شال: بلوچ نیشنل موومنٹ نا بندغی حق آتا شعبہ پانک تینا مئی 2023 نا رپورٹ ءِ شنگ کرینے، ہراٹی بلوچستان ئٹی زوراکی نا بیگواہی تا بیم تروک حالیت ءِ مونا ہتنگانے۔
رپورٹ ئٹی پاننگانے کہ مئی ٹی پاکستانی لشکر 25 بندغ ءِ زوراکی ئٹ بیگواہ کرِسا مُست آن ہزار آتا کچ بیگواہ مروک بندغ آتا کچ ئٹ ودکی کرینے۔
رپورٹ ئٹی پاننگا کہ پاکستانی لشکر نا عقوبت خانہ تیان بیرہ 12 بندغ ءِ آجو کننگانے۔ زندان ئٹ اوفتیا ذہنی و جسمانی بےدادی کننگانے۔ دا زوراکی نا بیگواہی تا سوب و زیمی مروکا تیا دوبہ آتا ہچو وضاحت کننگتنے۔ زوراکی نا بیگواہی تا دا چرجوئی بلوچ الس ئنا جسمانی و ذہنی جانجوڑی ءِ باز نسخان تسنے۔
بیان ئٹ پاننگانے کہ پانک نجمہ بنت دلسر نا خودکشی نا پٹ ءُ پول کرینے، پانک ءِ وائس نوٹ دو بسنے ہراڑان پاش مریک کہ پاکستانی لشکر نا ایجنٹ ’نوربخش ولد عبدالخالق‘ اودے بلیک میل کرِسا خودکشی آ بیوس کرے۔
رپورٹ ئٹی پاننگا کہ بلوچ الس بے کچ تکلیف آتون مون تننگ ءِ، زالبول آتے بیم ترِسا اوفتیان ریاستی کمکار نا کاریم تیا بیوس کننگک۔ خلیس ئنا ماحول جوڑ کننگانے ہرا نا سوب آن بندغ آک دا تدینی تیا چُپ ءُ۔ بانک نجمہ بلوچ نا کیس بندغی حق آتا لتاڑ نا تباہ کن نتیجہ آتیان اسٹ ءِ۔او اسہ خوانندہ و متحرک ءُ مسڑ ئس اسک ہرا تینا چاگڑد نا چنا تے مفت تعلیم تننگ اس۔ ولے پاکستانی لشکر و اونا ایجنٹ آتا کنڈ آن اسہ وڑ بیم ئنا گواچی مننگ نا سوب آن او تینا ساہ ءِ ہلک۔
پانک جہانی برادری آن خواست کرینے کہ او بلوچستان نا بندغی بحران ءِ توننگ کن دمدستی گام ہرفر۔ پانک جہانی تنظیم و بندغی حق آتا ادارہ آتیا زور تخک کہ او پاکستان آن دا ڈوہداری تا ورندی ہلیر و دا زوراکی تے ایسر کننگ کن کاریم کیر۔
رپورٹ ئٹ پاننگا کہ بلوچستان ئٹی پاکستانی لشکر نا کارروائی تیٹ انسانی حق آتا سخت لتاڑ مسنے، ہرافتیٹ فوج ئنا موکل آن بیدس ہندی مخلوق نا ہن و بر آ رکھ خلنگ و ہڑدے نا فوجی کارروائیک اوار ءُ۔ ہزار آ بندغ آتے زوراکی ئٹ بیگواہ کننگانے، و باز آ بندغ آک فوجی بےدادی تا سوب آن کھسکنو۔ پاکستان آرمی جتا علاقہ آتیٹ سلاہ بند ٹولی ٹہفینے، ہرافتے ڈیتھ اسکواڈ نا پن تننگانے، ہرافتیٹ ڈوہدار آک بھرتی مریرہ و لشکر نا پاننگ آ بندغ آتے خلنگ دُزی کننگ و خون کننگ نا کاریم تیٹ اوار ءُ۔
داکان بیدس پانک خواست کرینے کہ بندغی حق آتا رکھ کروکا ٹولیک بلوچستان نا حالیت نا بابت ئٹ پٹ ءُ پول و بندغی حق آتیا رپورٹ اڈ تننگ کن رادہ کیر۔ پانک خواست کرینے کہ جہانی ادارہ آک بندغی حق آتے مونی دننگ نا کوشست، زیمی مروکا تا رکھ، و انصاف نا وکالت کروکا تنظیم آتا کمک ءِ کیر۔
ادارہ پانک بلوچستان نا حالیت نا سنگینی ءِ پاش کیک و جہانی برادری آ زور ایتک کہ او دا ہیت ءِ یخینی جوڑ کننگ کن اشتماعی وڑ ئٹ کاریم کیر تانکہ بندغی حق آتا شرف ، رکھ و اوفتا تیبہ نفاذ مرے۔
