بلوچ راجی زْرمبشت ( بی این ایم ) ءَ ماں جرمنی ءِ شھر ٹریئر ءَ پورٹا نیگرا پلاٹس ءَ زھرشانی یے کرتگ ، ایشی ءِ مول بلوچستان ءَ برجاھیں تْرامیں زوراکی ءُ مزنیں رنگے ءَ مردمی اگبالانی بگیریانی سھر کنگ اَت۔
زھرشانیاں مردمی اگبالانی کارکن ءُ بلوچ راج ءِ پلہ مرزاں بھر زرت ۔ بھر زیروکاں گوں بلوچستان ءِ مردماں ھمدلی درشان کنان ءَ زور بیگواھی ، در آمیدگسی کوش ، ناراھیں دزگیری ، سیاسی بگیری ءُ مردمی اگبالانی کارکنانی بگیری ءَ مھترھندی زوراکی ءِ سر ءَ بے تاھیری پیش داشتگ۔ زھرشانی کنوکاں گْوشتگ پاکستانی مھتر ھند اے کاراں تْرم اتگیں رنگے ءَ کنگ ءَ اِنت۔
زھرشانی ءِ میان ءَ کاگد ، جرنبشت ءُ گْوشتانکانی پارست ءَ چہ میان راج ، میان راجی مردمی اگبالانی گل ءُ رسانک ءَ لوٹ کنگ بیتگ کہ آ بلوچستان ءِ جاورانی سر ءَ وتی بے تواری ءَ آسر بہ کن اَنت۔ گْوشتانک دیوکاں گْوشتگ کہ دھکاں برجاہ ءُ مردمی اگبالانی گواچنیں لگتمالیاں پد ھم بلوچ راج ءِ درد ءُ دور ماں جھانی تلواں یکشل ءَ ڈالچار کنگ بیگ ءَ اَنت۔
اے دم ءُ درگت ءَ بی این ایم ءِ باسکاں جرمن ءُ انگریزی زبان ءَ پنتاک ھم بھر کرت۔
زھرشانی ءَ جنین ، چک ءُ زور بیگواھیں مردمانی کھولانی سر ءَ اے زوراکی ءِ تھلیں سان سھرا کنگ بیتگ اَنت۔ گْوشتانک دیوکاں گْوشتگ زور بیگواھانی کھول ، گچینی مات ءُ چک سال گْوستگ اَنت کہ پر ایمنیں جھد ءِ پارست ءَ مزدانک ءُ وتی لوگ ءِ مردمانی واتری ءِ لوٹ کنگ ءَ اَنت ، بلے مزدانک ءِ جاہ ءَ آ مچانکی ڈنڈ ءِ دیمپان اَنت۔
لقمان ، وجاھت ، آصف ، مجیب عبداللہ ، شارق ءُ حبیب ءِ پجیگ ءَ دگہ گْوشتانک دیوکاں زور بیگواھی ، در آمیدگسی کوش ءُ مچانکی ڈند ترندی ءَ ایر جت اَنت۔
آیاں پاکستانی لشکر ءِ بیڑ گوں ترندی ءَ ایر جتگ اَنت ءُ گْوشتگ پاکستانی لشکر بلوچستان ءَ شھرمنندانی سر ءَ زوراکی کنگ ءَ اِنت۔انیگیں روچاں گوادر ، مستونگ ءُ کیچ ءَ دھانی کچ ءَ مردم تچکے ءَ نشانگ کنگ ءُ کشگ بیتگ ءُ ڈرون ارشاں ھم شھرمنند کشگ بیگ ءَ اَنت۔زھرشانی کنوکاں گْوشتگ اے جاوراں میان راج ءِ زمہ واری بیت کہ آ گوں پاکستان ءَ وتی جنگی ، گزرانکی، دیمپانی بائیواری ءُ سلاہ بھا کنگ رنگیں کارانی سر ءَ بہ جیڑ اَنت۔
زھرشانی کنوکاں مچانکی ڈند ءِ بدتریں ڈول ءِ سر ءَ گپ جنان ءَ گْوشتگ بلوچستان ءَ مردمی اگبال ءُ سیاسی کارکنانی کھول ھم زور بیگواھیانی نشانگ اَنت۔نوکتریں درور بی این ایم ءِ سرکماش ڈاکٹر نسیم ءِ پت محمد بخش ساجدی ، ناکوگ نعیم ساجدی ءُ رفیق ءِ زور بیگواھی اَنت۔زھرشانی کنوکانی رد ءَ اے پمیشکا دزگیر کنگ بیتگ اَنت داں بی این ایم ءِ سرکماش چہ زْرمبشت ءُ سیاسی سرگرمیاں دزکش بہ بیت ۔
آئی ءَ گْوشتگ ڈاکٹر نسیم ءِ کھول یکشل ءَ پاکستانی زوراکیانی آماچ اِنت۔ آئی ءِ نزیکیں سیاد داں سالاں زور بیگواھیانی آماچ بیتگ اَنت ، آئی ءِ نزیکیں سیادے پاکستانی لشکر ءَ لوگانی تہ ءَ پترتگ ءُ درآمیدگسی کشتگ۔انیگیں روچاں دگہ راھشون ءُ باسکانی لوگ ءِ مردم ھم ترسینگ ءُ بیھار دیگ بیتگ اَنت۔
گْوشتانک دیوکاں تچک کرتگ کہ بی این ایم ءِ راھشون ءُ کارکن چہ پاکستانی لشکر ءِ اے کارپداں تشے ھم نہ ترس اَنت۔
آیاں نامداریں وکیل ایمان مزاری ءُ آئی ءِ لوگواجہ ھادی علی چٹا ءِ دزگیری ءِ سر ءَ ھم گپ جت ءُ گْوشتگ بلوچستان ءَ تیوک ءَ بلوچ سیاسی کارکنانی کھول مچانکی ڈنڈ ءِ نشانگ نہ اَنت بلکیں آیانی وکیل ءُ مردمی اگبالانی کارکن ھم نشانگ کنگ بیگ ءَ اَنت۔ایمان مزاری ءُ ھادی علی چٹا پمیشکا زندانی اَنت کہ آ بلوچستان ءَ بیوکیں زوراکیانی سر ءَ گپ جن اَنت ءُ زور بیگواھیں مردمانی کیسانی رندگیر اَنت۔
زھرشانی کنوکاں چہ راجانی سنت ، یورپی سنت ءُ مردمی اگبالانی تْرامگیجاں لوٹ اتگ کہ آ بلوچستان ءَ برجاھیں مردمی اگبالانی سر ءَ آزادیں رنگے ءَ پٹ ءُ پول بہ کنائین اَنت ءُ میان راجی راھبندانی رد ءَ اے کارپدانی زمہ واراں جست بہ کن اَنت۔
