بلوچ نیشنل موومنٹ ( بی این ایم ) نا نمائندہ سمل بلوچ جنیوا ٹی اقوام متحدہ نا انسانی حقوق کونسل ( یو این ایچ آر سی ) نا 57 می اجلاس اَن خطاب کریسہ پارے بلوچ قوم نا خلاف پاکستان نا کُنڈ اَن مروکا سخت اِنگا انسانی حقوق نا خلاف ورزیک کلُاتا مونءِ پاشءِ۔ ھو پاکستان نا جبرو ستمءِ سرجمی ئٹ مونءِ ایس ، بلوچستان نا داسانا حالیتءِ بین الاقوامی توجُو تننگ و ہوفتے زوتس تورنگ نا خواستءِ کرے۔
تینا تقریر نا وختءِ ، سمل بلوچ بلُو کچ سے ئٹ جبرئٹ بیگواہی تا اِیتءِ کریسہ پارے بلوچستان ئٹی ہزارآتا کچ ئٹ شاری مخلوکءِ پاکستان نا فورسز آک بیگوا کرینءُ ، ارافتہ ہچُو خبرئس اَف۔
ھو بلوچ انسانی حقوق تنظیم پانک نا حساب نا حوالہءِ تِس ، ارانا وڑئٹ جنوری 2024 اَن الیس جون 2024 اِسکان 269 بندغ آتے اراٹی نرینہ ، زالبول و چُنا ھوارءُ بیگوا کننگانءُ۔ داڑن بیدس ، 25 بندغ بغیرس عدالت سینا حکم اَن کسِفنگانءُ و 160 بندغ آتے تشدد کننگانءِ۔
ھو دا کروکا کاریم آتے پاکستانی ریاست نا کُنڈ اَن بلوچ قوم نا حقءِ خود ارادیت نا جُہدءِ دبائفِنگ نا اَسے بلُو سازش ئس سینا کننگ نا کوشست ئس پارے۔ پوجی طاقت نا استعمال ، ٹارگٹ ئٹ کسِفنگ و دھمکی تننگ نا واقع غاک اسِٹ اِرٹ اففَس بلکِن بلوچ قومءِ چپ کننگ کِن باز وڑو چم کننگ ئٹیءِ۔
سمل بلوچ پارے ریاست نا وڑک خالی سیاسی انگا بندغ آتِیکن اففَس بلکِن عام انگا شاری مخلوکءِ ہم نشانہ کننگانءِ ، اراڑن بلوچستان ئٹی خوف و جبرئنا ماحول ئس جوڑ مسہونءِ۔
دا خلاف ورزی تا زیات مونءِ بننگ اَن پد ہم ، بین الاقوامی ردعمل اَنگتہ نہ بننگ حیرانی نا اِیت ئسے عالمی ادارغاتہ پارغن بلوچ بحرانءِ تورنگ ئٹی کمی خننگیک۔
ھو پارے انسانی حقوق نا خلاف ورزیک ارا نسل کشی اَن کم اففَس، ارہادے بین الاقوامی برادری یک کش ئٹ لگتمال کرینءِ۔ دنیا نا بے عملی بلوچ قوم تون بُلو نا انصافی ئسءِ۔
تینا خطاب نا ایسرئٹ سمل بلوچ اقوام متحدہ و عالمی برادری اَن خواست کرے کہ ھو بلوچستان ئٹی مروکا زیادتی تیکِن پاکستانءِ جوابدہ کریفِر۔ ھو اقوام متحدہ نا جنرل اسمبلیءِ زور شاغیسہ پارے کہ ھو اسے قرارداد ئس منظور کے اراٹی بلوچ قوم نا زی آ پاکستان نا ہر وخت مروکا جبر نا خلاف و آزات و خود مختیار بلوچ نا ریاستءِ مننگ کِن مونءِ بریر۔ دا ظالمیءِ تورنگ کِن و بلوچ مخلوک نا حق خودارادیتءِ برجا تخنگ اہمءُ اِیت ئسءِ۔
سمل بلوچ تینا تقریر ئٹی بلوچستانءِ انسانی حقوق نا سخت اِنگا حالیتءِ پاش کرے ، بلوچ قوم نا یک کش ئٹ تشدد و جبرءِ تورنگ کِن زوتس ھوار مننگ نا خواستءِ کرے۔
ھو پارے بلوچ جُہد خالی اَسے علاقائیءُ مسلئہ ئس اَف بلکِن عالمی انسانی حقوق و انصاف نا مسلئہ ئسءِ۔
