بلوچ راجی زْرمبشت ( بی این ایم ) ءِ مردمی اگبالانی تک ’ پانک ‘ ءَ جنوری 2026 ءِ گزارش شنگ کرتگ ، گزارش ءِ رد ءَ سال 2026 ءِ بندات ھم ماں بلوچستان ءَ چہ مردمی اگبالانی مزنیں لگتمالیاں بیتگ۔گزارش ءِ رد ءَ بلوچستان ءِ جتائیں ھند ءُ ھنکیناں ھوار کراچی ( سند ) ءَ ھم زور بیگواھی ءُ در آمیدگسی کوش بیتگ۔درسی 82 کسانی زور بیگواھی ءِ ھال رس اتگ ءُ 44 کس آزار دیگ ءَ پد یلہ کنگ بیتگ۔ھمے میانءَ 12 مردم درآمیدگسی کشگ بیتگ ، چہ ایشی ءَ بلوچستان ءَ ترس ءُ ناباوری ءِ جاور ترند تر بیتگ۔
در آمیدگسی کشگ بیتگیں مردمانی تہ ءَ محمد انور ، راھی عصا ، ایاز ء دوست محمد ، ظریف ء فقیر محمد ، ظریف ء محمد یعقوب ، بالاچ ء حامد ، زوہیب احمد ، ملا رزاق ، عبدالمطلب ، نعمان حیدر ، طاھر ءُ ملنگ ء زاھد ندیم ھوار اَنت۔ محمد انور (کلی سفر علی ، دوکی ءِ نندوک ) جون 2025 ءَ دزگیر کرت اش ءُ جنوری 2026 ءَ آئی ءِ کنٹ چہ دوکی ءَ دست کپت۔کسانسالیں راھی عصا چہ ھوشاپ ءِ بازار ءَ روچ ءِ رژنائی ءَ تیرگواری کنگ ءُ کشگ بوت۔ایاز ( گیشکور آواران ءِ نندوک ) ءُ ظریف ء فقیر محمد ( سیاہ کل ، مالار آواران ءِ جاھمنند ) ءِ تیرسپتگیں کنٹ چہ آواران ءِ ھند نوندڑہ ءَ دست کپت اَنت۔بالاچ ، تسپ ( پنجگور ) ءِ جاھمنند تسپ ءِ بازار ءَ تیر جنگ ءُ کشگ بوت۔ظریف ء محمد یعقوب ، ریک چاھی ، کولواہ ( آواران ) ءِ جاھمنند آوار جنگ ءِ دو ادار ءَ پد کشگ بوت۔ زوہیب احمد چہ پنجگور ءَ آوار جنگ ءَ پد نشانگ کنگ ءُ کشگ بوت۔ ملا رزاق نوانو ، زامران ءِ جاھمنند ءِ کنٹ چہ سیمسوری کور ءَ دست کپت۔عبدالمطلب کلی کمالو ، سریاب ( شال ) ءِ جاھمنند 11 جولائی 2025 ءَ چہ لوگ ءَ دزگیر کنگ ءَ پد 19 جنوری 2026 ءَ دشت ، مستونگ ءَ دروگیں میڑ ءَ کشگ بوت۔نعمان حیدر 19 نومبر 2025 ءَ مند ( کیچ ) ءَ دزگیر کنگ بیتگ ءُ 21 جنوری 2026 ءَ آئی ءِ کنٹ چہ تمپ ءَ دست کپت۔21 سالی ئیں مزدور طاھر 21 جنوری 2026 ءَ کوشکلات ، تمپ ءَ تیر جنگ ءُ کشگ بوت ، 20 سالی ئیں ملنگ ء زاھد ندیم دزگیر کنگ ءَ پد زور بیگواہ کنگ بوت ءُ رند ءَ آئی ءِ کنٹ دست کپت۔
ھنکینانی تہ ءَ ، چہ کیچ ھنکین ءَ 26 ، شال ءَ 16 ، گوادر ءَ 15 ، خاران ءَ 9 ، پنجگور ءَ 6 ، خضدار ءَ 4 ، لسبیلہ ءَ 2 ، کراچی ءَ 2 ، ڈیرہ بگٹی ءُ نوشکے ءَ یک یک کسے زور بیگواہ کنگ بیتگ ۔ بازیں ویلانی تہ ءَ لوگانی سر ءَ بیڑ ، در آمیدگسی دزگیری ءُ ناشناسیں جاھاں زندانی کنگ ءَ پد آزار دیگ ءِ گپ دیم ءَ اتکگ اَنت۔
پانک ءِ رد ءَ پاکستانی فوج ءِ اے کارپد بلوچستان ءَ مردمی اگبالانی بدتر بیوکیں جاور ءَ سھرا کن اَنت۔درشان ءَ گْوشگ بیتگ کہ زور بیگواھی ءُ در آمیدگسی کوشانی دْرچ نانبشتھیں راھبندے جوڑ اِنت ، پہ ایشی ءِ آسر کنگ ءَ شیشار ءُ وتواکیں پٹ ءُ پول ، اے کارانی زمہ ورانی نشاندئی ءُ سانمندیں گر ءُ دار المی اِنت ، داں سانمندیں کھولاں مزدانک بہ رس ایت ءُ بلوچستان ءَ راھبندانی برجاھی الم بہ بیت۔
