شال:بی این ایم تینا کل چیپٹرآتے ،پیشن نا ڈیپارٹمنٹاتے ، انسانی حقاتا ڈیپارٹمنٹ و انفارمیشن ڈیپارٹمنٹ اے ہدایت تسونے و پارینے کہ ھو تینا مینڈیٹ نا ذمہ واریتے پورا کے و ریاست اے پاکستان نا تازہ انگا جبر نا لہرٹی جبری بےگواہی تا خلاف منظمو پروگرام اڈ ایتر و دا ظلم و جبر اے دنیا نا مونا پاش کنگ کِن احتجاجی عمل آتے تیز کیر۔
بی این ایم نا دا مہم اَن میڈیا ٹی آگاہی ایتِر۔پیشن نا ملکاتیٹی سفارتی ملاکاتاتے اے مونا دیر و دا کل کاریمتے مضبوط کننگ کن انفارمیشن ڈیپارٹمنٹ نا مدت و کمک آٹی دنیائے آگاہی ایتِر۔
بی این ایم نا ترجمان تینا بیان آٹی پارے تدوکا سال نا اولیکو تُو آٹی پاکستان نا فوج و اوڑتون تفوکا ادارغاک بلوچستان اَٹی جبروظلم اے زیات کرین او۔پاکستان نا پارلیمانی پاٹیک ہراتم اپوزیشن اَٹی مریرا بلوچستان نا زیھا جبر اے من ایرا۔ ہرا وختا دا پاٹیک حکومت نا حصہ مریرا جبرھٹ بےگواہی و پوج کشی اَٹ کمی اَن بیدس زیادتی خنگ اِک۔زرداری نا صدارت اَن الیس شہباز شریف نا وزیر اعظم مننگ اسکان بلوچستان اَٹی ریاست نا جبر اَٹ ہچھو کمی اَس بتن اے بلکہ دے پہ دے زیادتیک ودینگان او۔دا ہمو پاٹیکو ہرا کہ بلوچستان نا مسلۂ اے ڈکٹیٹر پرویز مشرف نا پِن اے خلکور او تینے داڑن بری الزمہ کریسور۔ولے مشرف نا حکومت خلاس مننگ اَن پدھم بلوچستان آٹی ظلم کم متویسس۔پاکستان نا کل پالیمانی سیاسی پاٹیک بلوچستان نا زیہا ظلم کننگ اَٹی برابر شریک جرم مسہونو۔انون بلوچ پارلیمانی سیاسی اننگا پاٹیک ھم بلوچ دشمنی اَٹ ھوار مسہونو اوفتا کردار ھم صاف متن اے۔
ترجمان پارے 3 فروری اے ناشناس کالونی، گیشکوری ٹاون، شال اَن محمد رحیم زھری، ھونا لمہ بس خاتون، ھونا ظہیفہ رشیدہ زھری او ھونا اِیرا چُنکا چُناک دعا زھری و یحیی زھری اے پاکستان نا پوج گرفتار کننگ اَن پد بیگوا کرے۔ھونا لمہ و اِیلو چُنکا چُناتے چار دے اَن پد ھونا ظہیفہ اے 11دے اسکان بیگوا و ٹارچر سیل تیٹی سزا تینگ اَن پد ایلہ کنگا انون محمد رحیم داسکان بےگوا اے۔
ھو پارے رحیم زھری نا خاندان اے وختی ھم پاکستان نا پوج نشانہ کریسوس دا خاندان اَٹی رحیم زھری اَن بیدس لیاقت بلوچ و زکریا بلوچ اے ھم جبرہٹ بیگوا کننگان اے ۔داڑن بیدس تابش وسیم و ظہور زھری اے پاکستان نا پوج کسفینے۔ماما شریف اے قاتلانہ حملہ کننگا داڑن اودے شش گولی لگان اے۔
ترجمان پارے بلوچ جہد آجوہی تون ھوار بندغاک و افتا خاندان اے پاکستان نا پوج مُچہی نا سزا معنا (اجتماہی سزا) نا گواچی کریسا غیر انسانی پالیسی تا شکار کرین اے۔ واوفتا چُنا و زالبول نا زی اے ھم ظلم کریسا اے۔باز اَس پاکستان نا پوج اتون جنگ کریسا شہید مسون ھو یا ایمن او سیاسی کارکنات اے جبرہٹ بےگوا کننگان اے یا اوفتے ٹارچر سیل تیٹ کسفنگان اے اوفتا جونتے خسنگان اے۔شہید کننگ ،کسفنگ یا جبرہٹ بیگوا کننگ اَن بیدس پاکستان نا پوج بلوچ آجوہی پسند اننگا بلوچاتا خاندانتے ھم نشانہ کرین اے۔
’’ زمان بلوچ نا باوا شہید سپاھان بلوچ بی این ایم نا ممبرس اَسکا ھو قومی آجوہی نا جہد اَٹ ھوار اَس۔ھونا مار زمان اے 10 فروری اے پاکستان نا پوج گرفتاری اَن پد بیگوا کرے داڑن مُوست 9 جون 2020 اَٹی پاکستان نا پوج ھودے گرفتار کننگ اَن پد جبرہٹ بیگوا کرے و سختو سزا تننگ اَن پد اودے ایلہ کرے۔10 فروری اے اسوار پدا جبرہٹ بیگوا کننگا۔ھونا خاندان والاک دا جبری اننگا بیگواہی نا خلاف احتجاج کریر پاکستان نا پوج ھونا ھوراغا چھاپہ خلک ھونا ھوراوالات اے تشدد کرے۔3فروری ھا پاکستان نا عدالت نا حکم اَٹ بری کننگ اَن پد عبدالحفیظ زھری اے جیل نا مون اَن پاکستان نا ایجنسی والاک اَسے وار پدا اغوا کننگ نا کوشست کریر خاندان نا مزاحمت اَن اوفتے فائرنگ کننگیک۔دا مزاحمت اَن اوفتا اغوا کننگ نا کوشست بے سوب مریک ھونا خاندان نا ایلو بنداغاتا زندگی داسا ھم خطرا ٹی اے۔‘‘
ترجمان پارے پیشن نا ملک آتیٹ بی این ایم چیپٹرز ، بنجاہی عہدیدارک ، سینٹرل کمیٹی نا ممبراک و ڈیپارٹمنٹس نا ذمہ وارک بلوچستان اَٹی مروکا ظلم و زیادتی نا حوالہ ٹی مہم چلائیفر یعنی توار چست کیر۔
دا مہم ٹی دنیا اے بلوچستان نا جہد آجوہی نا حمایت کننگ کِن تینا کوشستاتے تیز کروھی اے انتے کہ بلوچستان نا آجوہی اَن بیدس بلوچ قوم انسانی وقار و انسانی حقاتن محروم مریک۔اننا خاتِر اَن نن بلوچستان نا آجوہی نا خوائینگ اے ہر وخت نا وڑ تینا اولیکو و بنجاہی یعنی (مرکزی) مطالبہ تیٹی ھوار کین۔
