بلوچ راجی زْرمبشت ( بی این ایم ) وانگ ءُ زانگی تک ءِ نیادے برجم دارگ بیتگ ، کہ آئی ءِ پاگواجھی بی این ایم ءِ سرکماش ڈاکٹر نسیم ءَ کرتگ۔ نیاد ءَ بی این ایم ءِ وانگ ءُ زانگی کارانی ڈبوزیر ڈاکٹر جلال ءَ ھوار ماں جتائیں ڈیھ ءُ دمگاں تکانی کماش ءُ کارگشاداں بھر زرتگ۔ نیاد ءِ مول ھمیش اَت کہ گْوستگیں چار سال ءِ تہ ءَ وانگ ءُ زانگی تک ءِ سرگرمی ءُ تْرامگیج ءِ کارکرد ءِ چار ءُ ٹپاس ءُ دیم تر ءِ راہ ءُ شونداتانی سر ءَ گپ ءُ تْران بہ بیت۔
ڈاکٹر نسیم ءَ تْرامگیج ءِ ارزشت ءُ سیت ءِ سر ءَ گپ جتگ ، آئی ءِ کار ساڑاتگ اَنت ءُ گْوشتگ کہ اے مئے وش بھتی اِنت کہ ما انچیں گلے ءِ باسک ایں کہ پہ وتی جھدکارانی توان ءُ بودشت ءِ ردوم دلگوش دنت ۔
ڈاکٹر نسیم ءَ دیم تر ءَ گْوشتگ کہ راجمان پتر ءِ نیاد ءَ پہ گل ءَ تْرامگیجی کار ڈولے جوڑ کنگ بیتگ ، ھمائی ءِ پد ءَ مروچی گل ءِ جتائیں تْرامگیج شریں وڑے ءَ وتی کاراں کنگ ءَ اَنت۔ تْرامگیجانی کارانی برورد ءَ گْوستگیں چار سال ءِ تہ ءَ جھدکارانی لڑے ساجو بیتگ ، ءُ پہ ھر گل ءِ سوبمندی ءَ المی اِنت کہ آئی ءِ کاری ئیں مردم ءُ راھشونانی کارانی دست گروک بہ بیت۔
نیاد ءِ تہ ءَ وانگ ءُ زانگی تک ءِ جھگیر حفیظ ءَ چار سالی کارکرد ءِ گزارش پیش کرت۔ آئی ءَ تْرامگیج ءِ نیمگ ءَ برجم دارگ بیتگیں جتائیں ھیلکاری سرگرمی ، مراگش ءُ نیادانی سر ءَ پتر سھی کرت۔ گزارش ءِ رد ءَ گْوستگیں چار سال ءِ تہ ءَ جتائیں بنگپاں 499 وانگ ءُ زانگی نیاد ( سٹڈی سرکل ) برجم دارگ بیتگ ، بنجاھی تک ءَ 30 ءُ ھنکینانی تک ءَ 469 مراگش بیتگ۔ چہ ایشی ءَ ابید جتائیں بنگپاں چار ھیلکاری نیاد ( ورکشاپ ) ھم برجم دارگ بیتگ۔
اے درگت ءَ گل ءِ سرگرمیانی چد ءُ گیش سانمند کنگ ، جتائیں تکانی میان ءَ راھوتداریانی گھتر کنگ ءُ ھیلکاری ءِ کاراں یکشل ءَ دیم ءَ برگ ءِ سر ءَ کڈن بیتگ۔ بھر زیروکاں کڈن کرتگ کہ گل ءِ تْرامگیجی تک ءَ ھیلکاری ءُ توان ساچی سیاسی گلے ءِ سانمندیں کارکرد ءِ تہ ءَ بنکی ارزشتے دار ایت۔
نیاد ءَ دیم تر ءِ راہ ءُ شونداتانی سر ءَ ھم سوڑگ بیتگ۔اے رد ءَ دیم تر ءَ ھیلکاری نیاد ، ورکشاپ ءُ دگہ لیکہ ءُ تْرامگیجی سرگرمیانی برجم دارگ ، پہ تکانی کارکرد ءِ گھتر کنگ ءَ وانگ ءُ زانگی تک ءِ کاراں جْوان تریں رنگے ءَ تْرامگ ءِ سر ءَ دلجمی ءَ تْران بیتگ۔
بی این ایم ءِ کمک سرکماش ءُ وانگ ءُ زانگی تک ءِ سروک ڈاکٹر جلال ءَ گْوشتگ کہ پہ سیاسی زْرمبشتے ءِ توانمندی ءُ سانمندیں دیمروئی ءَ جھدکارانی سیاسی ءُ سسائی ھیلکاری بنکی ارزشتے دار ایت۔ وانگ ءُ زانگی تک ءِ جھدکارانی توان ءِ گھتر کنگ ، گل ءِ آگاھی ءَ گیش کنگ ءُ آیاں گوں راجی زْرمبشت ءِ لوٹاں ھم آھنگ کنگ ءَ پر ارزشتیں کردے پیلو کنگ ءَ اِنت۔ آئی ءَ کڈن کرتگ کہ اے کار ءِ چد ءُ گیش سانمند کنگ ءُ تْرامگ ءَ درسیں تکاں پرکار بیگی اِنت۔
گڈی ءَ آئی ءَ گْوشتگ کہ گْوستگیں چار سال ءِ تہ ءَ مئے تْرامگیج ناں ایوک ءَ 499 وانگ ءُ زانگی نیاد برجم کنگ ءَ سوبمند بوتگ ، بلکیں اے وھد ءَ گل ءِ سلیبس ءِ بارہ ءَ ھم مزنیں دیمروئی بیتگ ، کہ چار کتاب ءُ 6 کتابک شنگ بیتگ کہ وانگ ءُ زانگی تک ءِ کاری ئیں باسکانی کوشستانی برورد اَنت۔