شال: بلوچ نیشنل موومنٹ نا ترجمان تینا شینک کروک بیان ئٹ پارٹی نا برطانیہ زون ئنا باسک محسن بلوچ نا اُراغا پاکستانی لشکر نا کنڈ آن چھاپہ نا سخت مذمت کریسہ دادے اشتماعی سزا پارے، و اونا ودیک پاننگ ئس کہ سیاسی باسک آتا اُرا تیا چھاپہ خلنگ، اوفتا خاہوت آتے خلیفنگ و سیاسی باسک آتا بارو ئٹ حوال ہلنگ تون اوار اوفتے اوفتا بندغ آتا سرینڈر مننگ و تینا جہد آن دو کشنگ نا پاننگ، دننگا تدینیک بلوچ قومی تحریک تون تفوک نظریاتی باسک آتے نزور کننگ کپسہ۔
اونا ودیک پاننگ ئس کہ بلوچستان نا ضلع کیچ ئنا علاقہ ھوشاپ ئٹی یک شنبے نا دے پاکستانی لشکر پارٹی نا باسک محسن بلوچ نا اُراغا چھاپہ خلیسہ اونا باوہ حسن بلوچ ءِ ہراساں کرینے و اُرا نا زالبول و چنا تے خلیفینے و تڑی تسنے و پارٹی باسک ئنا باوہ ءِ بیگواہ کننگ نا کوشست ہم کرینے ہرادے ہندی مخلوق نا برانز بے سہب کرینے۔ ریاستی فورسز آک پارٹی باسک ئنا باوہ آن اونا مار ئنا بارو ئٹ سر سوج کرینو و اودے تڑی تسنو کہ اگہ پنچ دے ٹی اونا مار ریاستی فورسز آتا مونا پیش متو تو دوارہ بریسہ اودے ہفون درون۔
اونا پاننگ ئس کہ ریاست پاکستان و اونا لشکر، بلوچ سیاسی باسک آتے تکلیف تننگ کن نہ یکہ اوفتا خاہوت آتے تنک کیک بلکن باز اندنو تدینی مونا بسنے ہراڑے سیاسی باسک آتا اُرا تے ہشنگ، اُرا تیٹ ساڑی زالبول و چنا تیتون اوار اُرا تا ایلو نرینہ آتے زوراکی نا بیگواہی تا گواچی کننگ اوفتیا تشدد کننگ و شہید کننگ نا تدینیک ہم مونا بسنو۔ بلوچ نیشنل موومنٹ دا عمل ءِ اشتماعی سزا پوہ مریک و دا انسانیت سوز عمل نا برخلاف غٹ پلیٹ فارم آ تیا توار بڑز کریسہ بننگ ءِ۔
