دا مسخت نا رد ئٹ 30 اپریل آ ویگ ئنا 2 بجہ آن 4 بجہ اسکان اسہ سیشن ئس اڈ تننگ مرو۔ ہراٹی بی این ایم نا مہبر آتیان بیدس زوراکی ئٹ بیگواہ مروک آ بندغ آتا خاہوت آک ہم بلوچستان ئٹی بندغی حق آتا سخت انگا لتاڑ آتے آ روشِنائی شاغور۔
بی این ایم نا جونیئر جوائنٹ سیکریٹری جنرل حسن دوست بلوچ پارے کہ چیئرمین ڈاکٹر نسیم بلوچ برطانیہ ٹی سر مسُنے و تینا شیڈول نا رد ئٹ مالاقات آتا سلسلہ ئے بناء کرینے۔ دا ملاقات آتیٹی سفارتی کاریم تے آن بیدس بلوچ قومی جنز ئتو تفوک ایلو جماعت و پنی آ مہبر آتیتو ہیت و گپ کننگ نا کوشست آک اوار ءُ۔ دا کاریم بلوچ نا آزاتی نا جنز ئنا اَیکٹِو آ جماعت آتا نیام ئٹی خڑکی ودی کننگ نا اسہ کوشست ئس ءِ ہرا شہید غلام محمد نا وڑ ئٹ سیاست و بی این ایم نا منشور نا اسہ اہم او بشخ ئس ءِ۔
بی این ایم نا ترجمان نا رد ئٹ چیئرمین ڈاکٹر نسیم بلوچ نا دا دورہ آن نہ بیرہ سفارتی پڑ آ سرسوبی نا اومیت ارے بلکن جتا بلوچ مہبر آتا نیام ئٹی حال حوال آتیٹی ہم سوگوی برو۔ ہندا سوب دا دورہ سیشن آن پد چیئرمین نا اسہ اہم او سیاسی دورہ ئس ءِ ہرانا بھرم آگ بھاز زیات مرور۔
