لندن: چھار شنبے نا دے بی این ایم نا ہوشاب ئٹی پاکستانی فوج ئنا دو آن بلوچ ذالبول نور جان نا غیر قانونی دزگیری، دروغ و بے بنیاد آ ایف آئی آر و بلوچ نودربر آتا جبر ئٹ بیگواہ کننگ و پروفائلنگ نا بر خلاف برانز کننگا۔
برانز ئٹی بھلو کچ ئسیٹی بی این ایم نا باسک آک اوار مسُر۔ برانز کروکاک بلوچستان ئٹی برجا آ پاکستان نا بربریت و انسانی حق آتا خلاف ورزی نا بر خلاف پلے کارڈ ہم ہرفیسُر۔ برانز کروکا تیٹی بی این ایم نا بھلا جونئیر جوائنٹ سیکریٹری حسن دوست،سینٹرل کمیٹی باسک نیاز بلوچ ،مھناز و ماسٹر منظور ہیت کریر۔
ہیت کروکاک تینا ہیت آ تیٹی ہوشاب بلوچستان ئٹی نور جان نا بغیر عدالت آن دزگیری نا سخت انگا لوز آ تیٹی مذمت ءِ کریر و پاریر کہ اینو پاکستان بلوچستان ئٹی کُل جنگی قانون آتا خلاف ورزی کننگ ءِ ۔ اینو بلوچ چادر و چھار دیواری ءِ پرغسہ بلوچ نیاڑی تے دزگیر کننگ آن پد دروغ نا ایف آئی آر جوڑ کیک کہ دا انسانی حق آتے تذلیل کننگ نا برابر ءِ ۔ پاکستان نا ریاست اینو نہ بلکہ بھلو مدت ئسے آن بلوچستان ئٹی نیاڑی بیگواہ کننگ تون اوار اوفتے اذیت خانہ تیٹی آزار کننگ ءِ ہمو زلم ءِ اینو ودیفینے۔
ہیت کروکاک پاریر کہ اینو دشمن ارا چالاخی ئٹ شاری بلوچ نا کاریم ءِ جواز اس جوڑ کریسہ بلوچ زالبول آتا تذلیل ءِ کننگ ءِ و کُل نیاڑی و نرینہ تے خُلیفنگ نا کوشست کننگ ءِ ۔ زرینہ مری آن ہلیس سد آتا ھساب آ بلوچ زالبول آ تے ارا کاریم نا بدل ئٹ جبر ئٹ بیگواہ کرینے۔ دا ہندا ہیت ئنا دلیل ءِ کہ پاکستان تینا شکست ءِ خننگ ءِ۔ او تینا شکست ءِ ڈھکنگ کن بلوچ سرمچار آ تے بلیک میل کننگ کن دونو غیر اخلاقی تو جیل آتے کننگ ءِ تانکہ بلوچ تینا آجوئی نا زرمبشت آن دو بُرز کے ولے بلوچ فیصلہ کرینے کہ اود غلامی نا زنجیر آن پیشتمنگ کن ہرچ وڑ ئنا زُلم و رواخی تے ہمت ئٹ مون ایترہ ولے تینا آجوئی نا تحریک ءِ ہچ وڑ ئٹ یلہ تننگ کپسہ۔
ہیت کروکاک پاریر کہ اینو بین الاقوامی انسانی حق آتا ادارہ آتون اوار اقوام متحدہ ءِ بلوچستان ئٹی دو ءِ شاغنگ خوائک۔انتئیکہ اینو پاکستان نا لشکر و اونا اڈ تروکا ڈیتھ اسکواڈ انسانی حق آتا کُل قانون تے نت تے ئٹ لغت کننگ ءُ و بلوچ اُلس ئنا نسل کُشی کننگ ءُ۔ اندا سَوب آن اقوام متحد نا زمہ واری جوڑ مریک او بلوچستانءِ اسے جنگ زدہ ءُ ہند ئس قبول کے و مداخلت کے۔
تصویر :
