بلوچ نیشنل موومنٹ نا ترجمان پاکستان نا پارغن چِل سال اَن متاثر مروکا ہمسایہ ملک افغانستان نا مہاجرین آتے جبرھٹ ملک اَن کشِینگ و ہوفتے بے وار کننگ نا واقع آتا سخت اِنگا لوظ آتیٹ مذمت کریسا پارے بلو وختءَ سیئن جنگ آتن متاثر مروکا افغان مخلوک بازنگا ملک آتیٹ پناہ گزین نا زندگیءِ تدفنگ کِن مجبور مسونءُ۔ ولے گدرینگوکا گڑاس دے اَن پاکستان نا کُنڈ اَن افغان مہاجرین آتے جبر ھٹ مِڑنگ نا الٹی میٹم تننگ و ہوفتے بازنگا وڑاتیٹ ہراساں کننگ ، ہوفتا جائیدادتءِ زفت کننگ ، ہوفتا ھوراتیں قوضہ کننگ اقوام متحدہ نا عالمی کنونشن نا خلاف ورزیءِ بلکہ افغان مہاجرین آتون ظلم و جبر کننگ نا آخیری حد آکو۔
ھو پارے مہاجرین آک ہر اَسے ملک یا علاقہ سیئن تعلق تِیخرا ، عالمی سطحغءَ ہوفتا حق آک اسیوڑءُ۔مُچ قانودی اِنگا مہاجرین آتے دنیا نا اَسے ملک اَس ہم جبرھٹ مِڑنگ کپپک۔ پاکستان ئٹی عالمی قانوداتءِ لگتمال کننگ ہر دے نا کاریم جوڑ مسونءِ۔ دافتا ہر کاریم عالمی قانوداتءَ برخلاف مسونءِ۔
ترجمان پارے افغان سرزمینءِ پاکستان ہروخت تینا اسٹریٹیجک و پوجی مکسد کِن کارمرز کرینءِ۔سوویت یونین اَن الیس امریکہ نا افغان سرزمینءِ موجود مننگ اسکان پاکستان افغان آتا دیترتا سوداءِ خلیسا کھربا آتا کچ ھٹ پیسہ کٹانءِ۔ افغان مہاجرین تا پِن ھٹ عالمی کمک کروکا ادارغاتن پاکستانی ریاست بے کچ سرمایہ الکُنوءِ امو افغان مہاجرین تا خوش حالی اَن بیدس کرپشن ، بلوچ ، پشتون و سندھی قوم نا خلاف زوراکی تیٹی کارمرز کننگانءُ۔
ترجمان پارے افغان مہاجرین آک حقیقت ھٹ ہورنگءِ پاکستان ئٹی متنءُ بلکہ بلوچ ، پشتون و سندھی قوم نا سر زمین ئٹی آباد مسونءُ۔ پاکستان خالی اَسے جنگی فائدہ ارفوک سینا وڑھٹ میزبان انگا قوماتءَ و افغان مہاجرین آتے لُوٹ ماری کرینءِ۔
ھو پارے افغان مہاجرین آتا پُوسکنا جبرھٹ کشِنگ ، ہوفتا عالمی سطحغءَ رسینگوکا حق آتا خلاف ورزی نا سلسلہ آک تینا آسٹریٹیجک و پوجی مکسدءِ پُورا کننگ ھٹ بے سوب مننگ نا برخلاف شروع کرینءِ۔ افغانستان ہر وخت پیشن نا طاقت آتا خلاف جنگ ئٹی مسونءِ۔ اولیکو افغان اینگلو جنگ اَن الیس سویت یونین و امریکہ نا وڑو سپر پاور انگا طاقت آتا داڑے ساڑی مننگ افغان مخلوکءِ باز زیادہ مذاحمت کننگءِ ھیل تسونءِ و اننا طاقت آتا فائدہ تیکِن جنگ کننگ اَن افغان مخلوک قربان مروکا ایٹ اَس جوڑ مسونءِ۔ اننا جنگ آک افغان مخلوکءِ درپدر ٹھوکر کُوننگ و ذلالت نا زندگی گدریفنگ کِن مجبور کرینءُ۔
ترجمان پارے پاکستانی ریاست نا دا چم بازیک مسونءُ کہ ھو ہر وخت تینا اندرونی معاملغاتیٹ بے سوبیءِ ہمسایہ ملک آتا و محکوم اِنگا قوم آتا زی شاغنگ نا کوشستءِ کرینءِ۔اینو تینا جوڑیفوکءَ علاقہ آتیٹی سیکیورٹی نا حالیتءِ افغان مہاجرین آتا زیءِ خلکُونءِ و ہوفتے وت کش حملہ و پاکستان ئٹی دُزی و بھتہ اللِنگ ھٹ ھوار شاغنگ نا پِن ھٹ لا چار انگا افغان آتے چارمَکُنڈ الکُون و تنگ کریساءِ۔
بنجاہی ترجمان تینا بیان نا آخیر ھٹ پارے مہاجر آتا زندگی اخس درد ناکءِ بلوچ قوم دا دردءِ جوانی ھٹ سرپد مریک۔بلوچ نیشنل موومنٹ پاکستانی ریاست نا دا عمل نا نہ خالی مذمتءِ کیک بلکہ دکھ ، ظلم وجبر و مشکل نا دا وختءِ افغان مخلوک تون ہر وڑھٹ ہمدردی کننگ کِن سلُوکءِ۔
