بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ سیاسی دورہ سیہا برطانیہءِ رسینگا۔ دا دورہ نا مسخت بین الاقوامی سطغءَ بلوچ قومی تحریک و بلوچستان ئٹی مروکا انسانی حقوق نا لگتمالیءِ پاش کننگ کِن ئس ۔تینا دورہ نا وختءِ ، ڈاکٹر نسیم بلوچ بی این ایم نا عہدیدار و کارکناک آتون ہم ملا۔ دا ملاقات آتے تنظیمی امور ، حکمت عملی و مستقبل نا لائحۂ عمل نا زی آ سوچ بچار کننگا۔ دا کاریم آک بی این ایم نا اندرونی انگا ڈھانچہءِ مضبوط کننگ و تحریکءِ زیات مون مُستی دننگ کِن باز اہمءُ۔
تینا دورہ نا وختءِ ڈاکٹر نسیم بلوچ برطانیہ نا ارکان پارلیمنٹ تون ہم ملاقات کرے ۔ دا ملاقات آتا مسخت برطانیہ نا حکومت و عوامی نمائندغاتے بلوچ قوم ئنا مسلئہ ہوفتہ جُہد نا بابت ئٹ سرپندی تننگ ئس۔ چیئرمین دا موقعءِ بلوچ آتے پیش مروکا مسلئہ ، انسانی حقوق نا خلاف ورزی ، سیاسی و معاشی حقوق کِن جُہد کننگ و بلوچ قومی آجوہی و تحریک نا بارسَٹ سرجمی ئٹ اِیت و گپ کرے۔
دارڑن بیدس ، ڈاکٹر نسیم بلوچ ایلو مظلوم انگا قوم آتا نمائندغاتون ہم ملاقات کرے ۔ دا ملاقات آتا مسخت بازنگا محکوم انگا قوم آتا نیام ئٹ یکجاہی و اِسٹ ایلو تون تعاون کننگ نا اِیت ہم کرے ارا کہ تینا آجوہی و حقوق آتِیکِن جُہد کننگ ئٹیءُ۔
ڈاکٹر نسیم بلوچ برطانیہ ٹی تُولوک بلوچ کمیونٹی تون ہم ملاقات کرے۔ داڑتون ھوار بی این ایم نا چیئرمین بلوچ نیشنل موومنٹ برطانیہ چیپٹر نا چیپٹر کونسل نا اجلاسءِ ہم اناء و کُل یونٹ آتا دورہءِ ہم کرے ، تنکہ پاٹی نا تنظیمی ڈھانچہءِ و کارکن آتا نیامءِ خُڑکی اتِنگ و زیات مضبوط مننگ کِن پائے۔
بی این ایم نا چیئرمین نا دا دورہ بین الاقوامی پلیٹ فارم نا زی آ نلوچ قومی تحریک نا حق ئٹ توار چِست کننگ و بلوچ قوم نا جُہدءِ آجوہی نا حمایت الِنگ کِن بُلو کارم اَسے۔ دا نہ کہ خالی بلوچ تحریک کِن اَسے اہمءُ قدم ئسے بلکِن ایلو بازنگا محکوم انگا قوم آتا نیام ئٹ اتحاد و یکجاہی اتنگ کِن باز زیات اہیمت تخِیک۔
