شال: بلوچ نیشنل موومنٹ نا ہیومین رائٹس سیکریٹری ڈاکسر ناظر بلوچ اقوام متحدہ نا بندغی حق آتتون تفوک ادارہ آتا کماش ، ہیومن رائٹس واچ و ہیومن رائٹس کمیشن آف پاکستان تون اوار 23 آن گیشتر بندغی حق آتا ادارہ آتے چِٹی نوشتہ کرِسہ اوفتیان گچک ئنا رہینگوک نیاڑی و چھنا تا زورانسری بیگواہی تون تفوک زُوت کڑدار ادا کننگ نا خواست کرینے۔
او تینا چِٹی ٹی پارے کہ تدوکا (اِرا دہائی) بیست سال آن بلوچستان ئٹی بندغی حق آتا سخت خلاف ورزی مننگ ءِ ۔ پاکستان نا فوج اشتماعی سِزا نا دروشم ئٹ بلوچ باتی تے ہڑدے نا بنیات ءَ بیدادی نا گواچی کننگ ءِ ۔ بندغی حق آتا خلاف ورزی و ریاستی زوراکی تا درشانی ءِ کننگ کن سیاسی و بندغی حق آتا گل آک چندی پروگرام کرینو تانکہ ہیومن رائٹس واچ و ایمنسٹی انٹرنیشنل نا وڑ ءَ جہانی ادارہ آتے بلوچستان نا ھالیت آتیان سھی کننگ مرے۔
او پارے کہ زورانسری بیگواہی ، جشوک جون آک و اشتماعی قبراک بلوچستان ئٹی بندغی حق آتا خلاف ورزی نا اسہ لڑ اسے ءُ ۔ دا زوراکی تا برخلاف جہانی بندغی حق آتا ادارہ غاک عملی گام ارفنگ نا جاہ تنیا بیان تننگ اسکان تورینو تینے۔ ہندا خاطر زورانسری بیگواہی تا جیڑہ بلوچستان نا کل آن بھلا ویل ءِ ۔
او گچک ئٹی نیاڑی و چھنا تا زورانسری بیگواہی تا باروٹ تینا چِٹھی ٹی نوشت کرے کہ 25 اپریل 2022 نا دے اکن پنجگور نا علاقہ گچک نا خلک کرک ءِ ڈل ئٹی پاکستان نا فوج اشتماعی سِزا نا دروشم ئٹ اسہ اُرا سے ءَ چھاپہ خلک و اسہ کماش ءُ بندغ ہارون بلوچ ، اِرا نیاڑی شاہ بی بی و شہزادی و اسہ شش دے ئنا چھنا سے دزگیر کرسہ بیگواہ کریر۔
ناظر نور ودیک پارے کہ بلوچ نیشنل موومنٹ اسہ سیاسی جماعت ئسے ہرا بلوچستان ئٹی بلوچ راجی اقتدار اعلی و اوفتا حق آتیکن جہد کننگ ءِ ۔ ننا جماعت جتا جتا انگا پلیٹ فارم آتیا پاکستان نا زوراکی تے پاش کرے ہرانا سوب بی این ایم نا چندی کاریم کروکاک زورانسری بیگواہی نا گواچی مسر۔ وَ داسا اوفتا خاہوتاک ہم زوراکی تا گواچی مننگ او ۔
او نوشتہ کرے کہ دا چِٹی نا توسط ئٹ بی این ایم نمے بلوچستان ئٹی بندغی حق آتا لتاڑینگ نا کنڈا چکاری کننگ خوائک ۔ خاص کر گچک ضلع پنجگور ئٹی نیاڑی و چھنا تا زورانسری بیگواہی نا زوت ئنا تدینی ءَ ۔
ہیومن رائٹس سیکریٹری (بی این ایم) گڈ سرئٹ نوشتہ کرے کہ ننے داڑا تیوہ یخین ارے کہ بندغی حق آتا ارارہ غاک بندغی حق آتا خلاف ورزی تے توننگ کن ارزشت ءُ کڑدار ئس مون ءَ ہتنگ کیرہ۔ ہندا بنیات ءَ نن نمے آن خواست کینہ کہ بلوچستان ئٹی بندغی حق آتا لتاڑینگ نا نوٹس ہلِسہ بلوچستان ءِ بندغی بحران آن رکھ تِننگ ئٹی تینا کڑدار ءِ مونی ہتیر۔
