آواران ئٹی ایجنسی تا بلیک میلنگ آن بیزار مریسہ زالبول ئسے نا خودکشی بندغی حق آتا لتاڑ ءِ پاش کیک۔ جارکش بی این ایم

پاکستانی لشکر کن کاریم کروکو پولیس کارندہ سے نا بلیک میلنگ آن بیزار مریسہ اسکول ٹیچر نجمہ بنت دلسرد خودکشی کرے۔ نجمہ ضلع آواران نا عیلاقہ گیشکور نا خلق زیک ئنا ہندی ئس اسّ۔

اودے نوربخش پنی ءُ پولیس کارندہ ئس چرجوئی ئٹ بلیک میل کریسہ پاکستانی لشکر تون تفوک ڈھکوک ادارہ تیکن مخبری آ بیوس کننگ اس، ہراڑان بیزار مریسہ نجمہ خودکشی کرے۔

دا باز اوسوز ناک ءُ تدینی سے و بلوچستان ئٹی بندغی حق آتا بے کچ لتاڑ آتے پاش کیک۔ بی این ایم دا تدینی نا ترند مذمت ءِ کیک و خواست کیک کہ بندغی حق آتا ادارہ آک دا نا دمدستی نوٹس ہلیر و پاکستان آن ورندی ہلیر۔

بلوچستان ئٹی پاکستانی لشکر نا چرجوئی ئٹ ٹارچر، زوراکی نا بیگواہی و اسہ وڑ تنگ کننگ نا سوب آن دا خودکشی نا اولی تدینی اف۔ تدوکا سال کم آن کم چار بندغ پاکستانی لشکر نا زوراکی تیان براہ راست زیمی مننگ آن گڈ خودکشی کرینو۔

10 مارچ 2022 آ کلاس نوہ ئنا خوانندہ چاکر مجید ءِ پاکستانی لشکر زوراکی ئٹ بیگواہ کننگ آن گڈ زور شاغا کہ او پاکستانی لشکر کن مخبری کے، دا دباؤ نا بھرم ئٹی چاکر مجید تینا ساہ ءِ تس۔

مہیم ولد آسمی 30 اگست 2022 آ خودکشی کرے، اودے پاکستانی لشکر زوراکی ئٹ بیگواہ کننگ نا وخت آ بےدادی نا گواچی کریسس۔ آجوئی آن گڈ او نفسیاتی ناجوڑی تتون مون تننگ اس ہرا نا سوب آن او خودکشی کرے۔

10 نومبر 2022 آ خاران نا ہندی امیرزادی تینا اُرا غا فوج ئنا ہڑدے نا چھاپہ تیان بیزار مریسہ خودکشی کرے۔ اونا خودکشی آن پد اونا ارِغ لطف اللہ یلانزھی ہم تینے سُم ئٹ خلیسہ خود کشی کرے۔

پاکستانی لشکر نا زوراکیک بلوچستان ئٹی بھلو کچ اسیٹ بندغ آتا ذہنی صحت ءِ زیمی کرینو۔ ایف سی و ایلو لشکر تا دروشم ئٹ پاکستانی لشکر نا کارندہ آک بھلو کچ اسیٹ ساڑی ءُ۔ تعلیمی ادارہ، صحت نا بنجاہ و بندغ آتا ذاتی زند ئٹ فوج براہ راست مداخلت کننگ ءِ ہراڑان چاگڑد ئٹی بے جاراتی ودی مسنے۔ تدوکا دے تیٹ پاکستانی حکومت نا کابینہ بلوچستان ئٹی فوج ئنا ساڑی گری نا اجازت تریسہ بلوچستان ئٹی پاکستانی لشکر نا دو آن بندغی حق آتا لتاڑ ءِ قانودی و راہبندی رکھ تس۔ داڑان دا خلیس ءِ کہ پاکستانی لشکر تینا زوراکی تے پین ودفیسہ بندغی حق آتیکن جاگہ ءِ پین تنک کرو۔

جارکش

بلوچ نیشنل موومنٹ