شال: بلوچ نیشنل موومنٹ نا جتا انگا ہند آتا کارندہ غاک بلوچستان نا جتا انگا علاقہ آتیٹی بلوچ راجی راہشون بابا خیر بخش مری نا کذیتی دے ئنا ردئٹ یاتگاری مجلس اڈ تسر۔
دا لڑ ئٹ اسہ یاتگاری تقریب ئسے نا کماشی بنجاہی جونیئر وائس چیئرمین بابل لطیف بلوچ کرے۔ تقریب نا بناء بلوچستان نا شہیداتا یات ئٹی اِرا منٹ نا چپی آن مس۔
اگہ نن بلوچاک راجی جہد آجوئی و بلوچ راجدپتری نا ہیت کینہ گڑا دا ہیت واضح مریک کہ بابا خیر بخش مری نا زکر آن بیدس بلوچ راجدپتر نا تاریخ و شابیت وےپوروْ ءِ ۔
بابل لطیف
خوشامدی آ ریفرنس آن خطاب کریسہ بنجاہی جونیئر وائس چیئرمین استاد بابل لطیف پارے کہ ہرا راج آک قوضہ گیر نا برخلاف جنگ ئنا پڑو تفسہ او راج آک تینا پجار ءِ گوہیسہ تباہ و برباد مریرہ۔ مرگ اسہ یخین ءُ راستوکی ئسے ہرادے ہر حال ئٹی بروئی ءِ ہندا خاطر نن تینا زند آتے راج ئنا پنا تعبیر کریسہ جہان نا تاریخ ئٹی تینے زندہ تخن۔
اود گیشتر پارے کہ اگہ نن بلوچاک راجی جہد آجوئی و بلوچ راجدپتری نا ہیت کینہ گڑا دا ہیت واضح مریک کہ بابا خیر بخش مری نا زکر آن بیدس بلوچ راجدپتر نا تاریخ و شابیت وےپوروْ ءِ ۔
اینو بابا مری نا فکر و فلسفہ ءِ کہ بلوچ شہیداک، سرمچار و جہدکار آک دا فکر و فلسفہ غا عمل کریسہ جنگ ءِ دا حد اسکان ہیسنو کہ ہراکان پدی چک خلنگ نا ہچو کسر ئس اف۔ تدوکا وخت ئٹی نن ویتنام نا جنگ، الجزائر نا جنگ، بنگلہ دیش نا جنگ ئنا باروٹ خوانانہ یا اوفتا حوالہ تسُنہ ولے اینو بلوچستان ئٹ ہمو تدینیک مننگ ءُ و ننا تعلق ہمو راج آنے ہرا دا غٹ تدینی تے تینا خن تیٹ خننگ ءِ ۔ اینو نئے بلوچ نا ننگ رکھ ئٹی ءِ ، نئے مڈی ، نئے بلوچ باتیک و نئے کہ بلوچ دختر۔ پگہ کہ نن دا آجوئی نا جنگ ءِ اسہ مزل اسیا سر کننگ ٹی سرسہب مرون گڑا جہان نا ایلو بیوس آ راج آک بطور مثیل بلوچ راج نا ندری و فکر نا حوالہ ترور۔
استاد بابل لطیف تینا ہیت آ تا آخر ئٹ پارے کہ دنیا ٹی دونو کس ئس اف کہ اود مکمل مرے و ہچ پنی ءُ رہبر ئس ابید تنقید آن پورو مفک۔ ہندن بابا خیربخش نا زی آ ہم تنقید کننگ مریک کہ اوراں ہم ردی مسونے و اسہ انسان ئسینہ حیثیت ئٹ اوٹی ہم کمی مرو و اونا فکر و اونا قربانیک مدام ننا رہشونی نا فرضءِ پورو کرور۔
مونی بی این ایم نا سینٹرل کمیٹی باسک چیف اسلم و حمید تینہ ہیت آ تیٹی ہاریر کہ بلوچ نا آجوئی نا جہد ئٹی تینا جان آتے ندر کروکا کُل شہیداک بلوچ نا ہیروک ءُ کہ اوفک تینا جان و ساہ تن ندر کریسہ بلوچءِ قربانی نا فلسفہءِ تسُر۔ ہندا وڑ ئٹ ننا راجی رہشون بابا مری نا سیاسی سوچ و توفکی جہد بلوچ راجءِ اسہ پوسکونو فکر ئسے آن چائنداری کرے۔
ہیت کروکاک مونی پاریر کہ راجی جہد آ تیٹی پارٹی و تنظیم آتا کردار بھاز المی مریک کہ انتئیکہ دنیا ٹی اخس راجی جہداک تینا منزل آ سر مسونو اوفتہ سوبمند مننگ نا تاج پارٹی نا زی آ کائک انتئیکہ بندغ چُٹک ولے بندغ نا نظریہ و فکرءِ مونا دروک آ پارٹی و تنظیم آتا بلو کردار اس مریک۔
ہندا رد ئٹ ریفرنس ئٹی بی این ایم نا ویلفئیر سیکریٹری ماسٹر اقبال و سینٹرل کمیٹی باسک جنیف و ایلو سنگتاک اوار مسُر۔ ریفرنس ئٹی ہیت کریسہ مرکزی رہبراک پاریر کہ بابا خیر بخش اسہ عالم و مُر ہروکو سیاستدان اس اسک۔
بابا خیر بخش تینا تیوغہ زندءِ بلوچ نا آجوئی و پگ ئکن ندر کرے اینو اود تینا راج ئٹی جسمانی حوال ئٹ ساڑی اف ولے اونا پختہ ئنگا نظریہ ،سیاسی و مزاحمتی فکر ہرچ بلوچ فرزند نا ذہن ئٹی ساڑیءِ۔ بلوچ نا آجوئی کن اذیت سگا و تینا ڈیھ آن مُر بدری نا زندگی ہم تیر کرے و آخری ساہ اسکاں تینا راجی ہیت ئنا زی آ سلوک اسک۔
ہندا رد ئٹ اسہ پین یاتگاری ءُ پروگرام ئسیٹی نرینہ باسک آتا ابید ذالبول باسک آتا بلو کچ اس اوار اس۔ ہندا ریفرینس ئٹی بی این ایم نا سینئیرباسک کمبر ہم اوار اسک کہ بابا مری نا زندگی،فلسفہ و سیاست نا بابت آ خف تروکاتے سرپدی تس و پارے کہ بابا خیر بخش نا کردار بلوچ نا آجوئی جہد ننا رہشونیءِ کرو۔
تصویر:
