چیئرمین بی این ایم ڈاکٹر نسیم بلوچ اقوام متحدہ نا اجلاس نا موقعءِ اَسے ضمنیءُ تقریب سیئن بلوچستان ئٹی سی پیک نا تباہ کروکا اثراتاتءَ زی آ تینا خیالات آتے درشان کرے

جنیوا : بلوچ نیشنل موومنٹ نا چیرمین ڈاکٹر نسیم بلوچ 28 ستمبرءِ اقوام متحدہ نا اجلاس نا وختءَ اَسے جاپانی این جی او انٹرنیشنل کیرئیر سپورٹ نا پارغن اَسے ضمنیءُ تقریب سیئن خطاب کرے اجلاس نا صدارتءِ شون فوجیکی کننگ ئٹی اَس۔ دا تقریب ئٹی چین پاکستان اقتصادی راہداری ( سی پیک ) ھیت آتا بنیات اَس ، اموکہ چین نا ، ون بیلٹ اینڈ ون روڈ ، اَسے باز بلُو ملٹی بلین ڈالر نا منصوبہ اَسے۔ چیئرمین نسیم بلوچ تقریب ئٹی ساڑی انگاءَ بندغاتون ھیت و گپ کریسا پارے دا منصوبہ نا وجہ اَن بلوچستان و داٹی تُولوکءَ مخلوک نا زی آ انت انت تباہ کنءَ اثرات آک تمانءُ ھونا بارسٹ نن بہتر آگاہی تننگ کننگ کینءَ۔

ڈاکٹر نسیم بلوچ تقریب ئٹی بٹینگ اِنگ کِن پروگرامءِ اڈتروکاتا شکریہءِ ادا کننگ اَن تینا ھیت آتا بنداتءِ کرے ھو دا ھیت نا زی آ چمشانک اَس تِس کہ سی پیک نا منصوبہ اگہ کامیاب مَس تو چین بلوچ سر زمین نا زی آ قوضہ کیک۔

ھو بلوچ قوم نا اننا تاثرءِ ہم بندغاتءَ مونا تخاءَ کہ دا منصوبہ اَسے سامراجیءُ عمل اَسے اناڑن بلوچستان نا آبادی بدل مننگ کیک۔ مہذب انگاءَ دنیا اَن زوتَس دادے تورِنگ نا اپیل کننگ اَن پدا ہم بلوچ نا التجاءِ بِننگ ئٹی اففس ، بلوچاک اَسے بلُو تاریخیءُ چیلنج سِے تون مون پہ مونءُ و ھورتون تنیا مقابلہ کننگ ئٹیءُ۔

سی پیک منصوبہ گوادر پورٹ تون تفوکءِ ، دونکہ دا روٹ ہم بلوچستان نا مرغن انگا علاقہ تَن گدرینگیک۔ڈاکٹر نسیم بلوچ نا پاننگءِ ، چینی حکومت بلوچستان نا اہم انگا جاغتیٹی تینا پوجءِ ایسونءِ و گوادر نا کسر اَن اَسے منصوبہ سیٹی آبنائے ہرمز نا زی آ قوضہ کننگ خوائیک۔ بلوچ قوم تینا مخلوک و تینا ثقافت و بقا نا خاطر کِن دا منصوبہ نا خلاف مزاحمت کننگ ئٹیءِ۔

ڈاکٹر نسیم بلوچ دا ہم نشاندہیءِ کرے کہ پاکستان نا پوج گوادر ئٹی مقامی انگا آبادیءِ بے ہُورا کننگ کِن بازنگا چماتے کارمرز کننگ ئٹیءِ۔ چیئرمین دا ھیت نا زی آ ہم زور تِس و پارے کہ دنیاءِ دادے مننگ زلوریءِ کہ بلوچ تینا بقا نا جنگءِ کننگ کروکاتا دا خطہ ٹی اَسے وفادرءُ، باوقارءُ و اعتماد نا لائخ اَسے حصہ دار اَسے۔

ھو پارے بلوچ قوم تینا ذاتی پائدہ یا معاوضہ سینا اللنگ کن جنگ کننگ ئٹی اَف۔ بلوچ قومءِ چینءِ تینا مزاحمت نا طاقتءِ شان تننگ نا خاطر اَن عالمی برادری نا حمایت ، پختونخوا و گلگت بلتستان نا مخلوک نا تعاون و کمک نا زلورتءِ۔

ڈاکٹر نسیم بلوچ دا ھیت اَن نا امیتی ظاہر کرے کہ داسہ دہلی ٹی جی 20 پلس سربراہی اجلاس ئٹی ، انڈیا، مڈل ایسٹ، یورپ کوریڈور ، منصوبہ نا مننگ کِن اڈ تننگاسس، داٹی بلوچستان نا ہچ ھیت کننگتئو۔

ھو پارے جنگ ذدغہ علاقہ تیٹی سرمایہ کاری کننگ بین الاقوامی اصولاتا خلاف ورزیءِ ، ولے ہراتم طاقت و پیسہ نا ھیت بریک تو علمی قانودآک ہر وخت لگتمال کننگیرا۔

آخیر ئٹی ڈاکٹر نسیم بلوچ دا پرگرامءِ اڈ ترکاتے منتوار پارے کہ ھو بلوچستان نا حالیت نا زی آ ھیت کننگ کِن ننے پلیٹ فارم اَس تِسُر۔ ھو مونا اننا اُمیتءِ تخاءَ کہ عالمی برادری دا ھیت آتا زی آ توجُو ایتے و بلوچ مخلوک نا قربانی تننگاتے مننے۔