شال : بلوچ نیشنل موومنٹ نا شعبہ سماجی بہبود باڈر نا بند مننگ و کمءُ کچءَ سیٹی کاروبار نا موقع تننگ نا وجہ اَن بلوچستان ئٹی پیش بروکا کاروباریءَ چیلنج آتے مونءِ اتنگ کِن اَسے رپوٹ اَس شِنگ کرینءِ ۔ رپوٹ ئٹی برطانیہ نا قوضہ کننگ اَن پد بلوچستانءِ بشخ و بانٹ کننگ اَن خطہ ٹی دائنا اثرات آک و داسہ ئنا پوُسکنا کالونیل جبر ئنا حالیتءِ بیان کننگانءِ۔
بلوچ قوم نا حالیتءِ داوڑئٹ مونا اتِنگانءِ کہ ھو تینا شناخت ، ثقافت ، تعلیم و پاکستان نا قوضہ و بلوچستان ئٹی زیات مروکا معاشی اِنگا بحران آک و بازنگا حملہ غاتے سگیسہءِ۔ رپوٹ نا مطابق ئٹ بلوچستان ئٹی خاصءُ صنعتیءُ ڈھانچہ اَس ہم اَف۔ ضلعءِ لسبیلہ نا شار ھب اَسِٹ انگا صنعتیءَ شارءِ ولے داڑے ہم غیر مقامی انگا بندغاتءِ روزگار تننگانءِ بلوچستان نا شاری آ مخلوکءِ روزگار نا اننا کم انگا موقعغاتَن ہم زبار کننگانءِ ۔
رپوٹ ئٹی خاص کر مغربی آ باڈر آتیٹی تجارت و راہداری نا بارسٹ توجو تننگانءِ۔ رپوٹ ئٹی خاص انگا تجارتی راہداریک تفتان ، ماشکیل ، ابدوئی ، پیشین ، مند ، ریمدان ، کوھک ، پروم ، پسابندن ، گوتر و کلانی کنٹانی ھور ھوارءُ داڑے تاجر آتے پیش مروکا مشکلات آتے بیان کننگانءِ ارافتیٹی بھتہ خوری ، ٹوکن سسٹم ، ناقص انگا روڈآک و باڈر نا بے وجہ بند مننگ ھوارءِ۔رپوٹ ئٹی باڈر نا ہر وخت بند مننگ و مَلِنگ اَن تاوان تِروکو اثرات آتا اِیت آک پاننگانءُ اراڑن لنگڑی و بے روزگاری بے کَچ زیات مسونءِ۔
داڑن بیدس ، رپوٹ ئٹی پاکستان نا پوج و مقامی انگا مافیا نا نیمہ اَن بلوچستان نا زی آ شاغوکءَ بے بنیاتی انگا معاشی نظام نا زی آ ہم توجو تننگانءِ و روزگار نا اسیوارئٹ سَلِنگ اَن ہم تباہی بَش مریک و خطہ ٹی مخلوک ڈوکال تون مون پہ مون مریک۔ رپوٹ ئٹی بلوچ قوم نا حالیت نا زی آ عالمی بیداری و ایڈوکیسی نا ذریعہ ئٹ خطہ نا کاروبار و روزگار نا وڑآتِیکن و انسانی کمک نا زوتس زلورت کِن خواست ہم کننگانءِ ۔
