بلوچ نیشنل موومنٹ (بی این ایم) جنوبی کوریا چیپٹر بسان بف اسکوائر ئٹی اَسے احتجاجی مظاہرہ اِس اڈ تننگا ءَ ، ہراٹی پاکستانی ریاست نا کُنڈ اَن بلوچ قوم نا زی آ بندغی حق آتے لگتمالی نا سک مذمت کننگا ءَ۔
احتجاجی مظاہرہ نا وختءِ جہی مخلوکءِ سدآتا کچ ئٹ پمفلٹ بشخنگا ہمو ٹی بلوچ قوم نا بدحالیءِ مونءِ اتنگاسس۔ تینا غم و غصہ نا بارسٹ پاریسہ مظاہرین بلوچستان ئٹی بہیمانہ ظلم کننگ نا مذمتءِ کریر ، اراٹی جبرئٹ بیگواہی و بندغی حق أتا خلاف ورزی و ایلو جرم آتا خلاف سک نعرہ بازی کننگا۔
مُچی اَن خطاب کریسہ بختاور بلوچ پاکستانی پوج نا قوضہ نا خلاف بلوچ قوم نا مروکا جُہدءِ مُچی نا مون ءِ تخا ءَ۔کورین زبان ئٹی کروکا تینا خطاب ئٹی بلوچستان نا زی آ قوضہ ءِ سرجمی ئٹ بیان کرے، ھو پارے پاکستان نا پوج بلوچستان نا زی آ ہفتادو پنچ سال اَن قوضہ کرین ءِ دا اِیت آتین ننے جوہان سماءِ ، قوضہ نا اولی دے اَن الیس اینو اِسکان بلوچ قوم بدحالی نا زندءِ تدیفسہءِ۔ پاکستان نا پوج نا دُو اَن بلوچ نا نسل کشی افسوسناکءُ اِیت اَسے۔بلوچستان ئٹی ظالُم انگا پاکستان نا پوج نیاڑی ، چونا ، خوانندہ ، دانشور ، انجینئر ، ڈاکٹر سیاسی باسک و لیڈر آتون ھوار بلوچ شوہان و ہزارآتا کچ ئٹ شاری آ مخلوکءِ کسفینءِ و ہزارآتا کچ ئٹ اینو اِسکان بیگوا کرینءِ۔
جہی آمخلوک بلوچ مسلئہ ءِ اَسے بندغی و قومی حق اَس منیسہ مظاہرین آتون یکجہتی کریر۔ مظاہرین اَن حفصہ بلوچ ، سمیر بلوچ ، آغا فیض بلوچ و ایلو مقررین آک بلوچستان نا مخلوک نا زی آ پاکستانی فورسزآتا پارغن بندغی حق آتا خلاف ورزی کننگ نا سکی ئٹ مذمت کریر۔
احتجاج نا ایسر ئٹ ساڑی مروکا باسک آک بف اسکوائر نا کُنڈا مارچ کریر ، و بلوچ قوم تون مروکا ظلم و بے انصافی نا خلاف سک نعرہ بازی کریر۔
