شال : 11 اگستءِ برطانیہ نا قوضہ اَن بلوچستان نا آجوہی نا دے نا مناسبت ھٹ بی این ایم نا پارغن اَن بازنگا تقریبات آتءَ اعلان کننگان ءِ دا ہمو وعدہ نا پُوسکُن کننگ نا دے ءِ کہ نن تینا آجوہیءِ واپس الینءَ۔
دا حوالہ ھٹ بی این ایم نا ترجمان پارے 11 اگست 1947ء اے بلوچستانءِ برطانیہ نا قوضہ اَن آجوہی رسینگاسوس۔ دونکہ بلوچستان ہچو وختس ہندوستان نا بشخ متنءِ بلکہ اَسے جِتاوُ قومیءُ ریاست اَس مسونءِ۔ 13 نومبر 1839ء اے انگریز پوج بلوچستانءِ لشکر کشی کرے و بلوچستان نا بادشاہ شہید محراب خانءِ شہید کرے بلوچستان نا وت واجہی ءِ زورھٹ اَلک داڑن پد سازش و سازشیءَ معاہدءَ تِیٹ بلوچستان نا روٹکیءَ علاقہءِ اَلک نام نہادانگا برٹش بلوچستان نا بنیاتءِ تخا ءَ و ہودے دہلی ٹی انگریز سرکار نا اختیارت ھٹی تِس۔
ھو پارے بلوچستان نا سیاسی و قبائلی کماشاک ہچ ءُ وختس انگریز نا بلونی ءِ مَنتہور داڑن بیدس ھو تینا وت واجہیءِ الینگ کِن و ہندوستان نا تقسیم مننگ نا وختءِ برٹش بلوچستان ھٹی ھوار مروکا تینا تاریخیءَ زمینءِ واپس اَلینگ کِن سفارتی، سیاسی و آئینی کوشست کرینءُ۔11 اگست نا دےءَ بلوچستان نا دارلحکومت کلات ھٹی بلوچستان نا جھنڈا خلینگا و بلوچستان نا آجوہی نا اعلان کننگا۔ ہمو دے ءِ بلوچ قومی ریاست نا مون روی شروع مَس و قومی ترقی نا خاکہ پیش کننگا ہوٹی بلوچستانءِ اَسے پُوسکنو جمہوریءُ ریاست اَس جوڑنگ نا ارادہ اَس کریسور۔
ترجمان پارے انگریز نا قوضہ اَن آجوہی الینگ اَن پد بلوچستان ھٹی عام انگا ووٹ آتا اعلان کننگا ءَ ہوٹی ترقی پسند بلوچ سیاسی پاٹی کلات اسٹیٹ نیشنل پاٹی بلُو ووٹ سیٹی مونءِ بَس۔بلوچستان نا ایوان ءِ زیرین و ایوانءِ بالا ھٹی ہراتم پاکستان تون ھوار مننگ نا معاملہ ارفنگا تو ہوڑے بلوچ قوم نا سروکاک بلُو کَچ سیٹی دا تجویز ءِ منتہور و تینا آجوہی و خودمختاری نا زی آ زور تِسور۔ ہمسایہ ملک آک و جہان نا طاقتاتن بلوچ قوم بلُو امیت اَس تخاسوس کہ ھو دا آجوہی و وت واجہی نا احترامءِ کیرا ولے برطانیہ پاکستان ءِ شہہ تس و 27 مارچ 1948ء اے بلوچستانءِ قوضہ کننگ کِن سفارتی و پوجی کمک کرے و ہمسایہ ملکاک تینے بے چکار کریر دا غیر فطری انگا ریاست پاکستان نا حمایت ھٹ چُپ مسور۔
ھو پارے بلوچ قوم تینا تہی کمزوری تن زیات خطہ ٹی ساڑی کالونیل طاقتاتءَ سازش و خواہشت ھٹ غلام کننگانءِ۔ قوضہ گیرک پاکستان نا وڑاِنگا ریاست آتون ھوار بلوچستانءِ جبرھٹ ھوار کریر و بندغی حقاتءِ بلُو کَڈسیٹی دِیکہ تسور۔ پاکستان تینا ناجائزنگا قوضہءِ جاغہی کننگ کِن بلوچ قوم نا زی آ ہروڑنا ظلم کننگ ھٹیءِ و دادے پاکستانی ریاست بندغی حقاتءَ سختءُ خلاف ورزی تیٹی ھوارءِ۔ اینو اگہ بلوچستان آزاد مروس تو بلوچ قوم نا زندگی جوان مَسککءَ و بلوچستان اَسے خوشحالءُ فلاحیءُ ریاست اَس مسککءَ۔
ترجمان پارے 11 اگستءِ بی این ایم کُل چیپٹر و ھنکین آتے بازنگاءَ پروگرام آتے اڈ ایتِک و دا دے نا اہمیتءِ پاش کیک و بلوچ قوم تون ھوار تینا آجوہیءِ الینگ کِن عہدوپیمان کیک۔
