بلوچ راجی زْرمبشت ( بی این ایم ) ءِ جارکش ءَ گْوشتگ کہ ایمان مزاری ءُ ھادی علی چٹا ءَ 10 ، 10 سال ءِ بندیگی ملام دیگ پاکستان ءَ آمیدگس ءِ سیاسی کارمرد ءُ بنکی مردمی اگبالانی سکیں لگتمالی یے۔ بلوچستان ءِ زور گرگ ءَ پد پاکستان ءَ ناایمنیں مھترھندے ءِ دْروشم ءَ گوں لشکری توان ءَ وتی واکداری برجاہ داشتگ ، پاکستانی لشکر وتی وس ءُ واک ءِ کارمرد ءَ بے بند ءُ بار ءُ بے مھار اِنت۔
جارکش ءَ گْوشتگ کہ آمیدگس ءِ اے پرمان سھرا کنت کہ ریاستی زوراکی ، ناروائی ءُ مردمی اگبالانی لگتمالیانی بگیری ءَ ، گچینی پہ بلوچانی اگبالاں توار چست کنوکیں مردم مزدانک ءِ جاہ ءَ مھترھندی بیرگری ءِ دیمپان اَنت ۔ گْوست ءَ سبین محمود کشگ بیتگ ءُ زور بیگواھی ءِ بگیری ءَ گپ جنگ ءِ پد ءَ حامد میر ءِ سر ءَ پہ کوش ءَ بیڑ برگ بیتگ۔ نی پاکستانی لشکر آمیدگس ، پارلیمان ، پولیس ، تاکاری گس ، بار کونسل ءُ دگہ مھترھند ءُ نیم مھترھندی تْرامگیجاں پہ وتی بیرگری مولاں کارمرد کنگ ءَ اِنت۔
آئی ءَ گْوشتگ کہ ایمان مزاری ءُ ھادی علی چٹا ءَ بلوچ سیاسی کارکنانی ، زور بیگواھی ءِ درد سگوگ ءُ زوراکی دیستگیں کھولانی توار ءِ بستار ءَ آیانی راھبندی کمک کرتگ۔ شول کشیں بندیگی ءِ اے ملام ھما سرجمیں توارانی نگٹ کنگ ءِ کوشست اِنت کہ مھترھندی زوراکی ءِ دیم ءَ سر ءَ جھل نہ کن اَنت۔
بی این ایم اے پرمان ءَ سکا ایر جنت ، ھر دوئینانی ساہ ءِ پھریزگ ءِ لوٹ ءَ کنت ، ءُ چہ میان راجی تْرامگیجاں لوٹ ایت کہ آیانی ءُ دگہ سیاسی زندانیانی بنکی راھبندی ءُ مردمی اگبالانی پھریزگ ءَ سانمنیں رنگے ءَ دزمانجنی بہ کن اَنت۔
