بلوچ نیشنل موومنٹ (بی این ایم) نا ترجمان پارینے کہ پارٹی نا سینیئر آ باسک قاضی ہاشم بلوچ مرغن او ناجوڑی سیان پد کذیت کرینے۔ اونا کمٹمنٹ نظریاتی ہمگرنچی و جفاکشی آ پارٹی اودے دروت ندر کیک۔ او پارٹی نا اثاثہ اسک، دشمن نا ہر وڑ انگا ظلم و زوراکی آن پد ہم او پارٹی نا پروگرام آن پد سلتَو۔
ترجمان پارے کہ قاضی ہاشم بلوچ جاھو ریجن نا بنائی وخت ئنا سنگت ئس اسک۔ او استاد علی جان و ڈاکٹر منان بلوچ نا خڑک ئنا سنگت ئس اسک او دا ریجن ئٹ پارٹی ئے سوگو کننگ کن بنیاتی کڑدار ادا کرے۔
او پارے کہ قاضی ہاشم بلوچ 25 اگست 2009 آ شہید الطاف بلیدھی نا اولیکو برسی نا وخت آ جاھو نا بھلا بازار باغ ئٹی استاد علی جان، ناکو خیر بخش و شہید حاصل قاضی تون اوار پروگرام نا تیاری کننگ ئٹی اسُر کی فوج ئنا جوڑ کروک ڈیتھ اسکواڈ اوفتیا جلہو کرے، دا جلہو ئٹی قاضی بھاز ٹپی مسک و اونا دو ئس پنا، پاکستانی فوج اونا خلق کوھڑو آ ہراتم وار وار آ جلہو کرے ، و آخر ئٹ تیبہ خلق ئے پلویڑ کرسہ اوڑے کیمپ جوڑ کرے، تو قاضی تینا خاہوت تون اوار دے کہیئلینگی بلوچستان نا کنڈ آ ہجرت کرے، اوڑے اسہ بھلو خاہوت ئسے بھاز مشکل ئٹ سنبھالا ولہ اونا پارٹی تون تعلقداری ٹی ہچو فرق ئس تمتو۔
ترجمان پارے کہ 2013 آ او وخت ئنا پارٹی سیکریٹری جنرل ڈاکٹر منان بلوچ و داسہ نا سیکریٹری جنرل دل مراد بلوچ قاضی ہاشم نا رہبری ٹی سورگر نا مرغن انگا سلسلہ نا دورہ ئے کریر و مش تیئٹ ہندی بھاگیا و مالدار تون تفوک بندغ تیا پارٹی نا پروگرام و آزاتی نا کلہو ئے سر کریر، اوکان پد سورگر بلوچ قومی مزاحمت نا اسہ سوگو او مورچہ ئس ثابت مسک۔
