نوآبادیاتی طاقت آک دنیا نا تہذیبی پدمنتگی ٹی بلُو بشخ اَس شاغانءُ۔ ایلو تا زمین و وسائل آتے قوضہ کننگ نا ہوفتا ہوس انسان آتے تہذیبی مون روی اَن چَپ شاغیسہ خطرناک انگا سلہ و بے پایانءُ پوج جوڑ کننگ نا کُنڈا درینءُ۔اینو نن داڑیکون کہ دنیا ٹی 12512 ایٹم بم ارے و دنیا نا ختم کننگ کِن خالی دہ ایٹم بم بسءِ۔ دُنکہ تنیا پاکستان پورا دنیاءِ تباہ کننگ کیک ہوڑتون 170 ایٹم بم ارے۔
بلوچستان ہم برطانوی سامراج و دنیا نا وسائل آتے قوضہ نا خواہشت نا شکار مَس۔ سن 1839 ئٹی تاجءِ برطانیہ تینا طاقتءِ اَسے کمزورءُ قوم سینا خلاف کارمرز کرے و ہودے سد آتا سال آتا گلامی ٹی بٹے۔وجہ خالی دا اسکاءَ کہ ھو قوم تینا ہمسایہ ملک نا خلاف تینا زمینءِ کارمرز کننگ کِن تیار اللوکہ۔
اینو سنہ 1839 نا ملک بلوچستان نا بارسٹ سوچ خلینءَ ننا ذہین ئٹی پُورا پسماندگی نا اَسے فوٹو اَس بریک ولے تاریخ نا دستاویز آک اَسول پین رنگءَ سیٹیءُ۔ بلوچستان نا بادشاہ لال شہید محراب خان 1816 ئٹی تینا تختءِ تُوس ۔ ھو بلوچستان نا 26 میکو خان بلوچ اسکاءَ ۔ بلوچ قبائل آک تینا بے مثال مننگ نا وجہ اَن تاریخ ئٹی اولی باقاعدہُ بلوچ ریاست نا بنیاتءِ تِخنگ ئٹی سرسوب مسہور۔ خطہ ٹی بلّہ طاقت آتن و کالونیل گِروچِک نا دور ئٹی بلوچ حکمران آک تینا حکومتءِ حکومتءِ بلوچی پاریرا ، یعنی کہ ریاستی اقتدار اعلی نا ضامن بلوچ مخلوک اَس۔ بلوچستانءِ انتظامی حوالہ ئٹ پنچ صوبہ ساراوان ، کچ گنداواہ ، جھلاوان ، لس و مکوران ئٹی بشخنگا ملک نا شیف نا نظم و نسق کِن ضلع آتے جوڑ کننگا۔ملک نا وزارت آتے سردار آتن بیدس خواندہ انگا بندغاتءَ حوالہ ئٹ تننگا۔ پشت در پشت حکمران مننگ نا وجہ اَن خان آک بلوچ آتیٹی سیاسی و انتظامی حالیت آتے پُو مننگ ئٹی اسہورا۔خان بلوچ خان مننگ تون ھوار سیاسی زانت ہم تخارا ہوفتا کاریم تَن مون روی نا جھلک آک خننگاکہ۔ دنیا ٹی ھو اَسے قومی ریاست اَس جوڑ مننگ نا پُورا سافءُ نظریہ تخارا ، ہمو ہوفتا شعر آتَن و ہوفتا وڈو ڈول آتَن ساف خننگاکءَ۔ اننا وجہ اَن ہوفتا مونی مننگ اَن بلوچستان نا باندات روژنا اسکاءَ۔ولے خطہ ٹی مروکاءَ بدلی تَن و انگریزاتا خطہ نا ملک آتیٹی بننگ نا وجہ اَن بلوچستانءِ مشکلاتیٹی شاغاسس۔ داڑے اَسے اِیت اَس ارے کہ دنیا نا ایلو بادشاہ آتا وڑ خان بلوچ نا دربار ہم محلاتی سازش آتا گڑھ اَس جوڑ مسوسس۔ پیشن ملک آتا وزیر آتا زی آ حکومت بلوچیءِ کمزور کننگ نا الزام ہم اسکاءَ۔ ولے حکومتءِ بلوچی نا تینا ملک نا خطرغاک دون الورا کہ ہوفتے خان بلوچ تورنگ کپروس یا ہوفتَن ھو مشکل ئٹی مروس۔
1834 ئٹی انگریزآک افغانستان نا شاہ شجاع نا سلطنتءِ واپس جوڑنگ کِن ہوفتا مدت کننگ نا پیسلہءِ کریر۔ افغانستان ہوفتِیکِن ایلو کالونیل طاقت آتَن و ہندوستان نا سرحدآتَن مُر تخنگ کِن جوان اَس و ہوڑِے سَر مننگ کِن بلوچستان نا حکمران آتا حمایت و بلوچ زمین نا زلورت اسکاءَ ۔ برطانیہ لیفٹیننٹ لیچءِ خان بلوچ نا کمکءِ اللنگ کِن کلاتءِ مون تِس ولے خان بلوچ افغانستان نا زی آ حملہ کننگ کِن تینا زمینءِ تننگ کِن تیار متہو۔ ھو خواہسکاءَ کہ شاہ شجاع انگریز آتا و پیشن نا کمک اَن بیدس تینا حکومتءِ الے۔ اننا وجہ اَن لیچ و خان بلوچ نا نیامءَ معاہدہ نا کوشست بےسوب مَس بلکِن بلوچستان ئٹی انگریزآتءِ بلوچ آتا نیمہ اَن سخت مزاحمت کننگ نا مون پہ مونی اَس تمماءَ۔
انگریز آک واپس سَلہ و خوشہی نا کوشست اَس کریر۔سر الیگزنڈر برنس معاہدہ کننگ کِن کلاتءِ بس تنکہ خان بلوچءِ شال ئٹی شاہ شجاع تون ملاقات کننگ کِن رضا مند کے۔ ہودے پاننگا سوسس کہ ھو افغانستان ئٹی شاہ شجاع نا حقءِ حاکمیءِ منے ہوڑتون شال ئٹی ملاقات کے و ہودے خراجءِ تحسین پیش کے۔ دا لوٹ بے عزتی اَس اسکاءَ و حکومتءِ بلوچی نا خود مختاری نا خلاف اسکاءَ ۔ خان بلوچ ساف ساف دا لوٹءِ منیتوے۔ انگریز آک حکومتءِ بلوچی نا دا پیسلہءِ غداری و بدنیتی سمجھا سور خان بلوچءِ انگریزآتا دشمن پاریر و ہودے سزا تننگ نا پیسلہءِ کریر۔
ھو داڑن موست بازنگا جنگ آتا ذریعہ ئٹ بلوچستان نا خود مختاری و آجوہی نا خلاف سازش کننگ ئٹی اسورا۔ داسہ ہوفتے نیمون اَس رسینگاسس کہ ھو خان بلوچ نا حکومتءِ ختم کیر و داڑے تینا کٹھ پتلیءُ حکمران اَس تُولیفِر۔سر تھامس ولشائر نا بریگیڈ کابل اَن واپس ہندوستان کِن ہننگ ئٹی اسکاءَ ، ہونا اَسے دستہءِ کلاتءِ حملہ کننگ نا حکم ملاسُس۔
انگریزآتا پوج 13 نومبرءِ کلاتءِ گھیرءَ ٹی الک۔ توپ آتون حملہ کننگا کلات نا دیوال آتے بیٹنگا۔ خان بلوچ 700 سپاہی تون ھوار دشمن تون مون پہ مون میدانءِ جنگ ئٹی شیف تمما۔ ھو باز بہادری ٹی جنگ کرے۔ بدن ئٹی 35 ٹپ بننگ اَن پد ہم ھو تینا زام اَن دشمنءِ وار کریسا اَس کہ ولشائر توپنگ ئٹ نشانہ الک نیہ فائر کرے۔ انون 13 نومبر 1839 اے ، نیم روچ نا وختءِ خان بلوچ محراب خان شہید مَس و ھونا دِتر اَن بلوچستان نا خیسون و خرون انگاءَ جھنڈا لال مَس سَک.
دا جنگ ئٹی عبدالکریم رئیسانی ، سردار ولی محمد شاھی زھی مینگل ، میر تاج محمد شاھی زھی مینگل ، میر محمد علی شاھی زھی مینگل ، میر فضل محمد ، سردار زمان خان پندرانی ، میر داد کریم چندوزھی شاہوانی ، میر شھباز خان نیچاری ، میر بدل خان نیچاری ، خان محمد دہوار ازبابِ شہر کلات ، میر نبی بخش جتوئی علاقہ نرمک کلات ، میا قیصر خان بزنجو ، میر شاہ دوست بزنجو ، محمد رضا وزیر خیل ، نور محمد شاھی ولد پولات سگار سر مستانی انچارج اسلحہ خانہ ، تاج محمد شاغاسی ، دیوان بچا مل وزیرِ مال ، دیوان کھیم چند ، دیوان آسرداس مکھی ہندو پنچائیت کلات و دافتن بیدس 400 پین بلوچ شہید مسہور۔
دا جنگ ئٹی بلوچ آک بہا تسہور و بلوچستان غلامی نا اَسے مُرغنو دور سیکِن شروع مَس۔ مگہ اینو 193 سال تدینگ اِنگ اَن پد ہم بلوچ لال شہید محراب خانِ عزت و احترام ئٹی یاد کیک کہ ھو اَسے کم آبادی والاءُ (بلوچستان نا آبادی ھو وختءِ خالی سیں لکُ پنجاہ ہزار اسکاءَ ) ہودے بہا کتو بہادری و دلیری ئٹ تینا جانءِ بلوچ نا آجوہی و وت واجہی کِن ندر کرے یقیناً بلوچ تاریخ ئٹی ہونا سنگت آک و ھونا پِن مدام یاد مروے۔
نن خواجہ ءِ شھمیری نا دے اٹ مُچ ءَ بلوچ شھمیراتے یات تخینا ءُ مُچ آ تا ستاشانی ءِ کینا کے اوفک تینا گلزمین نا ھپازت ءُ آجوئی کین تینا ساہ تے ندر کریر ۔
بلوچ نیشنل موومنٹ ( بی این ایم )
