بلوچ نیشنل موومنٹ ( بی این ایم ) جینوا ٹی اقوام متحدہ نا بندغی حقاتا کونسل (UNHRC) نا 54 می اجلاس نا موقعءِ اَسے بلو آگاہی مہم سینا اعلانءِ کرینءِ ۔
دا مہم نا مول و مراد بلوچستان ئٹی بندغی حقاتا سنگین اِنگا خلاف ورزی تا زی آ اِیت کننِگ و بلوچ مخلوک نا جہُد نا بارِسٹ عالمی سطحءِ شعور تِننگءِ۔ بی این ایم دا موقعءِ بلوچستان نا سنگین انگا حالیت نا کُنڈا توجُو تِرفِنگ کِن مُسءِ دے نمائش ، احتجاجی مظاہرہ و سوشل میڈیا مہم نا اہتمامءِ کننگ ئٹیءِ۔
28 اَن 30 ستمبر اِسکان ، بی این ایم جینوا ٹی یو این ایچ آر سی نا اجلاس نا موقعءِ اَسے مُسءِ دے نا نمائش اَس تخانءِ۔ ہراٹی بلوچستان ئٹی بندغی حقاتا خلاف ورزی آتا المناکنگا داستان آتے بیان کننگیک۔
بیان کروکا پروگرام تا ذریعہ اَٹ بلوچ قوم نا زی آ مروکا مظالم آتے پاش کننگ و اوفتا جہُدءِ ہم مونءِ اتویءِ۔ دا نمائشت ئٹی فوٹوُک و کاغزی رپوٹ آتا ذریعہ اَٹ بین الاقوامی نمائندغاتءِ و اقوام متحدہ نا اجلاس ٹی ساڑی مروکاتءِ بلوچستان ٹی بندغی حق ئنا بگڑینگوکا حالیت نا بارسٹ آگاہی تننگ و پُو کننگءِ۔
28 ستمبرءِ ، مقامی وخت نا مطابق اَٹ 2 اَن 4 بجہ اِسکان بلوچستان ئٹی بندغی حقاتا لگتمالی نا خلاف بی این ایم نا کُنڈ اَن اَسے احتجاجیءُ مظاہرہ اَس کننگِک۔ دا مظاہرہ جنیوا ٹی یو این ایچ آر سی سیشن نا پیشن آ ( بروکن چیئر ) ئٹی مریک۔ دا احتجاج نا مکسد بلوچ مخلوک نا حالیت زار نا پارغءَ توجُو تِرفنِگ و بلوچ آتا زی آ زلمءِ تُورنگ کِن متعلقہ بندغاتءِ زور شاغِنگءِ۔
نمائش و احتجاجی مظاہرہ اَن بیدس بی این ایم تینا باسک و دوستخوا تیکِن مہم نا بارسٹ آگاہی تننگ کِن سوشل میڈیا پلیٹ فارمءِ ہم کارمرز کننگ نا اپیلءِ کرینءِ۔
فیس بک ، ایکس ( ٹویٹر ) و انسٹاگرام تون ھوار بازِنگا آن لائن چینلز نا ذریعہ اَٹ بی این ایم بلو تعداد سیئٹ اِیتءِ سرکننگ و دنیا نا درد مند انگا بندغاتَن دا مہم ٹی ھواری نا خواستءِ کیک۔بلوچستان ئٹی بندغی حقاتا حالیت نا بارسٹ فوٹُوک ، ویڈیوک و ایلو معلومات آتے تالان کننگ اَن بی این ایم بلوچ تحریک کِن دنیا نا حمایت و ھواری نا امیتءِ تخِک۔
جنیوا ٹی اقوام متحدہ نا انسانی حق آتا کونسل نا اجلاس اَن بلوچ نیشنل موومنٹ مروکا آگاہی مہم بلوچستان ئٹی بندغی حقاتا سنگین اِنگا خلاف ورزی تا زی آ اِیت و گپ کننگ بی این ایم نا موست نا کوشست کننگ نا اَسے سلسلہ اَس مسونءِ۔ نمائش ، احتجاجی مظاہرآک و سوشل میڈیا مہم تا ذریعہ اَٹ بی این ایم بلوچ مخلوک نا مروکا جدوجُہد اَٹ بین الاقوامی توجُو و حمایتءِ اللِنگ نا کوشست کننگءِ۔دا مہم بلوچستان ئٹی بندغی حقاتا خلاف ورزی تیکِن ذمہ داراتءِ عالمی سطحءِ جوابدہ کریفِنگ نا ہم اَسے کوشسِت اَسے۔
بی این ایم عالمی برادری نا زی آ زور شاغِک کہ ھو بلوچستان نا سنگین اِنگا حالیت نا بارسٹ گام چِست کننگ کِن زوتس کاروائی کے۔
