مرگاپ نا سانحہ وے شک اسہ قومی او سانحہ ئس ءِ ولہ شہید آتا سدخئیک نہ بیرہ دشمن آتا چم آتے وے سہب کرینو بلکہ مون ہڑسوک آتے ہم پاش کرینو۔ دا سدخئیک جنز ئے پین سوگوی و جوانو کُنڈ ئس بشخانو۔
بلوچ نیشنل موومنٹ (بی این ایم) نا چیئرمین ڈاکٹر نسیم بلوچ مرگاپ نا شہید آتا رد ئٹ اسہ اڈ ہلوک مچی ئسیٹی تران کریسہ پارے کہ پاکستان نا غلامی ٹی گدرینگوک 77 سال ئٹی، مسہ پُشت ریاست نا زوراکی و کوزہ تون مون ترِسا کرینو۔ ہندا سدخئیک شعور تخوک، سوگو و نظریاتی ہمگرنچی تخوک کارکُن آتے ودی کیک۔
مرگاپ نا سانحہ بلوچ قومی جنز ئے اسہ پوسکنو تاغت ئس بشخانے، و دا راستی پاش مسونے کہ شہید آتا سدخئیک دشمن و اونا کمکار آتا ارادہ آتے مِش تا کرینو۔
بنجاہی مُچی آن بیدس شہید راشد مشکے (آواران ہنکین) و شہید انور ایڈوکیٹ (کیچ گوادر ہنکین) نا کنڈ آن ہم مرگاپ نا شہید آتا رد ئٹ مچی اڈ تننگا۔ دا مچی تیٹی بی این ایم نا چیئرمین ڈاکٹر نسیم بلوچ تون اوار اوار جونیئر وائس چیئرمین بابل لطیف ، سیکریٹری جنرل دلمراد بلوچ ، سیکریٹری اطلاعات و ثقافت قاضی داد محمد ریحان بنجاہی فنانس سیکٹری ناصر بلوچ ، بنجاہی کمیٹی نا بشخ چیف اسلم بلوچ، سی سی باسک ماہ گنج بلوچ ، تلار ناز و ذیشان منان تران کریر۔
تران کروک آک پاریر کہ منہ پِنی او بندغ جنز آن مون ہڑسیسہ بی این ڈی پی (بلوچستان نیشنل ڈیموکریٹک پارٹی) آن بار ا ِنگا پوسکن ودی مروک پارٹی تیتو اوار مسور۔ اسہ ہندنو جماعت ئس ہرا بی اے پی (بلوچستان عوامی پارٹی) نا وڑ ئٹ ننوئی نن جوڑ کننگ مس۔ شہید غلام محمد اوفتا برخلاف مُخ ئے تفیسہ بلوچ قومی جنز ئنا رکھ ئے کرے۔ اونا سدخئی و بے مثیل انگا جوزہ اونا سنگت آتے سودا بازی و مات کننگ آن رکھا۔ اوفتا است آتیان خُلیس ئے کشا و اوفتے جہد ئے برجاء تخننگ نا حوصلہ تِس۔
بی این ایم نا سربر آک گیشتر تران کریسہ پاریر کہ شہید آک نہ بیرہ پیشن نا دشمن نا برخلاف بلکہ تنظیم نا تہہ ٹی ہم ھمو بندغ آتا برخلاف توار ہرفیر
ہرا بلوچ نا قومی مفاد آتا برخلاف انگا کاریم تیٹی اوار اسور۔ شہید غلام محمد تینا جان ئنا پرواہ ئے وے کریسہ قوم ئے باور تس کہ او اسہ مون ہڑسنگ ئسے نا آخہ بلکہ کھل مون ہڑسوک آتا برخلاف جنز ئے سوگو کننگ ئٹی ءِ۔ اونا دا فیصلہ جنز و قوم ئنا مستقبل نا مُستی کسر ئے پاش کرے۔
او پاریر کہ شہید غلام محمد بی این ایم ئے ہندا سوب آن برجاء تخا کہ مون ہڑسوک آ بندغ آک بلوچ نا پجار ئے ایسر کننگ کن ریاست نا شڑط آتے آ کاریم کریرہ۔ طبیب اصغر و طبیب اکبر نا سودا آک ہندا مسخت نا رد ئٹ مسوسور، و اوفتا مقابلہ ٹی بی این ایم نا ساڑی مننگ بلوچ قومی پجار و بقاء نا رکھ ئنا نشانی اسک فدا احمد ئے شہید کریسہ مون ہڑسنگ نا کسر ئے صاف کننگ نا کوشست کننگا۔ ولہ غلام محمد فدا احمد نا فکر ئے دوئی کریسہ آجوئی نا جنز ئنا صاف کلہو ئے تس۔
تران کروک آک ہندا گڑا غا زور شاغار کہ ہرا قوم آک تینا آجوئی نا جنز ئنا بناء ئے کیرہ او اسہ دے ئس سرسہب مریرہ۔ دا اسہ وخت ہلوک و صبر خواہوک او سفر ئسے۔ ولہ دانا ایسر سرسہبی ءِ۔ سربر آک سدخہ مریرہ ولہ جنز ئنا سفر برجاء مریک۔ شہید آتا سدخئی نا سوب بلوچ جنز تینا مزل نا کنڈ آ ہِننگ ئٹی ءِ۔ و اوفتا فکر و فلسفہ ننا کسر شونی ئے کننگ ئٹی ءِ۔
مرگاپ نا شہید آتا یات ئٹی اڈ ہلوک مچی ٹی بی این ایم نا کاریم تا است جمی نا درشانی کننگا و پاننگا کہ بی این ایم ہر اسہ شعبہ ٹی دیمروی کریسہ بلوچ نا قومی آجوئی نا مزل ئے خڑک کننگ ئٹی ءِ و اسہ سوگو و ہر کنڈ آ تالان او کڑدار ئس سَر تِننگ ئٹی ءِ۔
