بلوچ نیشنل موومنٹ جرمنی نا نائب صدر صفیہ بلوچ نا پاننگءِ کہ آجوہی و انصاف نا جُہد ئٹی بلوچ زالبول کُل اَن مون ئٹیءُ۔ ہوفتہ ہمت و تینا مکسد کِن بغیرس خولیس اَن مونی اِننگ بلوچ سماجی و سیاسی تاریخءِ زندہ تخنگ کِن باز جوانو قدم اَسے۔
دا اِیت آتے ھو جرمنی نا شار ڈوئسبرگ ئٹی کرد زالبول آتا ایسوسی ایشن نا اَسے میلہ سیٹی خطاب کریسہ پارے ، ھو بلوچ نیشنل موومنٹ ( بی این ایم ) و بلوچ قوم نا نمائندہ نا حیثیت ئٹ ساڑی اَس۔
صفیہ بلوچ بلوچستان نا تحریک ئٹی ہمو اہم انگا زالبول نمائندغاتہ خدمت آتے ہوفتہ لائخی پارے ، ارفتیٹی بانک کریمہ ، ڈاکٹر ماہ رنگ بلوچ و سمی دین بلوچ ھوارءُ۔
ھو پارے ، دا لائخ انگا زالبول آک انصاف و آجوہی نا تینا جنگ ئٹی باز قربانی تِسونءُ۔ ہوفتہ بہادری و عزم نہ کہ بلوچ آتیکِن بلکِن بندغی حق آتِیکن کاریم کروکا بازا بندغ آتِیکن اَسے حوسلہ و امیت اَسے۔
ھو ساڑی آ بندغ آتَن بلوچ قومی تحریک آجوہی نا حمایت کننگ نا خواستءِ کریسہ پارے بلوچ نا وسائل و سرزمین نا زی آ پاکستان قوضہ کرینءِ و بلوچءِ تینا حق خودارادیت اَن محروم کرینءِ۔ اننا وجہ اَن بلوچ تینا آجوہیءِ واپس الِنگ کِن جُہد کننگ ئٹیءِ۔ آجوہی نا دا جُہدءِ مونی دننگ کِن بلوچ قومءِ ریاستءِ پاکستان جبرئٹ بیگوا کننگ و اِیلو وڑ وڑ نا ظالُمیت توُن مون پہ مون کرینءِ۔ بلوچ قوم نا نسل کشی مننگ ئٹیءِ دائنا برخلاف بلوچ قومءِ عالمی مدت و کمک کننگ نا سک زلورت ءِ۔
