بلوچ نیشنل موومنٹ نا جارکش شہید اکبر خان بگٹی نا (17)ہوودہمی شہادت نا دے آ اودے سلامی تریسہ پارے کہ شہید اکبر خان بگٹی اسہ ہندنو قد آور و بھلو ہستی سینا پن ئے کہ اینو ہر بلوچ اودے تصور و روح ئٹی محسوس کیک ۔ او پیرانسری و بیماری تا باوجود انگہ مزاحمت نا کسر ئے تینائی کریسہ راج دفتر ئٹی اسہ باب ئس اضافہ کرے۔
ہندُن کہ میر محراب خان انگریز سرکار نا اسہ جلہو ئسے نا برخلاف آ مزاحمت کرِسہ تاریخ ئے اسہ پوسکنو کسر ئس تِس ، ہندا روایت آتا پاسداری ئے کریسہ میر محراب خان نا نقش قدم آ ہنِسہ شہید اکبر خان بگٹی بلوچ قومی مزاحمت ئے تاغت ئس بشخا ۔
مرکزی جارکش پارے کہ نیشنلزم نا بنیات آ جدوجہد کروکا سیاسی رہنماء و کارکن ہروخت تینا راج ئنا باوہ ءُ پیرہ (اسلاف) نا روایات و نظریات آن مریک و شہید اکبر خان بگٹی ہم ہندُنو شخصیت ئسے نا مالک ئسک ہَراکِہ تینا زبان و روایات تون محبت کریکہ۔ہَراوخت او خنا کہ زمین، راجی بقا و چائند ،زبان و تہذیب و روایات آک خطرہ ٹی ءُ ، و پاکستان بلوچ سرزمین آ واضع ڈیموگرافک بدلی ہتنگ و بلوچ ئے سرزمین آن بے دخل کننگ نا حکمت عملی آ کاربند مسُنے و عسکری تاغت تون بلوچ راجی وجود ئے گوئنگ کے جتاؤ میگامنصوبہ عمل ئٹی ہتنگ ئٹی ئے تو او سخت موقف ئے تینا کریسہ تینا جان ئنا پرواہ کننگ آن بغیر پاکستان و بلوچ نا نیام ئنا لکیر ئے پین واضح کرے ۔
جارکش مُستی پارے کہ شہید اکبر خان اسہ مُر ہروکو سیاسی رہنماء و جہان ئٹی بدل مروکا پالیسی تا واضع فہم تخاکہ ۔ او اول پاکستانی پارلیمانی ذارئع ئے کارمرز کرے وخت ئسکہ آخری عمر ئٹی دا نتیجہ غا بس کہ دا بیرہ پنی آ پاکستانی پارلیمانی نظام بلوچ راجی سوال نا حل اف و پاکستان بروکا دے تیٹی بلوچ کہ زمین ئے پین زیات تنگ کیک تو او مزاحمت نا کسر ئے تینائی کننگ نا فیصلہ ئے کرے ، و شہادت اسکان او تینا فیصلہ آ قائم سلیس ۔
جارکش پارے کہ نواب اکبر خان بگٹی سطحی مراعات و مفادات کے نہ بلکہ تینا جان ئے بلوچ راجی بقا و آجوئی کے ندر کرے ۔ شہدا نا وارث بلوچ راج ئے و بلوچ شہدا نا مشن کے ہچو قربانی سے آن ہم پد سلوف و نئے کہ کس ئسے اجازت ایتک کہ او شہدا نا قربانی تا پڑدہ ٹی بلوچ راج ئنا قسمت تون گوازی کے ۔
