ڈاؤن لوڈ ، پمفلٹ :
https://thebnm.org/wp-content/uploads/2025/02/Pamphlet12025.pdf
سیئٹل واشنگٹن: بلوچ نیشنل موومنٹ امریکہ نا شیاری تان خواست کرینے کہ او بلوچ قوم ئنا راجی آجوئی نا مُخ تفی ئے کیر، بلوچستان ئٹی برجاء پاکستانی بے دادی تا برخلاف توار بڑز کیر و تینا سرکار آن خواست کیر کہ او پاکستان ئے تِروکا غُٹ مالی و فوجی کمک ئے زوت آن زوت بند کے۔
بی این ایم نا باسک آک امریکہ نا اُلس ئے پوہ کریر کہ امریکہ تینا ٹیکس تروکا تا زر آتان پاکستان ئے ارب آتا کچ ڈالر کمک تسونے، ہرافتے پاکستانی فوج بلوچ اُلس ئنا برخلاف کارمرز کننگے۔
دا پوہی مہم نا رد ئٹ بی این ایم نا باسک آک سیئٹل ئٹی سد آتا کچ پمفلٹ بشخار ہرافتیٹی بلوچستان نا حالیت آتا بارو ئٹ نوشتہ کننگاسَس۔
بلوچستان :اسہ قوضہ مروک او قوم ئس: نا سرحال ئٹ دا پمفلٹ ئٹی پاکستان نا وے قانودی قوضہ ، برجا انگا ریاستی بے دادی و بندغی حق آتا بھلو کچ ئسے ئٹ مروکا خلاف ورزی تا تفصیل اوار ءُ۔
پمفلٹ ئٹی پاکستان نا سوگو آ پالیسی نا رد ئٹ زور ئٹ بیگواہی و وے قانودی ئٹ کوش ئنا بارو ئٹ نوشتہ کننگانے۔ بی این ایم نا رد ئٹ 2009 آن پد پاکستان بیگواہی و وے قانودی ئٹ کوش ئنا پالیسی ئے "آپریشن سائلنس” نا رد ئٹ تیز کرینے ۔ ہزار آتا کچ بلوچ آتے زوراکی ئٹ بیگواہ کننگانے ہرافتان گیشتر واپس بتَنو۔
بی این ایم نا بندغی حق آتا ادارہ پانک نا رد ئٹ بیرہ فروری 2025 ئٹی 65 آن گیشتر بندغ ئے زوراکی ئٹ بیگواہ کننگا ہندن مُسہ بلوچ ئے وے قانودی ئٹ کھسفِنگا۔
بی این زور شاغا کہ نوآبادیاتی دور ئنا ٹپ آک داسکا دراخ متنو و سامراجی طاقت آتا کشوکا مصنوعی سیم آک اینو ہم بندغ آتا ساہ تے ہلِّنگو۔ پاکستان نا 27 مارچ 1948 آ بلوچستان آ قوضہ آن پد بلوچ آتا نسل کُشی برجاء ئے۔ بلوچ نا چائند و دود ءُ ربیدہ آتے گوئنگ کن سوگو او کوشست مننگ ئٹی ئے۔ ہندا وڑ خواننگ، جان جوڑی و پوریا ئے بلوچ قوم ئے پد بٹنگ کن سلاہ نا وڑ ئٹ کارمرز کننگو داڑتو اوار سیاسی باسک، خوانندہ و زانتکار آتے چونڈیسہ کھسفنگ مننگ ئٹی ئے۔
