نیدرلینڈ: بلوچ نیشنل موومنٹ نیدر لینڈ ہنکین نا کنڈ آن نیدرلینڈ ایمسٹرڈام اسکوائر ئٹی زوراکی ئٹ بیگواہی تا جہانی دے ئنا رد ئٹ برانز کننگا و ریلی ئس کشنگا ۔ برانز ئٹی بلوچ نیشنل موومنٹ نا باسک آتا بھلو کچ ئس بشخ ہلک. برانز کروکاک بلوچستان ئٹی زوراکی ئٹ بیگواہی نا گواچی مروک بندغ آتا عکس و پلے کارڈ ہرفیسُر ہرافتا بندغی حق آتا خلاف ورزی تا برخلاف نعرہ نوشتہ کروک اسّ۔
برانز کروک آتے آن شاری ولید، علیاء بخشی بلوچ، اسلام مراد بلوچ، باسط ظہیر بلوچ، عبدالوحید، زھرا بلوچ، مہیم عبدالرحیم ، عبدالواحد و ڈاکٹر لطیف بلوچ ہیت کریسہ پاریر کہ دا وخت آ بلوچستان ئٹی پاکستانی فوج و ڈھکوک ادارہ آتا دو آن ہزار آ بندغ آک زوراکی ئٹ بیگواہ کننگانو ہرافتیٹی سیاسی باسک، خوانندہ، وکیل و لس شاریک اوار ءُ، ہندن ہزار آتا جشوک جون آک دو تمانو۔
او پاریر کہ بلوچستان ئٹی پاکستانی فوج بیگواہی نا پاش و ساف او سوب مونا ہتپک، و گیشتر بندغ آک واپس یلہ کننگ مفسہ، یا اوفتا جشوک آ جون آک دو تمرہ ہرافتا بیدادی نا نشان مریک. پاکستانی فوج ئنا زوراکی بھلو وخت ئسے آن برجاء ئے ہرا بندغی حق آتا اسہ بھلو مسلہ ئسے۔ دا خطہ نا ہندی آ بندغ آتے ریاستی زوراکی ، کاریم و کمائی نا مسلہ و نا انصافی تون مون تروئی تمک، ولہ جہانی برادری دا کھل زوراکی تا اسل ہِچ کُچِنگ اف۔
بلوچستان ئٹی فوجی آپریشن آک، وے قانودی ئٹ کھسفنگ و لس شاری تیتو وے بندغی وڑ ئٹ پیش بننگ نا وڑ انگا عمل آک ہڑدے نا کاریم جوڑ مسونو، پاکستانی فوج ئنا کنڈ آن بلوچستان ئٹی زوراکیک ہڑدے نا بنیات آ مننگو، جتا جتا انگا تنظیم آک ہر وار دا واقعہ آتا ذمہ وار آتے سزا تننگ نا خواست ہم کرینو ولہ داسکان ہچو گامگیج ئس ہرفنگ متنے۔
ایسر ئٹ او پاریر کی جہانی برادری و بندغی حق آتا تنظیم آک بلوچستان ئٹی زوراکی ئٹ بیگواہی و پاکستان نا زوراکی تا برخلاف توار ہرفِر و اوفتا پابندی خلنگ مرے۔
