بلوچ نیشنل موومنٹ (بی این ایم) برطانیہ نا جتا جتا شار تیٹی اسہ سوگو او سوھوی مہم ئس اڈ تس ہرانا مسخت بلوچستان ئٹی برجاء آزاتی نا جنز، بندغی حق آتا سخت انگا لتاڑ و ریاستی زوراکی تے جہانی پڑ آ نشان تروئی اسک۔ دا مہم نا ذریعت ئٹ برطانیہ نا اُلس و جہانی رائے عامہ ئے بلوچستان ئٹی زوراکی ئٹ بیگواہی، سیاسی باسک آتے آ لٹ ئہ کٹ و ظلم آتے آن سوھو کننگا۔
دا مہم 17 اپریل آ لندن نا پنی آ ٹرافلگر اسکوائر آن بنا مس ، ہراڑان پد 19 اپریل آ آکسفورڈ سٹی سینٹر ، 21 اپریل آ کنگز پریڈ کیمبرج ، 25 اپریل آ بچانن اسٹریٹ گلاسکو ، و اخیر ئٹ 27 اپریل آ مانچسٹر ئٹی الس ئنا حال حوالی آ مہم برجاء مسک۔ بی این ایم نا باسک آک دا ہند آتے آ 5 ہزار آن زیات سوھوی نا پمفلٹ بشخار و کسری تیتو مون پہ مون گپ کرِسہ بلوچستان نا ساڑی آ حالیت آتان سوھو کریر۔
سوھوی مہم نا وخت آ بھازیکا بلوچ یکجہتی کمیٹی(بی وائی سی) نا مہبر آتا برخلاف داسہ نا ریاستی کریک ڈاون آ روشنائی شاغنگا۔ دا مہبر آتے وے قانودی وڑ ئٹ دزگیر کننگا۔ و اوفتے آ سٹّی او مقدمہ جوڑ کننگا۔ دا پہلو مہم نا بھلا مسخت اسک ہرانا ذریعت ئٹ جہانی ایلمکو نا پام ئے دوئی کننگ نا کوشست اسک۔
تنظیم نا رد ئٹ دا سوھوی مہم نہ بیرہ بلوچستان نا الس ئے درپیش زوراکی تا نشان تننگ اسک بلکن دا اسہ سنجیدہ او کوشست ئس اسک کہ جہانی پڑ آ دا جیڑہ آتے مونا ہتنگ مرے و جہانی ادارہ آک بلوچستان آ پام ایتِر۔
