بلوچ نیشنل موومنٹ (بی این ایم) نا کماش ڈاکٹر نسیم بلوچ پارینے کہ اینو تنظیم نا مُسکوہئ سیکریٹری جنرل ڈاکٹر منان بلوچ نا نُہمیکو شہیدی نا دےءِ۔ 30 جنوری 2016 آ کوزہ گیر لشکر مستونگ ئٹی اودے چھار سنگت آتون اوار شہید کرے۔ اوڑتون اوار بابو نوروز، حنیف بلوچ، اشرف بلوچ و ساجد بلوچ ہم ریاستی زوراکی نا گواچی مسُر۔ ہندا دے آ راہشون ڈاکٹر منان بلوچ تینا سیاسی آ جہدکاراتون اوار تنظیم نا سیاسی دورہ آ اسک۔ بلوچ وطن نا آجوئی کن ہُورئی و بھلا توارئے پاکستان سگنگ کتوکہ۔ دا ہُورہ ئیئا و بھلا توارئے توفک نا زور آ بے توار کرفنگا۔
او پارینے کہ ڈاکٹر منان بلوچ بیرہ اسہ سیاسی ءُ راہشون ئس التو بلکہ او ننا راجی جہد ئنا فکری بنیات ئس اسّکہ۔ او گیشتر کتاب خوانوک و سرپندو بندغس اس، ہرا فکری وڑئٹ تینا زندئے بلوچ راجی آجوئی کن ندر کرے۔ اسہ ڈاکٹر ئس مرسہ او آرام و ظاہری وڑئٹ رکھ ئٹ زند گدریفنگ ئے گچین کننگ کریکہ ولے اوڑان بلوچ وطن نا غلامی و راجی ٹیوار نا نسخان ہُننگ متو و او جہد ئنا پِتی آ کسرئے گچین کرے۔ اونا سوچ، اونا جہد و اونا فکر اودے چُپی ئٹ ہُننگ نا موکل تتوسہ۔ او تینا گُڈیکو دم اسکان آجوئی، انصاف و راجی شرف ئنا کسر آ سلیس و ہنداڑا تینا ساہ ئے ندر کرے۔
ڈاکٹر نسیم بلوچ پارے کہ پاکستانی ریاست ڈاکٹر منان بلوچ ئے ہندا خاطر آن ٹِک کرے کہ او، اونا زوراکی نا کوزہ نا برخلاف اسہ بھلو توارس اسک۔ اونا خلّنگ بیرہ اسہ واقعہ ئس التو بلکہ بلوچ راج ئنا برخلاف زورئٹ بیگواہی، بےقانودی ئٹ کھسفنگ و اسہ وڑ زنک ایسری نا چرجوئی اس، ہرانا مسخت آجوئی کن بش مروکا ہر توارئے شیف کروئیءِ ولے کوزہ گیر ریاست تینا مسخت ئٹی بےسوب مسّ۔
ڈاکٹر منان بلوچ نا کوش اونا جہد ئنا ایسری نا بلکہ بلوچ راجی مزاحمت نا عزم ئے پین روشن کننگ نا سوب جوڑ مسنے۔ اونا قربانی پوسکنا نسل ئٹی بیداری ودی کرینے و او دا مشن ئے پین جرت و ثابت قدمی تون مونی دننگءُ۔
او پارے کہ دا دے بلوچ راجی تحریک نا دا عزم ئے پین پوسکن کننگ نا دےءِ ہرا ہر گدرینگوکا دے تون اوار پین پختہ مننگءِ۔
نن دا عہد ئنا تجدید کینہ کہ ڈاکٹر منان بلوچ نا تغ آزاد بلوچستان بیرا اسہ خیال ئس مفرو بلکہ گواچن مرو۔ نن ثابت کرون کہ اوفتا دترک بے معنیٰ ہنتنو بلکہ او ننا جہد ئنا سرزمین ئے سیراب کرینو۔ اوفتا نظریہ ہرا ہمو بلوچ نا شعور ئٹ زندہءُ ہرا ظلم ئنا مون آ سرہ شیف کتنے و تینا سرزمین آ آجوئی، وقار و خواجئی کن مزاحمت کننگءِ۔
ڈاکٹر نسیم بلوچ پارے کہ بلوچ نسل کشی و وہوکا دترک جہانی ضمیر آن خواست کیرہ کہ او بلوچستان ئٹی پاکستان نا ریاستی دہشت گردی و جنگی میار تے منر و مظلوم بلوچ الس اتون اواری نا عملی درشان ئے کیر۔ عالمی ضمیر اخس ہرے اسکان بے توار مرو اوفتا بلوچ دتر تا وام ودیسہ کرو۔ اوفتے بے توار تماشائی مروئی اف انتئیکہ پاکستان و اونا حیوان انگا لشکر بلوچ راج ئنا برخلاف کوش و غارت، زورانسری بیگواہی و بندغی حق آتا سنگین خلاف ورزی تے تسلسل ئٹ پین بھاز کننگءِ۔ بلوچ راج انصاف و آزاتی کن جنگ کننگءِ و جہان آ لازمءِ کہ او جبر ئنا برخلاف دا جہد ئٹ ننا توار جوڑ مریر۔
او پارے کہ ڈاکٹر منان بلوچ و اونا سنگت آتے سم تیان چپ کننگا ولے اوفتا خیال و نظریات آتے کھسفنگ کتو و اوفک اینو ہم زندہ ءُ۔
ڈاکٹر جان و سنگتاک ہر او سوچ ئٹ زندہءُ ہرا غلامی ئے رد کننگءُ۔ ہر ہمو گام ئٹ اوار ءُ ہرا آزاتی نا کنڈا ہننگءُ و ہر ہمو توار ئٹی زندہ ءُ ہرا ظلم ئنا برخلاف بڑز مننگءِ۔ اوفتا قربانی بلوچ راجی جہد ئنا تاریخ ئٹی مُدامی زندہءِ۔ او اسہ چراغ ئسے نا وڑ ننا کسر تے رژن کریسہ کرور، ہراوخت اسکان اسہ ہم بلوچ ئس بلوچ غلامی نا برخلاف جنگ کننگءِ، ڈاکٹر منان بلوچ نا سوچ زندہ ءِ و اونا جہد برجاءءِ۔ سہبمندی نناءِ انتئیکہ جبر ئنا دے مدامی کن مفک و آزاتی ہر باشعور انگا راج ئنا ابدی مسخت آ تیٹ تُدءِ۔
