بلوچ نیشنل موومنٹ (بی این ایم) نا ترجمان بیان ئسیٹی پارے کہ بلوچستان نا مڈی تے آ نظر تخوکا ڈنی ڈیھ تا کمپنی تے خبڑدار کینہ کہ او بلوچستان ئٹی سرمایہ کاری نا بارَو ئٹ سوچِپس، بلوچستان پاکستان تون تینا آجوئی کن جنگ کننگ ئٹی ءِ۔ و دا کمپنیک مُر ئنا بندغ آتیتو اسلام آباد ئٹی تُولِسہ سودا بازی کننگ ئٹی ءُ۔ ہرادے بلوچ قوم اسُل ہِچ منیپک۔
او پارے کہ پاکستان مائنرلز انوسٹمنٹ فورم 2025 نا رد ئٹ 8 و 9 اپریل 2025 آ اسلام آباد ئٹی اِرا دے ئنا کانفرنس مس ہراٹی بلوچستان نا مڈی تے آ ہیت کننگانے۔ داڑان زوت پد کینیڈا نا کمپنی بیرک گولڈ کارپوریشن ریکوڈک جوائنٹ وینچر شیئر ہولڈرز منصوبہ نا تازہ انگا فزیبیلٹی اسٹڈی نا منظوری تِس۔ بیرک گولڈ نا رد ئٹ دا منصوبہ ہندا سال ئٹی جوڑشتی مرحلہ آتے اسکان سر مرو، ہندن اولیکو پیداواری کچ ئے 2028 نا اخیر اسکان تخنگانے۔
ترجمان پارے کہ بیرک گولڈ نا بند و بست ئے وار وار پاننگانے کہ او بلوچستان ئٹی سرمایہ کاری کپس۔ کینیڈا نا سرکار آن ہم خواست کننگِک کہ یات مروک کمپنی نا بست و بند نا کالونیل روشِت نا نوٹس ہلے۔ ہرا بلوچستان نا حالیت آتان سوھو مننگ آن پد ہم سرماریہ کاری کننگ کن ضد کننگ ئٹی ءُ، دا روشِت ظاہر کیک کہ اوفتے زر ئتو کاریم ارے بندغ آتا زندگی تیتون آخہ۔ داڑے سرمایہ کاری نا مسخت بلوچ نا خون ئے پین وھفنگ ءِ۔ ہرا سیکورٹی نا گارنٹی ئے پاکستان نا آرمی چیف تننگ ئٹی ءِ دانا مطلب سیاسی توار آتے چُپ کننگ ءِ۔ تانکہ پاکستان تینا جہانی شریک آتا کمک ئٹ بلوچ آتا مڈی تے آسانی ئٹ لُٹِنگ کے۔
او پارے کہ شرم ئنا جاگہ ئسے کہ پاکستان نا وزیر اعظم دا کانفرنس ئٹی پڑو کرِسٹ پارے کہ ” او سرمایہ کار آتے تینا مالک سمجھِک” دا غلامی نا سوچ پنجاب نا لیڈر آتے مبارک مرے ولہ بلوچ قوم تینا مڈی تے آ کس ئنا اختیار ئے منیک نہ کہ کس ئے چار پیسہ نا بدل ئٹی تینا مالک منّیک۔
او پارے کہ کانفرنس ئٹی بیرک گولڈ تو اوار امریکا، چائنا، سعودی عربیہ و ووڈز میکنزی کمپنی نا بھلاک ساڑی اسُر۔ ہرا بلوچستان نا 6 ٹرلیئن ڈالر نا مڈی تا لُٹ ءُ پُل ئٹی است خواہی تخِرہ۔ پاکستان نا ریاست دنیا ئے بلوچستان ئٹی مداخلت آن توننگ کن بلوچستان نا مڈی تے رشوت نا وڑ ئٹ کارمرز کننگ ئٹی ءِ۔ داڑے پاکستان نا فوج بلوچ قوم ئنا نشل کشی ٹی ملوث ءِ، سیاسی آزاتیک پھلِنگانو، دا ڈیھ تا سرمایہ کاری بندغی بحران ئٹی ترندی ہتنگ نا سوب مرور۔ نن خواست کینہ کہ دادے توننگ مرے۔
بلوچ نیشنل موومنٹ نا ترجمان پین پارے کہ پاکستان نا ریاست بلوچستان تون اوار پختونخواہ ٹی دنیا نا بھلا کمپنی تے اوار کرِسہ او ہَند ئنا مڈی تے پختون قوم ئنا منشا آن بیدس کشِّسَہ بہا کننگ خواہِک۔ خیبر پختونخواہ نا تجویز مروک مائنز اینڈ منرلز بل 2025، پختون قوم ئے اوفتا اختیار آن محروم کننگ نا کوشست ئس ءِ، ہرادے نن شیف خلینہ۔ نن پختون قوم ئنا موقف تون اوار سلوک اُن کہ اوفتا مڈی تے آ کس ئنا اواری آن بیدس اوفتا حق منِّنگ مرے۔ ہندا وڑ ئٹ سندھ ئنا دریا غا 6 پوسکنو کینال جوڑ کرِسہ فوجی پروجیکٹس آتے دیر آن سیر کننگ نا منصوبہ ءِ ہراڑان سندھ ئنا زمیندار آک مھالو آن دیر ئنا کمبوتی نا گواچی ءُ، مشکل آک تا پین گیشتُر مرور۔ نن دا منصوبہ نا برخلاف سندھی قوم ئنا موقف تون اوار اُن۔
او پارے کہ وخت ہندادے کہ بیوس آ قوم آتے تینا مڈی تا لٹ ءُ پل نا برخلاف اوار مرِسہ مزاحمت کروئی مرو۔ ننا جنگ مشترک ءِ و ننے ہر پِڑ آ اوار مرِسہ جنگ کروئی ءِ۔ اگہ نن اینو دا مشترکہ جنگ ئٹی اسٹ ایلو آن بیگانہ مسون تو دانا فائدہ کوزہ گیر آ پاکستان ئے مرو، ہرا بیوس آ قوم آتے بشخِسہ اوفتا زمین و قدرتی مڈی تے آ تینا کوزہ ئے برجاء تخو، و اوفتے آنہ و ٹکا نا قیمت آ بہا کرِسہ تینا مفاد آتیکن کارمز کرو ہمر کہ پاکستان جوڑ مننگ نا دے آن کرِسہ بسونے۔
ترجمان ایسر ئٹ پارے کہ نن واضح کینہ کہ دنیا نا ہمر او تاغت ئس مرے بلوچ تینا مفاد آتا رکھنگ کن اونا برخلاف مزاحمت کرو۔
