بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ وتی سالی گزارش شنگ کرتگ۔ پانک ءِ مردمی اگبالانی سالی گزارش ءِ رد ءَ سال 2025 ءَ ماں بلوچستان ءَ پاکستانی لشکر ءَ 225 کس در آمیدگسی کشتگ ءُ 1355 زور بیگواہ کرتگ ، اے کار مھترھندی تک ءَ تْرامیں زوراکیانی پدر کن اَنت۔
گزارش ءَ گْوشگ بیتگ کہ پاکستانی لشکر ، چیریں تْرامگیج ءُ ایف سی نودربر ، کارکن ءُ ڈیھی زانتکاراں نشانگ کنگ ءَ اَنت۔ ڈرون ءُ بالگردانی ارش ، ءُ ’ بہ کش ءُ چگل دے ‘ ءِ شوندات مدامی کار جوڑ بیتگ اَنت۔ ناشرکاری ءِ گر ءُ دار ءِ راھبند ءُ ’ مردمی تْرام ءِ برجاہ دارگ ءِ پرمان ( تری ایم پی او ) ‘ پہ پرایمنیں شھرمنندانی چوش کہ بلوچ یکجھتی پتر ( بی وائی سی ) ءِ میار بار کنگ ءَ کارمرد بیگ ءَ اِنت۔مزنیں کچے ءَ بیوکیں مردمی اگبالانی اے لگتمالی بلوچ شھرمنندانی بگیری ءَ مچانکی ڈنڈ ءِ گیش اتگیں شوندات ءَ سھرا کنت۔
پانک ءِ گزارش بلوچ راج ءِ بگیری ءَ مھترھندی زوراکی ءِ ترندی ءَ پیش دار ایت۔ گزارش ءِ رد ءَ پاکستانی لشکر مردمانی سر ءَ کسانیں رنگے ءَ بیڑ آرگ ءَ نہ اِنت بلکیں شھرمنندانی بگیری ءَ وتی سرجمیں لشکری واک ءَ کاربندگ ءَ اِنت ، کہ ایشانی تہ ءَ بالیگانی ارش ھم گون اَنت۔سال 2025 ءِ سری نیم بھر ءَ چہ درساں گیش 785 کس ءِ زوربیگواھی راست بیتگ ، پرچا کہ اے باریگ ءَ مھترھند ءَ گیش بیتگیں پرایمنیں سیاسی سرگرمی ءُ راھشونانی دارگ ءَ وتی وس ءُ واک کار بست۔سال ءِ رند تر ءِ ماھاں زور بیگواھیانی کچ کم بیتگ بلے درآمیدگسی کوشانی تہ ءَ گیشی اتکگ۔407 زور بیگواھیں مردم آزار دیگ ءُ چیریں آزارجاھاں زندانی کنگ ءَ پد یلہ کنگ بیتگ ، چہ ایشاں گیشتر بالاد ءُ روانی رنگ ءَ سکا سانمند اَت ، چہ ایشی ءَ مھترھندی ناشرکاری گْواچن بیت۔
گزارش ءَ گْوشگ بیتگ کہ نودربر ءُ کاری ئیں ورنایانی سر ءَ ارش بلوچ چاگرد ءِ زانشتی ءُ سیاسی راھشوناں گمسار کنگ ءِ پاکستانی شوندات ءِ نشاندئی کن اَنت۔
گزارش ءَ سال ءِ مزنیں ویل ھم ھوار اَنت۔ چہ ایشاں بلیدہ ءَ ڈرون ارش (29 اکتوبر) ھوار اِنت ، اے ارش ءَ چار ورنا کشگ بوت ، کہ نکٹی ( پکنک ) کنگ ءَ اَت اَنت ، ایشاں چہ پاکستانی لشکر ءَ موکل ھم گپت اَت بلے پد ءَ ھم پاکستانی لشکر ءِ ڈرون ءَ جت اَنت۔ زھری ءَ بالیگانی بم گواری (17 ستمبر) ، چہ اے ارش ءَ سئے شھرمنند بیران ءُ چکے ٹپی بوت ، ءُ چلتن ءِ کوہ ءَ بیتگیں ارش (28 اکتوبر) ءَ ورنا سکا ٹپی بوت اَنت۔ چہ اے ویلاں زانگ بیت کہ پاکستان یکشل ءَ میان راجی راھبنداں پروشگ ءَ اِنت۔سال 2025 ءَ 225 ئیں درآمیدگسی کوشانی تہ ءَ ذیشان ظھیر ( جون ءَ زور بیگواہ ءُ آزار ءَ پد کوش ) ، عثمان مقبول ( زور بیگواھی ءِ دو روچ ءَ پد کوش ) ءُ خلیل احمد ( دسمبر ءَ کشگ بوت ، ابید چہ ایشی ءَ کہ وت پولیس ءَ اَت ) ھوار اَنت۔
گزارش ءَ راھبندانی ناراھی ءُ ریاستی ناشرکاری ءِ رنگ ءَ مزنیں کچے ءَ کاربند کنگ ءِ بارہ ءَ ھم گْوشگ بیتگ ، مھترھند ءِ سیاسی ءُ ایرادگریں توارانی گٹگیر کنگ ءِ اے آزمیدگیں کار اَنت۔نامی ئیں بی وائی سی ءِ کارکن ڈاکٹر ماہ رنگ ، صبغت اللہ ، بیبگر، بیبو ءُ گلزادی ءَ ھوار ناشرکاری ءِ بگیریں گامگیج ءُ تری ایم پی او ءِ رد ءَ ناراھی دزگیر اَنت۔ گیشتریں مردمانی دزگیری تری ایم پی او ءِ سیاھیں راھبند ءِ رد ءَ داتگیں 90 روچاں ھم گْوستگ اَنت۔ 32 کارکن ناشرکاری ءِ بگیریں گامگیج ءِ رد ءَ ’ فورتھ شیڈول ‘ ءَ ھوار کنگ ءُ آیانی تر ءُ تاب ءِ اگبال پچ گرگ بیتگ اَنت۔ پاکستان ءَ شھرمنندانی شھرمنندی اگبالانی پچ گرگ ءِ کار تیز کرتگ ، چوش کہ پجار کارڈ ءِ بند کنگ ، سم کارڈ ءِ بند کنگ ، چہ سفر ءَ دارگ ءُ بینک ءِ حسابانی بند کنگ۔
پانک ءَ میان راج ءَ دلگوش پرینتگ کہ مڈیاں سر ریچیں بلوچستان ءِ بومی چہ زند ءِ بنکی آسراتیاں زبھر اَنت۔ ریکو ڈک ، سینڈک ءُ گوادر بندن رنگیں کارشوراں بلوچستان ءِ مڈی کارمرد بیگ ءَ اَنت بلے بومی بنکی اگبالانی لوٹگ ءِ سر ءَ گوں زور ءَ لپاشگ بیگ ءَ اَنت۔ یورپی سنت ءِ جی ایس پی پلس ءِ چار گزار کنوکیں پتر ءَ 2025 ءَ زور بیگواھی ، گپ جنگ ءِ آزادی ءِ پچ گرگ ءُ ناشرکاری ءِ گر ءُ دار ءِ گامگیج ءِ ناراھی کارمرد ءِ سر ءَ بے تاھیری درشانتگ ، چہ ایشی ءَ زانگ بیت کہ ماں بلوچستان ءَ مردمی اگبالانی جاور شر نہ اَنت۔
پانک ءَ وتی 15 تاکی دلجمیں گزارش ءَ سال 2025 ءَ پاکستانی مھترھند ءِ مردمی اگبالانی بگیری دستاویزی ءَ رنگ ءَ پیش کرتگ اَنت۔
پانک ءَ زور بیگواھی ، در آمیدگسی کوش ءُ شھرمندانی سر ءَ بالی ارشانی بند کنگ ، زوراکیں راھبندانی آسر کنگ ءُ سیاسی زندانیانی یلہ کنگ ءِ لوٹ کرتگ۔ بلے گزارش ءَ اے گپ تچک کنگ بیتگ کہ ابید چہ میان راجی دزمانجنی ءَ بلوچستان ءَ مردمی اگبالانی لگتمانی برجاہ بیت ءُ اے پہ جھان ءِ زورشاھاں ترسناکیں درورے جوڑ بیت۔
