پمفلٹ » بلدیاتی گچین کاری تسلط ءِ برجاء تخنگ نا اسہ استعماری آلہ سے
عزت مند آ بلوچ عوام!
مگہ بلوچ عوام نا ویل بنماسی ویل یعنی دیر، تعلیم، جانجوڑی، و روزگار تون تفوک ءِ؟ مگہ ہزار آ بلوچ ورنا، کماش و نیاڑی تے اندا سوب آن شہید کننگا کہ او پاکستان نا راہبندی ہد و بند ئٹی تینا حق ءِ خواہنگ ئسر؟ ہزار آ زالبول، چنا، کماش تیتوان اوار ورنا تے زوراکی ئٹ بیگواہی نا گواچی اندا سوب آن کننگا کہ او روزگار خواہنگ ئسر؟ ہزار آ اُرا تے اندا سوب آن خاخر تننگا کہ او بلدیاتی گچین کاری تیکن نشست خواہنگ ئسر؟ یخیناً دا غٹ سوج آتا ورندی آخہ ٹی مرو، انتئے کہ بلوچ قوم ئنا کہی فکری تپہ غا تیان تعلقداری تخوکا بندغ آتا زوراکی نا بیگواہی، جشوک جونک و اشتماعی قبر آک دا سوب آن رسینگانو کہ او قومی آجوئی کن جہد کننگ ئسر۔ قومی جہد آجوئی نا ردی ٹی اوفتے وڑ وڑ ئنا سزا تا عمل ئٹ گدریفنگ مس۔ ہنداڑِسکان کہ جہدکار تا سیال آتے ہم اشتماعی سزا نا گواچی کننگا۔
شعور تخوکا الس !
بلوچ نیشنل موومنٹ اسہ جمہوری انقلابی سیاسی پارٹی سے ہرا جہانی اصول و قانود آتے نظر ئٹ تخِسہ قومی آجوئی کن جہد کننگ ءِ۔ اسہ جمہوری پارٹی اس مننگ نا رد ئٹ ہر جمہوری عمل نا مخ تفی ءِ کیک۔ ولے پاکستان ئٹی جمہوریت سرہ غان ساڑی اف۔ پاکستانی لشکر تینا فائدہ غا تیکن منَہ بندغ ءِ گچین کاری تا پنا مونا ہتیک۔ بلوچستان ئٹی ہیت پین ہم جتا ءِ۔ داڑے ہمو بندغ آتے بلوچ نا زیہا مسلط کننگ مریک ہرا کہ بلوچ قومی تحریک نا چپ قوضہ گیر کن کاریم کیرہ انتئے کہ بلوچستان اسہ قوضہ مروکو ریاست ئسے ہراڑا ریاست پاکستان قوضہ کریسہ تینا نو آبادیاتی نظام ءِ مسلط کریسہ تینا قانود، چاگڑد و حکومت ءِ مسلط کرینے۔ نو آبادیاتی بست و بند جبر و بے دادی نا بست و بند ءِ ہرا ٹی گواچنی ہندی تا بے دادی مریک۔ دا بے دادی تیکن منَہ بندغ آتے مچ کریسہ جمہوری عمل نا پن ءِ تننگ باز مسخرہ ءُ ہیت ئسے۔
غیرت مند بلوچ آک!
پاکستان نا سیخا ٹی بلوچستان ئٹی ہڈ تروک لس گچین کاریک یا بلدیاتی گچین کاری نو آبادیاتی چم ئسے ہرا نا کمک ئٹ ریاست تینا گچین کروکا بندغ آتے الس آ مسلط کریسہ تینا قوضہ گیریت نا پالیسی ءِ پائیدار کیک۔ ونڈ کر، میڑِف و حکومت کر نا پالیسی نا رد ئٹ پاکستان بلوچ قوم ءِ گواچنی ویل آ تیان بدر کریسہ تینا تسلط ءِ ودفنگ خواہک۔ بلوچستان ئٹی ہڈ تروک بلدیاتی گچین کاری تسلط ءِ برجاء تخنگ نا آلہ سے۔
عظیم دھرتی نا عظیم باتیک!
بلوچ راجی جنز آجوئی نا ہمو ہند ءَ سر مسنے ہراکان پدی مننگ نا متلب اسہ راج ئنا حیثیت ئٹ فنا مننگ ءِ ۔ دا نام نہاد گچینکاری تا بشخ جوڑ مننگ ریاستی قوضہ گیری ءِ بیرہ مَنّنگ اف بلکن ریاستی قوضہ گیری ءِ مرغن کننگ ئٹی ریاستی سنگتی نا کڑدار نا بریبر ءِ ۔ اینو بلوچستان نا ہر اسہ اُرا ریاست نا زوراکی تا گواچی ءِ ، ہر اُرا نا بندغاک زورانسری بیگواہی نا گواچی ءُ ۔ ہندا خاطر اینو بلوچ راج فیصلہ ارفِہ کہ او بلدیاتی گچینکاری ٹی بشخ ہلیسہ تینا شہیداتا دتر تے گیرام کننگ نا بشخ جوڑ مروفس۔ اینو فیصلہ ارفر کہ پاکستان نا کنڈان مروکا نسل کشی، جنگی ڈوہ داری و بندغی نا برخلاف ڈوہ داری کروکا ریاست نا کنڈان مروکا گچینکاری تیان بائیکاٹ کرون تاکہ ننا پن دا ڈوہ داری تتون اوار مروکا تیٹی مف۔ لس گچینکاری و بلدیاتی گچینکاری تا وڑ ئنا ریاستی چمّاک بلوچ راج ئنا بخت ءِ بدل کننگ کپسہ۔ بلوچ راج ئنا بخت ئنا فیصلہ بلوچ راج آجوئی نا دروشم ئٹی کرون۔ بلوچ راج بلدیاتی گچینکاری تا بائیکاٹ نا عمل ئٹی راجی گل آتتون اوار مریسہ جہان ءِ باور کرفر کہ بلوچ نا ویل آجوئی ءِ نئے کہ بنیادی حق آک ۔
بلوچ راجی جنز (بی این ایم)
