بلوچ سٹودنٹس آرگنائزیشن (آزاد) نا مسکوہی چیئرمین زاہد بلوچ و جونیئر جوائنٹ سیکریٹری اسد بلوچ یانزدہ سال آن بیگواہ ءُ۔ چیئرمین زاہد بلوچ نا خاہوت ءِ اجتماعی سزا نا گواچی کننگ مننگ ئٹی ءِ۔ جہانی ادارہ آتے بندغی حق آتا سخت انگا لتاڑنگ نا برخلاف ننتو سلنگ خواہِک۔
دا خیال آتا درشانی ءِ بی این ایم نا جارکش بی ایس او آزاد نا مسکوہی چیئرمین زاہد بلوچ و جونیئر جوائنٹ سیکریٹری اسد بلوچ نا یانزدہ سال آن بیگواہی و زوت ئٹ زاہد بلوچ نا خاہوت تون مروک است ہسون کروک تدینی آ تینا بیان ئٹی کرے۔
جارکش پارے کہ زاہد بلوچ ءِ پاکستان نا فوج 18 مارچ 2014 آ زوراکی ئٹ بیگواہ کریسہ تینا ڈھکوک زندان آتیٹی تخانے۔ دا کاروائی ریاست نا سخت انگا دہشت گردی و اجتماعی سزا نا چرجوئی نا بشخ ءِ ہرانا بلوچ الس کیہی سال آتیان گواچی ءِ۔
جارکش شاہ جہان بلوچ نا شہادت آ گپ کریسہ پارے کہ دا اجتماعی سزا نا گندہ انگا مثیل ءِ۔ اودے 14 مارچ آ نال ئٹی پاکستان نا جوڑ کروک ڈیتھ اسکواڈ نا دو آن وے رحمی ئٹ کھسفِفِنگا۔ او تینا اُرا نا اسٹ انگا سنبھالوک اسک و تینا عیلاقہ ٹی تینا جند ئنا پوریا ٹی آختہ اسک۔
جارکش پارے کہ اونا چنکا ایلم سلیم بابل بی این ایم نا اسہ کاریمی او باسک ئسے، اودے تینا عیلاقہ ءِ النگ ءَ بیوس کرینو و او داسہ برطانیہ ٹی باہوٹ مننگ کن کسر پٹنگ ءِ ، دنیا ءِ پام تننگ خواہک کہ دا ظلم و زوراکی و ریاست نا پالیسی تا دو آن خاہوت بے اُرا و اسٹ ایلو آن جتا کننگ مننگ ئٹی ءِ۔
زوراکی ئٹ بیگواہ بلوچ خوانندہ سربر آتا آجوئی کن بھلو کچ ئسے ئٹ برانز و بھوک ہڑتال کننگا۔ ہرا اوفتا آجوئی نا وعدہ آتے آ ایسر مسور ولہ او وعدہ آتے آ اینو اسکا عمل کننگ متو۔ اینو او یانزدہ سال آن پاکستان نا ڈھکوک زندان آتیٹی بیدادی سگھنگ ءُ۔ اوفتے انصاف تننگ و زوراکی نا بیگواہی آن آجو کننگ نا جاگہ غا زاہد بلوچ نا خاہوت نا اسٹ انگا سنبھالوکا ایلم شاہ جہان ءِ کھسفنگا ہرا اونا خاہوت و بلوچ قوم آ برجا انگا بیدادی و ظلم و زوراکی نا سوگو آ نشانی ءِ۔
نن جہانی ادارہ آتے آن خواست کینہ کہ شاہ جہان نا کوش و زاہد بلوچ و اسد بلوچ نا یانزدہ سال آن بیگواہی تون اوار پین ہزار آ بیگواہی تا پٹ ءَ پول کننگ مرے و پاکستان ءِ اونا دا ظلم و بیدادی تے آن جوابدہ کننگ مرے۔ جہانی ایلمکو تے بندغی حق آتا سخت انگا لتاڑنگ نا برخلاف ننتو اوار سلنگ خواہک۔
