بیست ءُ ہفت مارچ زندگی نا اَسہ خلٹ تِروکو بندات اَسے
معزز انگا بلوچ مخلوق !
ایہُن تو بلوچستان ئٹی ہڑ دے مَون اِنگا دے ئنا وڑ اے انتئے کہ بلوچ مخلوق نا زندگی ٹی دنو دے اَس اَف ہراٹی جبر ئٹ بیگواہی اَس مف، چیروکو جون اَس خنگپ، دروغ ئنا مقابلہ و مچی نا سزاک بلوچ جہدکروکا تا خاندان آک ذہنی و بدنی عزاب آن گدرینگپس ، تیبہ بلوچستان ئٹی حالیت ہندُن جوڑ مسونے ہراڑن مخلوق نا زندگی اَسے جاگہ آ سلوکے۔
اگہ بیست و ہفت مارچ ئنا ہیت اے کِین تو بیست و ہفت مارچ بلوچ قوم اَکِن اَسے مون او دے اَس پاننگ اِک دا دے آ پاکستان نا آرمی و اونا ادارہ غاک بلوچ ڈغار نا زی آ قوضہ کریر بلوچ قوم ئنا ثقافت اے، سماج اے، سیاسی، تعلیمی و معاشی حوالہ اَٹ زندگی گدریفنگ نا کل کسر تے بند کرینے۔ بیست و ہفت مارچ ہمو خلٹ تروکا دے نا بندات اے ہراڑن بلوچ قوم ئنا شناخت و تینے بلوچ چاننگ نا مسلہ تون مون پہ مون کرینے۔ دا خلٹ تروکا زندگی آن تینے بچفنگ نا اَسہ حل اَس بلوچ تون ارے او اسِٹ اس اے آجوہی کِن جنگ کننگ اے، مزاحمت آن بیدس خلٹ تروکا زندگی آن خلاصی رسینگک نہ کہ پاکستان نا ظلم و جبر و ذلت نا زندگی آن خلاصی مریک
غیرت مَنْد انگا بلوچ مخلوق!
بیست و ہفت مارچ نا تاریخی آ راستی اے اگہ نن ہرُِن تو باز انگا گڑاک ننا مون آ بریرہ ہموتم کہ دنیا نا بھلا جنگ (جنگ عظیم) ئٹی برطانیہ نا سرکار اے معاشی و جنگ ئنا میدان ئٹی بھلو نسخان رسینگا تو ریاست برطانیہ دا خطہ آن تینا اجارہ داری اے ایسَر کننگ کِن ہندوستان اے اِرا جاگہ غا بشخا ہندا نا پِڑ آن پاکستان نا وڑ ءُ ریاست ئس ودی مس پدا پاکستان اے کمک کریسا اَسہ منصوبہ سیٹی بلوچ نا سر زمین اے پاکستان نا دُو ٹی تِس۔
تاریخ نا راستی و دستاویزات آتے آن دا ہیت ثابت مریک کہ یانزدہ اگست 1947 آ برطانیہ نا سرکار بلوچستان نا آجوئی نا اعلان اے کرے بلوچستان نا آجوئی اے پاکستان و برطانیہ ہڑتوماک منّار ۔تاریخ دا ہیت ئنا ہم ثبوت اے ایتک کہ بلوچستان نا آجوئی نا دے آ مخلوک تون ہیت کریسا پارے ننے بلوچستان نا سلامتی کن ہر وڑ نا قربانی آن چک و پد مروی اف و دا نا وعدہ اے ہم کرے۔
بلوچ قوم ئنا تاریخ ئٹی دا ہیت ہم نقش اے کہ میر احمد خان بلوچستان نا اجارہ ٹی ہلوکا علاقہ تے ہلنگ کن پاکستان نا گورنر جنرل محمد علی جناح اے بلوچستان نا وکیل کرفے ولے تینا دھوکہ بازی نا عادت آن مجبور پاکستان سازش تا جال اے تالان کریسا اجارہ ٹی ہلوکا علاقہ تے بیدس میر احمد یار خان نا مونا تینتون اَسے جاگہ مننگ نا سلہ اے تِس ہمو دے بلوچستان نا دارالعوام و دارالاُمرا ہڑتوماک منتور و اَسے جاگہ مننگ نا خلاف جنگ و مزاحمت نا اعلان اے کریر۔
بلوچ زمین نا فرزند آک !
سازش تا سلسلہ بھلُن مریسا کرے آخر ئٹی ہفدہ مارچ 1948 آ ریاست لسبیلہ، خاران و مکران اے غیر آئینی وڑ ئسیٹی تینتون اوار کننگا ہمو نا خلاف بلوچ مخلوق سخت مزاحمت کریر آخر آ 1948 آ قلات نا زی آ پوج کشی کننگا بلوچستان نا زی آ قوضہ کننگا سیاسی کارکن آتے بندی کننگا ہمو وخت نا سیاسی پارٹی قلات اسٹیٹ نیشنل پاٹی اے کالعدم کننگا، دا غیر قانونی و غیر بندغی عمل نا خلاف پرنس آغا کریم خان نا سلاح و سوج ئٹ مزاحمت نا بنیات تخنگا پدا ہمودے ہم دھوکا سیٹی ختم کننگا۔
بہادرانگا بلوچ زمین نا چُناک !
بلوچ قوم ئنا تاریخ مزاحمت ئٹ چاننگک ہمو پرتگال سامراج آن ہلیس انگریز سامراج نا خلاف مزاحمت کریسا تینا قومی تشخص نا حفاظت اے کرینے، نواب محراب خان نا مزاحمت اینو ہم تاریخ نا حصہ اَس جوڑ مسونے و ارے او شہادت نا درجہ اے سرمس و اینو اسکان ننا اُست آتیٹی زندہ اے ، اینو ہم ہزار آتا حساب ئٹی بلوچ ورناک پاکستان نا ٹارچر سیل آتیٹی خلٹ تروکو زندگی ئس گدریفسا اُو، سد آتا حساب آ بلوچ سیاسی مزاحمت کار آک شہید مسُنو اینو ہندا مزاحمت نا وجہ آن جُہد کروکا تا خاندان آک مُچی نا سزا نا عمل آن گدرینگسا اُو دا ریاست ِ پاکستان نا شکست کُننگ نا بھلو ثبوت اَسے۔
بلوچ زمین نا وارث آک !
ننا پیر انگاک ہر زمانہ ٹی مزاحمت نا کسر اے ہلکنو تینا قوم ئنا تشخص و قومی آبرو نا حفاظت اے کرینو۔اینو ھم ننا قوم تینا قومی تشخص و آجوئی ہلنگ کن جُہد کریسا اے۔ اینو دا ننا ذمہ واری جوڑمریک کہ نن تینا قومی آجوئی اے ہلنگ کن مزاحمت نا کسر اے ہلین قومی آجوئی اے اُست ئٹ تخیسا سیاسی و مزاحمت کروکا تنظیم آتا حصہ جوڑ مرین و دانا مضبوط کننگ کِن ہر وڑ نا مدت و کمک آن چک و پد مفن۔
