دنیا نا بدل مروکا حالیت آتا تران کریسہ بی این ایم نا فارن ڈیپارٹمنٹ کوارڈینیٹر نیاز بلوچ پارٹی نا باسک آتا اسہ دیوان ئسیٹی پارے کہ داسہ حالیت آک ترندی ئٹ بدل مننگ ئٹی ءُ بلوچ قوم ئے دافتان سوھو مروئی ئے۔ امریکہ ٹی حکومت نا بدل مننگ تون اوار اونا پیشن نا پالیسی بدل مسونے ہرانا تیبہ دنیا آ اثر آک تمور۔امریکہ داسہ ہر ملک ئتو تینا تعلق آتے جوان کننگ نا کُنڈ آ ہِننگ ئٹی ئے و ایلوفتا جیڑہ آتان تینے مُر کننگ نا کوشست ئے کننگ ئٹی ئے ہمر کہ یوکرین نا معاملہ ٹی امریکہ روس ئتو مزاکرات کننگ ئٹی ئے ہراٹی یورپ نا ملک آتا و یوکرین نا مرضی اوار اف۔
او پارے کہ امریکہ کن اونا کاروبار نا معاملہ آک اہم ءُ و اونا مونا سلوک آ چین ئے ہرادے او توننگ خواہک ۔ ننا خطہ ٹی سی پیک و چین ئنا عرب ملک آتا اثر آک چیلنج ءُ ہندن روس ہم بھلو طاقت ئسے ہراڑان تینا نظر ئے مُر کروئی اف۔
او پارے کہ دنیا نا طاقت آک دنیا نا معاملہ آتے مَٹ کننگ نا طاقت تخِرہ اوفتا مفاد آتیتو بروکا وخت تفوک ئے چین گوادر ئٹی نیول بیس جوڑ کننگ خواہک ہراڑان دے کھیئلینگ نا طاقت آک خوئش افس۔
نیاز بلوچ زور شاغا کہ پیشن نا ملک آتیٹی رہینگوک آ بلوچ آک سیاسی عمل آتیٹی تینا اوڑدھی ئے گیشتر کیر و عرب ملک آتیٹی پاکستان کن است خواہی ، حمایت و کمک ئے توننگ نا کوشست ئے کیر ۔ پاکستان بندغی حق آتا لتاڑنگ نا سوب آن دنیا ٹی اسہ دوست وے کننگوکو ملک ئسے۔ ننے دنیا ئے دا باور کرفنگ خواہو کہ آزات بلوچستان دا خطہ ٹی اسہ پُر ایمن او ملک ئس مرو۔
او پارے کہ پاکستان نا تہہ نا ہَڑَدُڑ آتیٹی ہم ودُکی مسونے و اونا غٹ سیم آک غیر محفوظ مسونو ۔ گلگت بلتستان ، کشمیر ہندا کچ اسکان کہ پنجاب نا تہہ ٹی فوج آن نفرت نا درشانی مننگ ئٹی ئے۔ پاکستان غٹ جہانی بینک آتا وام دار ئے پاکستان تون اسہ ملک ئسینا بھلو کمپنی ئسینا کچ ہم مڈی سلیتنے بلوچستان نا مڈی تان بیرہ پنجاب ئے چلیفنگ نا کوشست مننگ ئٹی ئے ۔ پاکستان ئٹی اقتدار نا مرکز تارتار مسونے و بلوچستان آ بیرہ تینا فوج ئنا ذریعہ ئٹ قوضہ ئے برجاء تخانے۔
دا دیوان بی این ایم نا ادارہ تعلیم و تربیت( کیپسٹی بلڈنگ کونسل ) نا بھلنی ٹی مس ہرانا نا خواجہی ئے بی این ایم کیچ گوادر ھنکین کریر۔
