بلوچ نیشنل موومنٹ (بی این ایم) کے زیرِ اہتمام نیدرلینڈز میں ایک احتجاجی مظاہرہ اور ریلی کا انعقاد کیا گیا، جس میں بلوچستان کے ضلع سوراب (گدر) میں پاکستانی فضائیہ کی بمباری کی شدید مذمت کی گئی۔ مظاہرین نے اس حملے میں خواتین اور بچوں سمیت عام شہریوں کی ہلاکت پر شدید تشویش کا اظہار کرتے ہوئے عالمی اداروں سے واقعے کا فوری نوٹس لینے اور متاثرین کو انصاف فراہم کرنے کا مطالبہ کیا۔
مظاہرے سے خطاب کرتے ہوئے بی این ایم کے ممبران ڈاکٹر لطیف بلوچ، شئے جامی اور عصاء بجار نے سوراب بمباری کو ایک سنگین انسانی سانحہ قرار دیا۔ ان کا کہنا تھا کہ بلوچستان میں انسانی حقوق کی صورتحال روز بروز ابتر ہوتی جا رہی ہے اور شہری آبادی کو درپیش خطرات پر عالمی برادری کی خاموشی انتہائی تشویشناک ہے۔
شرکا نے اقوام متحدہ، یورپی یونین اور انسانی حقوق کی عالمی و مقامی تنظیموں سے اپیل کی کہ وہ سوراب واقعے کی آزادانہ اور شفاف تحقیقات کرائیں تاکہ حقائق سامنے آ سکیں۔ انھوں نے نیدرلینڈز کی سول سوسائٹی، سیاسی نمائندوں اور یورپی ممالک پر زور دیا کہ وہ بلوچستان میں انسانی حقوق کی پامالیوں پر توجہ دیں اور متاثرہ خاندانوں کی آواز بنیں۔
احتجاج کے اختتام پر بی این ایم کے کارکنوں نے عزم ظاہر کیا کہ بلوچستان میں شہریوں کے تحفظ اور انسانی حقوق کی بحالی کے لیے نیدرلینڈز سمیت دیگر یورپی ممالک میں ہر سطح پر آواز اٹھانے کا سلسلہ جاری رکھا جائے گا۔