بلوچ نیشنل موومنٹ نا ترجمان بولان و ہونا خڑک ئنا علاقہ آک سبی و ہرنائی ٹی پوجی آپریشن نا مذمتءِ کریسہ پارے عالمی بندغی حق آتا ادارغاک و مہذب انگا ملک آک بلوچستان ئٹی پوجی آپریشن نا زی آ چُپی ریاستءِ پاکستان موقع اَس تِسونءِ کہ ھو بلوچستان ئٹی بندغ آتا کسِفنگءُ بِٹنگ نا بازارءِ گرم کرینءِ و بندغ آتا زندگیتے پراگندہ کرینءِ۔ پوجی کاروائی آتا وجہ اَن علاقہ نا پیشن مروک و پترینگوک آ کسرتے بند کرینءِ علاقہ نا بندغ آک چارمہ کُنڈ بندءُ نیاڑی و چُناتا زی آ تشدد کننگ ئٹیءِ۔
ترجمان پارے بند انگا علاقہءِ اِننگ بَننِگ و مخلوکءِ راشن اَتِنگ نا زی آ ہم پُورا پابندی خَلنگانءِ ، عام انگا آبادی تِیہا گن شِپ ہیلی کاپٹر و توپ خانہ تیہن بے کچ شیلنگ و بمباری کننگ ئٹیءِ و بمباری کننگ اَن عام اِنگا مخلوک ہم اثرمند مسونءِ۔
“پوج نا چارمہ کُنڈ الوکا و اِننگ و بننگءِ پابندی نا وجہ اَن ننے پُورا حقیقت و حالیتءِ چائنگ ئٹ مُشکل پیش مریسہءِ”۔
ھو پارے پاکستان نا پوج بولان تون ہوار سبی نا علاقہ شابان ئٹی “علیان” پنیءُ بندغ سینا ہورا ٹی چاپہ خلکُنءِ ہوفتہ نیاڑیءُ چُناتے تینتون بندی کرینءِ۔ ڈھاڈر نا خڑک ئنا علاقہ ٹی پاکستان نا پوج گلہ بان ، مالئے و ہونا رشتہ دار و ہوفتہ نیاڑی و چُناتءِ الننگ اَن پد بیگوا کرینءِ انون دا کُل بندغ آتا ہوراتے ہم ہوشانءِ۔سانگان نا علاقہ ٹی جنگلات ہم ہوشانءِ۔
ترجمان پارے نو دے ئنا مروکا پوج کشی اَن پاکستانی پوج نا ظلم و زیادتی آتَن بندغی المیہ اَس ودی مسونءِ ، پوجی اہلکارآک بندی کروکا نیاڑی تے جنگی ڈھال سینا وڑئٹ استعمال کریسہءُ۔ بندغاتہ راشن آک خلاس مسونءُ ، ٹپی مروک آتا علاج مننگ ئٹی اَف انُون جبرئٹ بیگوا مروکا بندغاتہ و پوجی تشدد اَن متاثِر مروکاتہ بارسٹ داسکان ہچُو معلوم داری اَس اَف۔
ھو پارے بولان و ہونا خڑک نا علاقہ نا مخلوک مال و مویشی و زراعت نا شعبہ تون ہوارءِ ولے ریاست مال و مویشیءِ تینا قوضہ ٹی الکُنءِ و بندغ آتے ہوفتن محروم کننگانءِ ۔
ترجمان پارے پاکستان بلوچ قوم نا خلاف جنگی جرم کریسہ ءِ ، بے گناہ و بے سِلہ انگا بندغاتءَ خلاف کروکا آپریشن مُچیءِ سزا تننگ نا حکمت عملی نا بشخ اَسے ہونا خیال ئٹی داوڑ کننگ اَن بلکِن بلوچ قوم مزاحمت و تینا آجوہی نا تحریک اَن مُر مرے ولے دا ریاست نا خام خیالی اَن بیدس پین ہچ اَس اَف ۔
