بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ راولاکوٹ ، میرپور ، کوٹلی ، مظفرآباد ، باغ ءُ دگہ دمگاں جوائنٹ عوامی ایکشن کمیٹی ءِ سروکی ءَ برجاھیں پرایمنیں زھرشانی ءُ ندانکانی بگیری ءَ پاکستانی لشکر ءِ زوراکی ترندی ءَ ایر جتگ اَنت۔
آئی ءَ گْوشتگ کہ چہ 5 نومبر 2026 ءَ راولاکوٹ ءَ پاکستانی لشکر دست گوشیں شھرمنند ءُ بے میاریں چکاں کشگ ءُ ٹپی کنگ ءَ اِنت۔ شھرمنندانی بگیری ءَ کشندھیں زور کارمرد کنگ ءَ اِنت ، کوروکائی تیرگواری ، ناراھیں دزگیری ءُ مردمی اگبالانی مزنیں بگیری مھترھند ءِ ھما مزنیں بیڑ ءِ بھر اَنت کہ پاکستانی مھترھند ءَ چہ جون 2026 ءَ کشمیر ءِ جتائیں دمگاں برجاہ داشتگ۔ نی داں سد ءَ گیش بے میاریں مردم بیران بیتگ ءُ سداں سیاسی کارکن ءُ پلہ مرز ناراھی دزگیر یا زور بیگواہ کرتگ اَنت۔
پاکستان ءِ مردمی اگبالانی کمیشن ( ایچ آر سی پی ) ءَ 29 اگست 2026 ءَ شنگ کرتگیں وتی پٹ ءُ پولی گزارش ءَ نام گپتیں آزاد جمون ءُ کشمیر ءَ زور ءِ نا برابریں کارمرد ، سیاسی کارکن ءُ تاکارانی دزگیری ، راہ ءُ رسانکانی بندی ءُ جوائنٹ عوامی ایکشن کمیٹی ءِ گپڑے باسکانی ناشرکاری ءِ بگیری ءِ راھبند ءِ چارمی شیڈول ( فورتھ شیڈول ) ءَ ھوار کنگ ءِ سر ءَ سکیں بے تاھیری درشانتگ۔
ڈاکٹر نسیم ءَ گْوشتگ کہ مروچی کشمیری مردم کہ مھترھندی زوراکی ءُ آزار ءِ دیمپان اَنت ، بلوچ راج دھکاں چہ ھمے جاور ءَ گْوزگ ءَ اِنت۔ وھدے کہ بلوچ مردمان وتی راجی اگبال ، پجار ، سرڈگار ، مڈی ءُ پہ سیاسی باندات ءَ توار چست کرت ، آیانی لوٹانی پسو سکیں زوراکیں لشکری بیڑ ، زور بیگواھی ، در آمیدگسی کوش ءُ گوں سیاسی کارکنانی دزگیری ءَ دیگ بیتگ۔
نی ھمے کار کشمیر ءَ بیگ ءَ اَنت ، کہ سرکاری نام ئِے ’’ آزاد جمون ءُ کشمیر ‘‘ گْوشگ بیگ ءَ اِنت ، دمگ ءِ مردم وتی بنکی سیاسی ءُ شھری اگبالانی پرایمنیں لوٹ ءِ سر ءَ پاکستانی مھترھند ءِ سرجمیں زور ءِ آماچ اَنت۔ ڈاکٹر نسیم ءَ گْوشتگ کہ کشمیری مردم چہ وتی اے بنکی اگبال زبھر کنگ نہ بہ اَنت کہ آ وتی باندات ، سیاسی بستار ءُ الباریں پجار ءِ کارشور ءَ وت بہ کن اَنت۔
ڈاکٹر نسیم ءَ کشمیر ءِ مردم دلجمی داتگ اَنت کہ پاکستانی مھترھند ءِ دست ءَ آسر نہ بیوکیں زوراکی سگگ ءِ پژدر ءَ بی این ایم کشمیر ءِ مردمانی گلہ ءَ سرپد بیت۔
بلوچ راج اے سیاہ ترین باریگ ءَ کشمیر ءِ مردم گوں ھم دردی ءَ اوشتاتگ ، ءُ بلوچ راجی زْرمبشت پاکستانی مھترھند ءِ بگیری ءَ کشمیریانی مادن ءُ راستیں جھد ءَ ھمک رنگیں سیاسی ، کردانکی ءُ سفارتی پلہ مرزی کنگ ءَ ساڑی اِنت۔
