مشکے: بلوچ قوم ہمو قوم آتیان ءِ ہرا زوراکی تا برخلاف کاٹم ئے شیف کتنو و غلامی قبول کتنو، اینو ہم پیشن ڈیہہ ئٹ مرے بلوچ گلزمین، بلوچ قوم ہر وڑ ئنا ہڑاند آتے سگھنگ ءِ و تینا آزادی نا جہد ئے مونی دننگ ءِ۔ 11 اگست یوم تجدید عہد نا رد ئٹ بی این ایم مشکے نا کنڈ آن اڈ تروک اسہ مجلس ئسے تون تران کرسا بی این ایم نا ہندی مقامی سروک آک تینا خیال آتا درشانی کریر۔
مجلس ئٹ تران کرسا استاد مھران بلوچ پارے کہ بلوچستان اسہ آزاد و خودمختار ڈیہہ ئس اس۔ بلوچ آتا بھلاک تینا دتر ئٹ بلوچستان نا رکھ ئے کرینو۔ داٹی ہچو شک اف کہ بلوچستان ڈنی کوزہ گیر آتا جلہو تا گواچی مسنے ولے بلوچ قوم ڈنی جلہوکار تا غلامی ئے قبول کتنے و تینا قومی آزادی نا رکھ کن ساندہ تیار مسنے۔
او ودیک پارے کہ ہرا وخت ارٹمیکو جنگ عظیم آن گڈ زیر دست مروک قوم آک انگریز نا برخلاف ہر کنڈ آن مزاحمت کریر تو او دا علاقہ آن پیشتمنگ آ بیوس مس۔ انگریز نا پیشتمنگ آن پد 11 اگست 1947 آ بلوچستان نا آجوئی نا بحال مس و بلوچ اسہ وار دوارہ تینا سرزمین نا خواجہ و مس۔ آزادی آن گڈ او پوسکنا دود آتا رد ئٹ گچین کاری تے اڈ تسر۔ بلوچستان جہان تون ہم کوپہ مونی ہننگ کن تیار اس۔ اونا اِرا پارلیمان اسر، ایوان بالا و ایوان زیرین۔ ولے انگریز آتے دا علاقہ ٹی تینا مفاد آتے رکھنگ کن اسہ چوکیدار ئسے نا خواست اس، او ہندوستان ئے اِرا بشخ ئٹی ونڈ کریر و پاکستان نا پن ئٹ اسہ پوسکنع ڈیہہ ئس جوڑ کریر۔ انگریز آتا جہانی مفاد آتیکن بلوچستان نا آجوئی اسہ بھلو ہڑاند ئس اس۔ او اندھریکا پاکستان ئے کمک کریر و بلوچستان ئے غلام جوڑ کریر۔
اونا پاننگ اس کہ ہرا وخت انگریز آک بلوچستان نا خان میر محراب خان ئے پاریر کہ نی ننا شیف آ مر ولے محراب خان انگریز آتا غلامی ئے قبول کتو اندا سوب آن انگریز آک بلوچستان آ لشکر کشی کریر و 1839 آ بلوچستان آ تاغت نا زور آ کوزہ کریر۔ دا کوزہ نا برخلاف بلوچ آک وطن نا رکھ ئنا کسر ئے ہرفیر و انگریز آتا برخلاف جنگ بش کرسا اوفتے بلوچ گلزمین آ سکون ئٹ تولنگ کن الیتور، اندا جکہو تا بھرم ٹی انگریز آتیکن ویل ودی مس۔
بی این ایم نا مسکوہی سی سی ممبر ڈاکٹر شئے تران کرسا پارے کہ اینو ننا دا اشتماع ٹی ہمو بندغ آک ہم اوار ءُ ہرافتا اُرا تینا اسہ اسہ شہید ارے، ہمو شہید آک ہرا تینا قوم ئنا آخبت کن گڑتی کریر تینا ساہ تے ندر کریر۔ اوفتا نظریہ آک بڑز اسر اندا سوب آن اینو نن ہم اوفتا پیروکار اُن۔
او پارے کہ 11 اگست ہمو دے اس ہرا دے بلوچ قوم ئے انگریز آتا سد سالہ غلامی آن آجوئی رسینگا۔ زوراک و توسیع پسند قوم آک ساندہ ایلو قوم آتا استحصال کن اوفتیا جلہو کیرہ، او بلوچ آتیا لشکرکشی کرے ولے بلوچ آک تینا کاٹم تے ندر کریر ولے تینا عزت و سرزمین آن دو کشتور۔ اندن کہ بَنگُنن کہ علی محمد مینگل، نورا مینگل یا حمل جیئند و بلوچ خان، دا ہمو شخصیت آک اسر کہ کوزہ گیر نا برخلاف جنگ کریر۔ انگریز سد سال اسکان بلوچستان آ کوزہ کرے ولے ایسر ئٹ بلوچ اوڑان تینا ڈغار ئے آجو کرے اندا سوب آن دا دے ئے بلوچ آک بھاز اہمیت ایترہ۔
