بلوچستان ئٹی زوراکی ئٹ بیگواہ کننگ تینا ایسری سیم آٹے۔ بی این ایم نا بندغی حق آتا ادارہ پانک ئنا رپورٹ نا رد ئٹ دا تو ئنا 5 دے ئٹی 48 بندغ زوراکی ئٹ بیگواہ کننگانو ہرافتان 35 بندغ ئے پاکستان نا فوج قلات آن دزگیر کننگ آن پد بیگواہ کرینے، ہندن 5 بندغ ئے زندان ئٹی کھسفنگانے۔
دا ہیت ئے بلوچستان نیشنل موومنٹ نا جارکش تینا بیان ئٹی کرے۔ او بلوچستان ئٹی بندغی حق آتا خراب مروک انگا حالیت آ پریشانی نا درشانی ئے کریسہ پارے کہ زوراکی نا بیگواہی تا شابیت حوال اسہ بیان ئسے ٹی مونا ہتنگ مفک۔ نن جہان نا بندغی حق آتا ادارہ آتان خواست کینہ کہ او بی این ایم نا بندغی حق آتا ادارہ پانکhttps://x.com/paank_bnm نا شنگ کروک رپورٹ آتا نظر شاغِر ہرا بلوچستان ئٹی بندغی حق آتا لتاڑنگ ئے پک انگا ذریعہ تے ئٹ رپورٹ کننگ ئے۔ دا رپورٹ آک ظاہر کیرہ کہ بلوچستان اسہ بھلو بندغی بحران ئسینا گواچی ئے و بلوچ قوم نسل کشی تون مون تننگ ئے۔
جارکش پارے کہ بلوچستان ئٹی ہزار آتا کچ بندغ آک زوراکی ئٹ بیگواہی نا گواچی مسونو ہرانا سوب تیوہ بلوچ قوم اذیت ئے۔ بلوچ قوم ظلم و بیدادی تا برخلاف مدام توار بڑز کننگ ئے ولہ ریاست نا بیدادی گھٹ مننگ نا جہہ آ ودھانے۔ نیاڑی و چناک ہراتم تینا دوستخواہ تیکن برانز کیرہ تو اوفتے بیدادی نا گواچی کننگِک و اوفتے بیگواہ کننگ نا کوشست کننگک تانکہ او دا برانز آن دو کشیر۔
او پارے کہ نن دا ظلم و بیدادی تا برخلاف ہچ بے توار مروفن۔ پاکستان بلوچ قوم ئنا آجوئی نا جنز ئنا سوب بلوچستان ئٹی تینا طاقت ئے گوہانے۔ ہندا سوب پاکستان تینا بے سہبی ئے ڈھکنگ کن الس ئے تینا ظلم ئے نشان تننگ ئٹی ئے تانکہ خُلیس نا ذریعہ ئٹ بلوچ قوم آ تینا قوضہ ئے سوگو کننگ کے۔ نن خبڑدار کینہ کہ بلوچ قوم آ زور شاغنگ گیشتر دتر وہنگ نا سوب مرو۔
بی این ایم نا جارکش پارے کہ بلوچ قوم تینا آزاتی آن اسہ گام ئس ہم پدی مروف، ہرا قربانیک تننگ مننگ ئٹی ءُ اوفتا خواست ئے کہ تیبہ قوم اسہ جہہ آ مریسہ تینا راجی جنز ئے سوگو او وڑ ئسے ئٹ مونا دے۔ ہرا وخت اسکان بلوچ قوم غلام ئے زوراکی نا بیگواہی و وے قانودی ئٹ کوش ئنا سلسلہ ایسر مروف۔
جارکش بی این ایم نا باسک آتے پارے کہ او بلوچستان ئٹی زوراکی ئٹ بیگواہ مروکا تا خاہوت آتیتو اسٹی نا درشانی ئے کریسہ اوفتا ہمت و حوصلہ ئے زیات کیر و بلوچ راج ئے اسٹ کیر ۔ بی این ایم نا پیشن ملک آتیٹی رہینگوکا باسک آک بلوچ قوم ئنا توار مریسہ جہانی ضمیر ئے چھنڈیفر و آزات بلوچستان کن جہانی حمایت ئے گیشتر کننگ نا کوشست ئے کیر۔
جارکش ایسر ئٹ پارے کہ دا تو ئٹی 27 مارچ آ بلوچستان آ پاکستان نا قوضہ نا برخلاف بی این ایم جتا جتا مُچی تا ذریعہ ئٹ زوراکی نا بیگواہی و وے قانودی ئٹ کھسفنگ نا واقعہ تے جہان نا مونا ہتو۔ بنجاہی مُچی جنیوا ٹی مرو ہراڑے اسہ سوگو او مہم ئسینا ذریعہ ئٹ جہانی ادارہ آتے بلوچستان ئٹی مروک ظلم و بیدادی تان سوھو کننگو۔
